بنەچەو بەگزاڎەکا هۆرامانی
بەشۊ شاڼزەهەمۍ
شوڕش و خەڵکو هۆرامانو تەختی دژ بە دەسەڵاتو فەرهاد میرزای:
پەلامارەو تفەنگچیە هۆرامیەکا پەی سەرو شارو مەریوانی،
دمای کوشتەی (هەسەن سانی) و زنجیرکەردەی براکاش، تفەنگچیە هۆرامییەکۍ بە نائومېڎی پەی هۆرامانی گېڵێۋە، چۆلایچۆ فەرهاد میرزا چەنی دەسو پېۋەڼەکەیش ڕوەو (سنە) گېڵێوە، (بارام بەگ و مسەفا بەگ) ش بە قوڵ بەسیایی چەنی وېش بەردۍ، فەرمانو زیڼانی کەردەیش پەی بەرکەردۍ و دیڎارو چەمپەنەکەوتەیش چەنی مەنعە کەردۍ.
هۆرامیەکۍ پەی ماوەو ساڵێ کوشششان کەرد پەی ئازاڎکەردەی سەردارەکاشا، بەڵام بېئومېڎۍ بیۍ، چیلایچۆ (ڕوسەم بەگ و برزووم بەگ) ، کوڕۍ هەسەن سانی، دەگاو دەگا گېڵېنۍ و موچیاری خەلکی کەرېنۍ و هانیشادېنۍ پەی جەنگی چەنی فەرهاد میرزای، خەڵکو هۆرامانی دمای وېگلېرکەردەیۆ و وېڕېکۋستەیشان، جە پەلامارێ شېرانېنە پەی سەرو شارو مەریوانی، تاواشا (محەمەد باقر خان) حاکمو مەریوانی کە چا عانەنە سەرپەرەشتی نۊکەردەیۆ قەڵاو مەریوان (قەڵاو شائاباد) ی کەرۍ، بڕفاناو یاوناش (هۆرامان) ، چاگە زیڼانیش کەران، هەواڵیچشا کیاست پەی فەرهاد میرزای پەی فاڕایۆ زیڼانیەکا، گەر ڕازی نەبۊن، ئانە جە هەقەو ۋنەو هەسەن سانینە کۊشاش.[1]