گۆش بدەن بەداستان پڕ نە جەفا و دەرد
کێ بە دام سەخت موبتەڵا نەکەرد
کێ نەوست نە گێج مەهلەکەی هەلاک
سینەی کێ وە تێغ جەفا نەکەرد چاک
مەلیک محەمەد نام شازادەی گوزین
شێر شێرانگیر چون بەور غوڕین
ئەویش کە عاشق نۆش ئافەرین یوارێد
وەی مەکان وەی سەرزەمین بید
دایم دەردەدار جەدەرد و داغش
حەسرەت مەند بە شەوق بەهار باغش
یەک وەزیرێ داشت دانا و هۆشیار
جە حاڵ ڕازان دەوران خەبەردار
واتش ئەی وەزیر جای عەقڵ و هۆشم
مزانی من مات دەروون پڕ جۆشم
ئینە چەند وەختەن موڵک و ماڵ و شار
بە جا گوزاشتم پەی شۆخ دڵدار
نەشار دەمشق گۆشەنشین بیم
غەریب وڵات ئەی سەرزەمین بیم
من ئامام نازدار بە زۆر بوەرووم
بە ئارەزووی دڵ نیکاحش کەرووم
ئیسە ها دەمشق پڕ جەشێر نەڕ
ئەژدەر ئەژدەران ئەژدەهای ئەژدەر
چەند عاشق تەمام نەپای تەخت زەر
شێر شێرانگیر بەوران خوون خوەر
ئیسە مەزانووم جەرووی ڕۆژگار
زۆر من نەی جا نمەیۆم بەکار
ئیرادەم ئێدەن جە تەدبیر کار
بشۆم بە خزمەت ماه جەفاکار
تەشریف مەبەرووم من وە خاک پاش
شەرح ئیستدعام مەعلووم کەم جەلاش
نام و نیشان وێم تەمام تەمام
عەرز کەرووم جەلای شۆخ جەمین جام
بەڵکو مەیل کەرۆ بە دەربار من
دەرمان کەرۆ دەرد دڵ بیمار من
نە ساز مەجلیس سەرو ئەندامش
بنۆشم شەربەت شیرین نە جامش
وەزیر وات ئەی شا سەرم نەڕاتەن
سەرم ها نەڕات هەرچ ڕەزاتەن
شای نۆش ئافەرین یەک لەنجە دارۆ
هەزار کەس پەرێش ئەرواح مەسپارۆ
چەند کەس شازادە ئیقلیمات نشین
نەپایەی قەسرش کەفتەن ماتەمین
یە کول وەتەمای نۆش ئافەرینەن
نەشار دەمشق ماتەم نشینەن
شای شیرین خاڵان دڵ بێ ئەندێشەن
بەستەی نیکاحش بە دەستی وێشەن
ئیسە ئەرتۆ مەیل ئەی کارە پێتەن
هۆرێزە بشۆ پەروا جە کێتەن
بشۆ وە مەنزڵ مەکان دوڵبەر
بەدیدار یار سەرو نازپەروەر
گوفتار ڕازت یەکسەر کەر تەمام
وا چە نە خزمەت شۆخ جەمین جام
هەتا مەتاوی وەمهیرەبانی
نە پای تەخت زەڕ بە جانفشانی
مەبۆ جەودەمدا هۆشت بەوێت بۆ
فیکرت وە گوفتار، کردار وێت بۆ
مەلیک وات وەزیر تەنها بێ یاوەر
تەنها چۆن بشووم وەقەسر دڵبەر
بەڵکم نەرووی ڕاه غوڵامان شاه
بیاوان بەمن جە ڕای گوزەرگاه
چێش واچووم جواو عوزر لوانم
چۆن مەسمووع ببۆ ڕاز زوبانم
فەردا بیاوۆ ئەی خەبەر وە شاه
چون مەبۆ سامان عوزر ئەی گوناه
وەزیر وات ئەرتۆ خەیاڵت پەوسەن
خاترت بەی تەور پڕ جە وەسوەسەن
ئەی لیباس و بەرگ جە وێت ڕەها کەر
بەوێنەی زەنگی ڕووی ویت سیا کەر
سیاپۆشی کەر جە سەر تا دامان
بنمانی جە شکل چەشن غوڵامان
تەدبیر وەزیر بەخاتر ئاوەرد
وێنەی زەنگیان لیباس سیا کەرد
پۆشا وەقامەت بەرگ غوڵامان
بەعەزم دیدار سەوڵ خەرامان
لوا تاپای دەر بە هەوای دڵدار
مدرا نە پای قەسر گوزەرگای حەسار
دەستەی کەمەند گرد جەخەیاتەی خام
هەوادا نەدەور گیر ئاوەرد نەبام
وێش پێچا نە حەڵق سەررشتەی کەمەند
لوا بەسەر بام شێر دڵ پەسەند
