دەسەڵاتو عەلی مەردان سانی کوڕو حسێن سانی.
عەلی مەردان سان، ساڵەو (1778ز) ی تەختو دەسەڵایش وەرگېرت، جە ئەوەڵۆ خەڵکو هۆرامانی ئاڎیی بە زاڵم و ستەمکار زانېنۍ، ڕەفتارۍ ناڕەوێ دېنۍ پاڵش. دمای یەرۍ، چوار مانگا جە دەسەڵاتیش، ئیتر خەڵک وینگاشا پەیش فاڕیا، ئاڎشا پېسە فەرمانڕەوێوە دڵنەرم و بە بەزەیی و داڎپەروەر ئەشناسا. ژەمەو واردەکاش سنووردارە بۍ، زیاڎە مەسرەفی نەکەرۍ، واچۍ حەرامەن. پەی ماوەو چوار، پەنج ساڵا چەنی (محەمەد تایەر سان) ی برایش بە هامبەشی فەرمانڕەوایی کەرېنۍ، ناوچەو (لهونی) بە تەمامی پەی عەلی مەردان سانی و ناوچەو (ڕواری) پەی محەمەد تایەر سانی و ناوچەو شامیانی بە هامبەشی بەرېنېش ڕاوە.
ساڵەو (1784ز) فەرمانو دەوڵەتی پەی ڕاوەبەری ناوچەو هۆرامانی پەی محەمەد یوسف سانی بەرشی، بەڵام وەڵۍ ئانەیە سوبحان وێردی بەگ و حەسەن بەگ و محەمەد یوسف سانشان جە کۊنیشتێنە نیشنێرەو قەسەمشا دێ، گەر فەرمانو دەسەڵاتی بە نامۍ هەر کەسێشاوە بەرشی، دوەکەی تەر شۊنکەوتۍ ئاڎیی بان. دمای ماوێ خەسرەو خان والی سنەی لوا پەی تارانی، جەنگەرانیۍ و ئاژاوەچیەکۍ هۆرامانی دیسان جەنگ و ئاژاوېشا دەسپەنەکەردۆ، بە تەرزێ جەنگی جامنە قەڎ هۆرامانەنە ڕوەش نەڎێنە، کە کوشتارێ فرەش چەنەکریا.
هەر دوە لاو جەنگکەرەکا لوێ خزمەتو موستەفاخانو والی سنەی، والی دیسان دەسەڵاتش بەشکەرد ملشارە پی تەرزە:
شارو هۆرامانی پەی محەمەد یوسف سانی، ناوچەو لهونی پەی عەلی مەردان سانی، دەرەو ڕواری پەی سوبحان وێردی بەگی، نوێنە پەی محەمەد تایەر سانی، ناوچەو شامیانی پەی حەسەن بەگی.
موستەفا خانو والی ئەردەڵانی، بە فەرمانو پاشای سەفەرێش پەی شوشتەری و دیزەفوولی کەرد، چەنی وېش گردو سانەکۍ هۆرامانیش بەردۍ، ڕانە محەمەد تایەر سان و سوبحان وێردی بەگ شۊنەو یۊیرە بە پاڼزە ڕوۍ کۊچی دمایېنشا کەرد، کە وەرانوەرەن بە ساڵەو (1796ز) .
دمای کۊچی دمایېنو ئاڎییشا، محەمەد یوسف سان و عەلی مەردان سان گېڵێوە پەی هۆرامانی، دەسەڵاتەکەو سوبحان وێردی بەگیشا تەسلیمو غەفار بەگی کوڕە گەورەیش کەرد، دەسەڵاتەکەو محەمەد تایەر سانیچشا تەسلیمو فەتح عەلی سانی کوڕە گەورەیش کەرد.[1]