باخ و چەم و دەرە، پەی گەشت و سەیرانگاو نازارا، پېسە واتەنشا:
وەهار ئاماوە دیسان پەی داخا
سۆزۍ ملا کوېسان، نەرمېچ پەی باخا.
زیاتەر فەسڵو وەهاری، دمای پەرداخی کەش و کۊ و دەرە و باخا، ئیتر عەزمو گەشتی جە لاو نازاراوە درووس مەبۊن، بەڵام وەشەویسەکۍ میرزا ئۆلقاڎری پایېزېچەنە عەزمو گەشتو دەرە و چەمیش هەن، هەرچن چەم و دەرە سەردەن، بەڵام ئاڎە مەیلوگېڵایش هەن، میرزا داواش وەنەمەکەرۊن کە دەرە سەردەن، گەر مەیلوو گېڵایت هەن، خۊ قاتی چەمی نییەن پەی سەیرانو تۊ، ئانە چەمانو من، ئانە باڵەخانەی چەم کە بە تۊزەو پەیات گڵەبان کریێنۍ، مەولەوی واتەن: خاسبی تەشریفت هەم ئاوەردەوە، خاکی پات وەتەن ئاوا کەردەوە، تۊیچ پا بنیە دلۍ باڵەخانەو چەمام، هەم ئاوەڎانۍ مەباوە، هەم پەی چەم ئەندازی تۊ خاسېنۍ.
قیبلەم چەم سەردەن
قیبلەم چەم سەردەن قیبلەم چەم سەردەن
چەمت چمان مەیل سەیر چەم کەردەن
ئارۊ زلانەن هەوای چەم سەردەن
چناران چەم وە هەم چەم وەردەن
بۊ مەشۊ وە سەیر وېت مەدەر ئازار
چەمەن بېسەیرەن تا چەم کەرۊ کار
ئەر مەیلت چەم بۊ نەونەمام نۊ
چەم خۊ قات نیەن پەی سەیرانگەی تۊ
باڵاخانەی چەم چەمەڕاکەی وېت
گڵ بانی وەخاک توز پاکەی وېت
خەیلێوەن یاساخ بۍ دەنگ و باسەن
هەر پەی چەم‌ئەنداز سەیر تۊ خاسەن
سا وەبان چەم تۊ تەشریف باوەر
سەیر چەم وەسەیر شەتاو من کەر
بېچەم بای وە چەم نیگاداریش کەر
پەی سەیر ساڵان ئاویاریش کەر
ئەوەند ئاو شۊر ئەسر چەم واران
سەوز کەردەن هاڵان بە وېنەی داران
(قاڎر) جەهان چەم کەرد وە نەزر ڕېت
تا وېران نەبۊ پەی سەیرانگەی وېت.[1]