قۊناغەو هەرزەکاریم
بەشۍ: حۆتەمە
بە سەروەشی و دڵوەشی ئامایمێ پەی کرماشانی و مەریوانی. من حەرچی زوو خەبەرم کیاست پەی ئەڎێم کە بایی دوۍ چوخەو ڕانکا زەڕ لا مامۊ حەمە خانیمۆ بارۊ، وە هەرچی زووتەر پێم کیانۊ، چوونکوم سەفەرەکەم نزیک بېیەنۆ. دماو حەفتېوی ویم پەنە نەگیریا وەرەقەم بڕی کە بلوە پۆدیمەرە پەی ئەحمەڎئاوای، بەڵام کە سارایەکەو مڵەوەردېم بڕیو لوانۍ پۆدیمەرە ڕوەو کەڕەجاڵېرە، دیم کاک شۆکەت چېرۆری ئاماوە. ماچۊ ئانە خێرا کورە؟ واتم سەفەرەکەم نزیک بېیەنۆو خەبەرم کیاستەن ئەڎام زەڕم پەی کیانۊ، ئانا خەبەرش نیا! ئاڎییچ ماچۊ گېڵۆ من ئاوردەن. ئیتر هەناسێوم ئاماوە وەرەرە.
دزڵیە لامادا یانەو کاک زورابی، سوتفە کاک دوکتۆر یوسویچ چاگەبۍ، لوایمۍ پیاسی و ئۆڎەسو دەگێما کەردو، باسو سەفەرەکێم پەی کەرد، ئاڎییچ کوچېو ڕانمایی و موچیارییش کەرداو دەسش بەرد باقېو تمەنش کەردۍ کیسەمەرە کە (دماوە ژمارام 16 هەزار تمەنۍ بۍ، کە پەی ئاوەختەیە فرە بۍو بەشو بلیتەکەیچ و ڤیزاکێچم کەرۍ) . بە قەسەمو قورئانی کە من لازمم نیاو زەڕم پەی ئامانو ئینېشا، ماچۊ ئینە دنیانە با پەنەت بۊ خاسا. فرە مەمنوونش بېیاو خوڎا حافیزیم چەنی کەردو ئامانێ پەی مەریوانی. چەنی کاک شۆکەتیچم پەنجا دینارەکە کە ئەڎێم پەی کیاستەبېنۍ لوایمۍ کەردما بە تمەن، ویرم نېیا چنش کەرد، ئینە مزانو ئاوەختە دینارێو کەرۍ یەرۍ دولارۍ، یانی پەنجا دینارەکە کەرۍ نزیکەو (150) دولارا. پا جۊرە زەڕو سەفەری مسۊگەر بی. کە ڤیزەو ئەڵمانیای شەرقی بە (25) دولارۍ بۍ، بلیتو (تاران ئیستەنبوڵ بەرلینی شەرقی) چ بە دواڼزە هەزار تمەنۍ بۍ، زانیاریچما بۍ کە بلیتو قیتاری جە بەرلینۆ پەی سویدی بە (20) دولارۍ بۍ. خوڎا حافیزیچم جە یانەو کاک شۆکەتی کەردو ئامانێ پەی کرماشانی، پەی یانەو کاک حەمەڕەشیڎی، ئاڎییچ دوۍ هەزار تمەنیوش دانۍ پەنە. خوڎا حافیزیچم چەنی ئاڎیشایچ کەرد. یانەو مامۊ یارەی ئاوەختە نزیکو تاقۆسانی بېنۍ، لوانۍ شۊنەو مامۊ نوونەی دیم دېڎە قمریە و کاک هوشېیاری ئینا ڕاوە پەی هەڵەبجەی، سڵامو خوڎاحافیزیم پۊرە کیاستۆ پەی ئەڎێمو ئاڎییشا. حەر ئا شەوە من و مامۊ نوونە کاک دیاری مامۊیم سوارۍ بېیەیمۍ پەی تارانی.
ئېمە ڕۊ (13-11-1984) ی (پەروانەی عبور/ Laissez - Passer) کەما هور گیېرتۆ وە (16-11-1984) ی سەعات (14.45) دەیەقی جە تاران سوارۍ بېیەیمۍ پەی ئیسەتەمبووڵی، چاگە ترانسیتیوی دریژما بۍ، فرەیچ تەرسېنمۍ کە تەسلیمو عێراقیما کەراوە، پۆکەی یاگیوۆ گرمۆڵەما بەست تاکو سەعات (23.10) پڕایمۍ پەی بەرلینی، سەعات یەکو پەنج دەیەقی شەوۍ یاوایمۍ بەرلینی شەرقی.
