قەباڵەکۍ هۆرامانی
بەشۍ چوارەمە
یانی مەشۊم چەمەڕایی کۊتایی (ئارامی) و (گریکی)..هتد، بە کۊتا نامەکا ئا سەردەمەو کوردستانی کریۊ و زیاترە چانەیچ، چەمەڕایی بەعزێ کەرەسۍ پېوەسۍ و پېوەڼی ئارامی کریۊ. مەشۊم وشکنەر وەختێ دەسکەرۊ بە لەیەکۆدایۆ بەعزێ نامۍ کەسیۍ و جۊگرافیۍ، هاگادار یان ئاگاش جە کەرەسە زوانی ئاشووری وەردەسمەڼە بۊ، چونکم (هەرپېسە مېژوو نویسە ئاشووریەکۍ،پاسە باسشکەران) میانو ئاشووریەکا و میدیەکانە پەی ماوێ فرەی ئاڵۆزیی فرە بیەن و بە ڕادێ کە بەردەوام شۊنەو یۊترینیۆ بیېنۍ و ئاشووریەکۍ فرەوجاری بەشێ جە خاکو میدیەکاشا داگیرکەردەن، بە دیاریکریایی ناوچەکان و کۊردستانو ئارۊی،دمای داگیرکەردەیچ خەڵکەکەشا ڕاگۊزەر کەردەن پەی چن ناوچێتەری و نامۍ یاگەکایچشا بەپاو ئارەزو وېشان فاڕان، پېسە جە سەرکڵاو و سەنحاریب و پاشاکا تەرینە ڕوەشدێنە، پەوکەی پەی دیاریکەردەی نامە کەسییەکا و نامە جۊگرافییەکا ناوچە میدیەکا، خاستەرەن ۋزیانە دلۍ ترازیا وەراوەرکاریاوە، پەی ئانەی ڕەسەنشان بە ڕاسی و ڕەوانی دیاری کریۊن، بېجگە ئانەیچ کە کۊتاو نامۍ و یاوەرنامۍ و ڕانام و ئا کەرەسۍ کە تەواناو یاگەگېرتەیشان هەن، جە هەشت دۊخەکەنە نەوزیا پەشتەو گۊشا.
ناواخنو قەباڵەکا:
سەرەتا، مەشیۊم واچمۍ کە ئېستەیۆ قەباڵەکا هۆرامانی و لەیەکۆدایۆشان جە لاو وەرکۆتئەشناسەکاوە، نامۍ هۆرامان و کۊردستانیشا یاونا دلۍ میانە زانستی و مېژوویی و زوانیی و زوانئەشناسیەکاو ئەوروپای، ئارۊ نامۍ هۆرامانی جە فەرهەنگو(وەبستەر) و (ئوکسفورد) و ئینسایکلۆپیدیای جۊراو جۊر، جە بەرهەمو بەشێ جە وشکنەرە(کورد، تورک، عەرەب، ئەدمۆنس) و چن بەرهە مۍ تەرۍ جەهانیۍ تۊمارکریان.[1]