پیشەسازی جە هۆرامانەنە
ئەوەنویستەی و دەسکاریکەرڎەی: ئەسعەد ڕەشید
بەشۍ حۆتەمە

کڵاش کەردەی:
ڕای سەختەی تەوەنینە، کەش و کۊ هۆرامانی، مەگەر تەنیا کڵاشۍ دەرەقەتش بەیا، کە پاپۊشێ سڵامەت و مەحکەمەن پەی خەڵکو ناوچەکەی.
کڵاشکەرۍ و کڵاشچنۍ، ناوچەو هۆرامانینە فرېنۍ، فرېچشا نامبانگی خاسشان هەن.
کەلوپەل و کڵاش چنیەی زیاتەر(مشتۍ ئاسنە، کۊتەی دارین، کاشیبەند، پۊس، هەنگووژاوی، پېکەنۍ، تەبەنۍ، گۊچەوەنی، نەی). ئامرازۍ کڵاشکەردەی(پەڕوۍ، نەی، بەنی مووین، هەنگووژاوی، کاشیبەن).
بەنی مووین، (پەرگەماش) پەنە منیارە، کە بنەماو چنیەیش سەرۆ مەرزنارە، یانی سەرو پەرگەمێکېوە، بە(نەی)، دەسکەران بە چنیەو لنگە کڵاشەکا.
پەڕوۍ کڵاشکەردەیچ، پارچەو جلەکۊنا، یان جلە دڕیایا. کە جە (لۊکە) یان (کەتان)ی وەشکریێبان.
پارچە پەڕوەکۍ قەڎکریان و لوولۍ کریان، دماتەر کەمێ تەڕۍ کریان، بە مشتە ئاسنینەکۍ، سەرو(کۊتە)یۆ کۊیاوە، ئۊسا وېش مەزانۊ هەر تاکێ کڵاش چن پەڕوۍ کۊیێش گەرەکېنۍ. دماتەر پەڕوە کۊیێکۍ پەنج لێوە بە پېکەنۍ هۊرپېکیا، ئینجا کاشیبەڼ نریۆ ئا پەنج یاگە، کاشیبەڼەکۍ بە پاژنەو هەم لووتەو کڵاشەکەیۆ قایېمۍ کریان، دماتەر(پەرگەما)ش سەرۆ منیارە. شایانو باسین،کاشیبەڼ و لووتە و پاژنەو کڵاشی، جە ڕېڵەخوایا دلۍ لەمەو حەیوانی و پۊسی وەشکریان.[1]