داستانۊ گوڵ و بولبولی
بەشۍ حۆتەمە

بەچە بولبول، جە تاریفۍ گوڵینە، کە نەسیمی پەیکەردە، کۆت هەلەکەسەما، بېهۊش کەوت، دمایی ئاماوە هۊش، لوانە کونجو خېیاڵا، ئیتر ئەڎێش مۊچیاری کەرد، کە ئامان، هەڵای تۊ بەچەی نۊهاڵەنی، جە ئازارا عەشقی نمەزانی، هەڵای دامەو عەشقی نەکۆتەنی:
وېش بۍمدارا، کەرد بە زەربی جەخت
بەچە، بوڵبوڵ وست، نە هەلهەلەی سەخت
تەعریفاتی گوڵ، شنەفتش بە گۊش
غەڵتانی خاک بیی، ئەفتادەی مەدهۊش
هەم جە بېهۊشیی، ئاماوە، بە حاڵ
عیشقی گوڵ وستش، نە کونجی خەیاڵ
گاهێ مەناڵا، گا مەبیی خامۊش
گا ئاما بە حاڵ، گا مەشی جە هۊش
گا ناڵەو ئەفغان، گا زاریی و خرۊش
گا بە وەسڵی گوڵ، دڵ ئاما بە جۊش
تۊ، هېما، توفڵێ، بۍ خەبەر جە کار
نەڎیەنت بە چەم، تەڵخی ڕوزگار
چنێ نە ڕای ئەو، زوخاو نووشیدەن
نە باغش، هیچ کەس، گوڵێ نەچیدەن
عیشق حیلەباز، پەڕ مەکر و فەڼەن
دامی مەرگ، جە ڕای، چنین کەس تەڼەن
نە دەروون بەرکەر، سەودا و خەیاڵش
ئالەم فریوەن، وېران بۊ ماڵش.[1]