مەتارەنە ئامایمۍ بەر، کەسی نەوات کوگە ملدۍ، بەڵام زانېنۍ کە چاگە مەمەنمیوە. سەرد، ئاورا، تەرسا، زوو تەکسی وی مۆسکۆفیچما گیرت پەی مەحەتەو قەتارو (ئۆست بان هۆڤی = مەحەتەی هێڵی شەرقی) . ئا وەختە ئەڵمانیای شەرقی کۊمۆنیستی بۍ، فرە فەقیرو داماگ بۍ، عالترین سەیارەشا مۆسکۆفیچی ڕووسی بۍ. مەحەتیوی کۊن و پیس و پوخڵ و گەڎا، نە یاگېوە بۍ گەرمت بۊوە، یا ئیسراحەتېو کەری، تاکو ساحبێ پېسەو کوڵەی لەرزما کەرد، چوونکوم تارانۆ حەر ئا جلېما ئاردېبېنۍ کە پورەما بېنۍ، ئاڎییچۍ پاییزیۍ و ناسکۍ بېنۍ. کە ڕۊ بیۆ کافەترییێو کریاوە، هەر یۊ هېڵەڕوەنیوەما ئەسا، یۊ دە دولارېوما داو باقیچشا نەبۍ بڎاماوە، ئیتر حەواسو قڕڕەو مناقەشێچما نەبۍ.
یەواش یەواش قەڵەباڵغی کۆتەرەو پەنجەرەو بلیتی کریاوەو، سەرەو بلیتو قەتاریما ئەسا پەی سویدی بە (20) دولارۍ. سەفەرەکە پاسنە بۍ چوار پەنج سەعاتۍ وشکانیەرە لوېنی تاکو یاوێ حدودی ئاوی، چاگێچۆ قەتارەکە لوېنە دلۍ باخیرەکەی بە شش سەعاتیو یاوۍ سوید. چەمەڕوانی قەتاری فرەش کېشت، مەحەتەیچ فرە سەردو تەڕو تووش بۍ. هەردویما حەر بەشو نان واردېوی زەڕما پەنە مەنەبۍ، نەیارېنمېچ خەرجش کەرمۍ. خاس ویرما کابرێوی ئەڵمانی لامەنە ڕەڎ بی تەماشېوەش کەردا، دیش فرە سەردم بۍو زەعیفیچ بینی (وەزنەم 52 کیلویم بی) گېڵاوە لوا کیکیوەو چاییوی گەرمو شیشېوەی فرە گولانیچ، نیم پیاڵیو بۍ شەربەتېوەش ئەساو شەربەتەکېش چەنی چایەکەی تېکەڵ کەردەو، بون و بەرامېوی وەشش بۍ، نیاش وەرو دەمیم بە ئیشارەت ماچو بوەرەشا با ئەنەرژیت گنۊنە، منیچ بە دڵی پەڕۆ سپاسم کەرد. دماوە بەرکۆت شەربەتەکۍ کۆنیاک بېیەنو کە پەی سەردای فرە عالش ماچا. ژەمەکۍ خارەتېو گەرمش کەردارەو وزېوی نەفسیچش دانۍ پەنە.
بلیتو قەتارەکەیم ئیسە نەمەنەن، بەڵام دۆرو عەسری بەرلین بەرشیێیمۍ، نزیکو عیشای یاوایمۍ سەرو بەحری. قەتار لوانە دلۍ باخېرەی. باخېرەکە گۆرەبۍ، ڕستۆرانیو باڕو دیسکۆو گازینویش چەنە بېنۍ، بەڵام ئېمە هیلاکی و ئاوراو تەرسای پرزەش بڕیېبېنمۍ. پەی کەم شانسیچ ئا شەوە سیاو ۋاو زریانېوی فرە بە قوەت بۍ، باخیرەش کەردەبۍ پېسەو لۆلۋۍ ئارېش و بەرېش، لوۍ عاسمانو گنېرە وار، حەرچی چا قیتارەنە بېنمۍ گرد تېکۍ شېیەیمۍ، ئا کوچێچە لەمەمانە بۍ ئاردماوە، پەڕۋۍ نەمەنۍ بەکارشا نارمۍو پیسېشا نەکەرمۍ، پەڕۋۍ پەشتەو سەرەیما، پەردۍ پەنجەرا، فرە وەحشەتناک بۍ، چاریچ نەبۍ ئەشیێ ئارامت گېرتەبیێ تاکو سەعات ششو ساحبی ئینجا یاوۍ سوید.
پا وەزعە ناوەشېوە، حەر چەنی باسش کەرا جە جەحەڼەمەنە بەرات پەی بەهەشتی، پۊلیسو سویدی پەزیراییوی عالشا چەنە کەردیمۍ، تەکسیێ مارسیدسی سیاوی ئاخر مودێلشا پەی گېرتیمۍ یەکسەر پەی میمانخانېوی مورەتەبی تایبەت پەی مەهاجیرا. چی سەفەرەنە فرەو چېوام بە عەمەلی و بەچەمۍ وېم دیی، پېسەو فەرقو دەوڵەتە دیکتاتوراو، کۊمۆنیستاو هەر پاسە وڵاتی ڕەفاو نیزامی دیموکراتی و قیمەتو ئینسانی.
فاروق سان ئەحمەد.[1]