هەم نە باڵای بام لوا بەدامان
ڕوو کەرد بەماوای سەرو خەرامان
یاوا بە ئەو باغ گوڵ جە هەزار تەرز
پای سەهی سەروان چناران بەرز
دیش نەپای درەخت مابەین باغان
زەمزەمەی سازان شەوق چراغان
نەرم نەرم بە ئەندەک شی بەنزاوش
تایاوا وە پای سەرچەشمەی ئاوش
شی تەک دا وەدار میخەک و مروار
نیگا کەرد نەرووی مەجلیس دڵدار
دوڵبەر نەرووی تەخت بەغەمزەبازی
چەنی جەوانێ بەعیشوە سازی
نیشتەن هەم زانوو مەست مەزەی مەی
بادە مەنۆشا پەیاپەی پەی پەی
گاهی دەست مەبەرد پەی یەقەی جامەش
گا مەگرت بەدەست تۆپ شەمامەش
گاهێ مەبۆسا لەعل لەبانش
گا دەست مەماڵا خاڵ و زوڵفانش
دەم مەنیا نەدورج حوقەی نەباتش
گا مەنۆشا ئاب چەشمەی حەیاتش
کەنیزان بەساز نەوای مۆسیقار
سەدای نۆشانۆش بەرزەن جەگوڵزار
موتریبان بەساز ئاهەنگ شادی
مەوانان مەقام موبارەک بادی
خەیاڵ کەرد نەدڵ ئینە یانی چێش
کێ بۆ ئەی جەوان بێ خۆف و ئەندێش
نیشتەن هەم زانوو دولبەر بە گوستاخ
مەنۆشۆ بادە بە زەوق و دەماغ
هیچ باکش نییەن جەشای کەمەر لاڵ
ئەفشار مەکەرد شەمامان کاڵ
من شازادانم یەکایەک دییەن
ئەی جەوان نەوتووڵ شازادە نییەن
هەر نەی فیکر بی مەسۆزا بەسۆز
تا شەب دەیجوور نزیک بی بەرۆز
مەجلیس هۆر گردن چراغ بی خامۆش
هۆرگردن ئەسباب جام نۆشانۆش
شازادە ڕوو کەرد مەنزڵگای وێش
بێ فیکر و خەیاڵ بێ خۆف و ئەندێش
مەلیک محەمەد ماتەم و زەویر
بە ماتەم ناگا یاوا بە وەزیر
هەرچ نەتۆی باغ دییەنش وە چەم
ئیعلام کەرد جەلای وەزیر پڕغەم
مواتش بەسۆز هەر زاری مەکەرد
پەیاپەی پەیوەست خاک بەسەر مەکەرد
وەزیر وات ئەی شا جوویای دڵداری
فایدەش نییەن ئەی خاکەساری
مەبۆ ئەو شەخسە فانی کەین بەی تەور
هیچ کەس ناوەرۆ نامش نەرووی دەور
جەگوزەرگای ئەو وێت بکەر پەنهان
پارە کەر بەتیغ مەودای بێ ئەمان
جەو دما نازدار پەی تۆ مەمانۆ
سەرئەنجام کار ئەڵبەت مەزانۆ
قبووڵ کەرد تەدبیر وەزیر کامڵ
بەعەزم دەعوا کەمەر بەست بەدڵ
چەند جە غوڵامان چابک گوزین کەرد
موهەیا تەمام چەنی وێش ئاوەرد
بەڵێ جەی وەرتەر شازادان یەکسەر
نەپای تەخت شا نەسەر کورسیی زەر
گردین سپەردەی شاه ئەلیاس بی
ئەلیاس باڵادەس شاهان شناس بی
شازادان یەکسەر شێران بێ باک
نە مەجلیس ئەلیاس مەوەردن خۆراک
مەلیک محەمەد دڵ نەهەراس بی
مێهمان بەسەرای شاه ئەلیاس بی
مەجلیس نیاشان تەمام وەردشان
یاران نۆش بادەی تەمام کەردشان
مەلیک محەمەد هۆریزا بەدەرد
ئیرادەی لوان کەمین سازی کەرد
ئەلیاس پەرسا لێش عەزم کداری
مەعلوومەن عاجز دڵ بێ قەراری
واتش فیدات بام عاجزیم چێشەن
خەیاڵم خاوەن دیدەم خەو پێشەن
جە ئەلیاس دەر دەم هیمەت خواهی کەرد
ئاما وە بیروون دڵ پڕ داخ و دەرد
چەنی غوڵامان پەسەند کەردەی وێش
هۆرێزان لوان نەپەی کار وێش
نەپای قەسر زەڕ شین یەک جاهێ
وێشان دا پەنهان نە گوزەرگاهێ
#خانای قوبادی# [1]