قۊناغەو هەرزەکاریم
بەشۍ: دەهەمە
ژیوا و گوزەرانم جە سویدەنە:
پېسەو بەشی یەکەمەنە ئیشارەتم پەنە کەرد، کە کوچکەردێم پەی شارو لووندی بەنیازو وانای جە زانکۆنە پاو قەڎەمش فرە خێر نەبی. ئانەبۍ شەوەی وەڵینەش (28-02-1986ز) سەرۆک وەزیرانو سویدی، ئۆڵۆف پاڵمێ (Olof Palme) شا تێرۆر کەرد. ئۆڵۆف پاڵمێ ئینسانیوی سۆسیالیستو نامڎار بۍ، دنیانە پەی پەشتگیری جە گەلە چیردەسەکاو حەرپاسە پەی سڵحی جەهانیچ قسە کەربۍو قسېچش ڕەواجشا بۍ.
مەرگو پاڵمەی زەرەرېوی گۆرەش دا جە پاگاو قەڎرو تاکو کوردی جە سویدەنە، وە ئۆروپایچەنە بە گردی. چوونکوم حەرچی زووتەر مییداکاو سویدی وستشا ڕوە کە شکەی فرە سەرەکیەشا، شکەو کوردی و وەجە نزیکیچۆ شکەو پەکەکەی بۍ. کە ئاڎییچ بە فشارو میتی تورکی چڕڕەشا کەردېبېوە. چوکوم پەکەکە تازە قەرارو جەنگی مسەللەحانەش دژو ڕژېمو تورکییەی بەرکەردەبۍ. تورکیا پێگیرەنە بۍ کە بە هەر قیمەتېو بیێ ئەشیێ گۆبەڼێوەش نیېوە، کە سویدو ئۆروپا حەرەکەو پەکەکەی بە ترۆریست بڎا قەڵەم. سویدیچ کە پەی یەکەم جاریش بۍ تاوانی پا گۆرەیەشە چەنە ڕوە بڎۊ، پەلەقاژۍ سەرە واویویچەنە بۍ پەی ئیستەیۆ قاتلو سەرۆک وەزیرانیشا. پۆلیسو سویدی فرە دەسەپاچۍ بېنۍ، جە بۍ تەجروبەیینە پەل پەی گرلێوی کېشېنۍ، جە فرەو کەساو ڕېکۋزیایا شکەشا بۍ. ئەلکەهولیستیاوە گیرەش حەتا گۆرە بازرگانېو، ڕژیمو ئەپارتایتو ئەفریقای جنوبیۆو، سی ئای ئەی، حەتا جە خودو پۆلیسو وېچشا شکە کەرېنۍ. نەزانېنېچ چکۊوە دەس پەنە بکەرا.
بە سەبەبو ئانەیە کە سوید داواو پەنابەری ئۆجەڵانیشا ڕەڎ کەردەبۍ، وە حەر چا سەروبەنەیچەنە پەکەکە دوۍ ئەندامی وەڵینۍ وېش کە ئیسە وازشا ئاوەردەبۍ، جە ستۆکهۆلمو بەرلینەنە کوشتېبېنۍ، ئینەش پەنە نەشی دەنگۆ کۆتەرە کە ئانە پاڵمەش کوشتەن کورد بېیەنو ڕەسمېوی فانتۆمی/وەهمیشا وەڵا کەردۆ. ڕەسمەکە کتولت ئۆ کوردی شۍ، (قژۍ سیاوۍ، چوڕچەمی درېژکەڵەو لووتەی دەنوکیە، چەمۍ سیاوۍ) . باس باسو ترۆری و کوردی و پەکەکەی بۍ جە مێدیاکاو سویدیەنە. کورد بېیەی، بیەبۍ عەیبەو شەرم. ئەر کۊمپیوتەرەکەت، مەکینەکەت، سەیارەکەت یا پاسکیلەکەت پەکەش کۆتېنیێ جا بە هەر سەبەبێو بیێ، هامکڵاسۍ یام هامکارەکېت بە جددی بیێ یان بە گاڵتە واچېنۍ: خاس تەرۆرت کەردەن. یان داواو قەڵەمدادەری کەرېنی، واچېنۍ گېرە بەڵام ترۆرش نەکەری. فرە چی بابەتا کە بە شعوری ئېمەی کوردی گەمە کەرېنۍ.
دۆرو هەشت نەفەرا جە ئەژناسیاو وېمشا پا تومەتە جە جنووبو سویدیەنە گېرتۍو دماتەر وەرېشا دێ بەشەرتێ شارەنە بەرنەشاو وە گرد ڕوێویچ پەی ماوەو یەرۍ چوار ساڵا بلا پۆلیسەنە حزورو وېشا قێڎ کەران. حەتا ئاروویچش چەنی بۊ، پەیجورېنۍ کە کۍ و بە چ سەبەبېو ئا پیا عالە پا دەردۍ لوا.
فاروق سان ئەحمەڎ.[1]