قۊناغەو هەرزەکاریم
بەشۍ: سېڼزەهەمە
ژیوای و گوزەرانم جە سویدەنە
ئېمەی بۍ تەجرەبۍ، هەر یۊما بە جورېو تەعامل چەنی بەبەی کەرېنمۍ، نە ئەڎێوە نە واڵێوە نە مەتیێوە، دوۍ کەسۍ گەنجۍو دەسەپاچۍ. بە پاو کتېبۍو موچاریاو سیستەراو خەسەخانەی وېش کەرېنمۍ، ئیدیم و ئۆدیمش کەرېنمۍ.
چەنی بە کۊمپیەتەر کەردەی سیستەمی کتېبخانەکا، وردە وردە یاگۍ ئېمەیچ لەقە بیە، تاکو یاوا ئا یاگۍ کە کتېبخانەکۍ زانکۆیشا گلېرۍ کەردێ پەی یەرۍ دانا، باقیشا وستېرە، ئیتر سیستەمو (هەر کەس ئاخر جار تەعین بیەبۍ، یەکەمین کەس لوۍ بەر) ، هەڵبەت بە مەعاشو ساڵېویۊ. من یۊ بېنۍ چانېشا کە ئەشیێ ئاستێم جیا.
دماو ئانەیە ساڵېو هەرمانەو تەکسیم کەردە، دماتەریچ جە کولیەو ئادابېیەنەو بەشو تۊکاری ئەدەبو سویدی و کلاسیکیەنە دوە ساڵېوم وانا. (1999 تاکو 2000ز)، دوەبارە دەسم کەردۆ بە هەرمانەو کتېبیانەو دانیشگای (کتېبیانەی ئەرشیڤیچش LUB پەنە ماچان). جە وەشەویسی پەی کتېبیو کتېبیانەی، شارو لووندیم ئاست جیاو ڕوەم نېیا شارو بۊڕۆسی کە (300) کم سەرۆ بۍ. جە کولیەو کتېبیانەی و بەشو ماستەریەنە دەسم کەردۆ بە وانای، (2001- 2003ز) ماستەرم جە بەشو (کتېبیانەو زانستی زانیاری) م هۊرگېرت:
Library and Information Science. دماو ئانەیە پەی زیاڎ کەردەو مەعلوماتیچم ساڵېویچ زانیاری سەرو بنەچەو بنچینەو چینو توېژەکاو وەرکۆتو مېیانی، حەر جە زانکۆو لووندیەنە وانا. دماتەر تاکو (2008ز) متەفەریقە جە فرەو شارەکاو جنووبو سویدیەنە پېسەو ئەمینو کتېبیانە گردینەکا بەردەوام بېیا، وە جە پایېزو (2008ز) حەتا ئیسە حەر پاتایتڵیە جە کتېبیانەو گردینی ئێسلۆڤیەنە بەردەوامەنا.
جە هامسەرەی یەکەمەمەنە تەنیا خاتو (هێلینە)م هەنە، کە ئیسە تەلەبۍ مەرحەلە یەرۍ دوکتۆرایەنە جە بوارو مایکروبیۆلجی جە زانکۆ و لووندیەنە، هامسەر گیریش کەردەنو ئەڎاو ئا کناچە وەشڵانېنە کە عاشقەو کتیب وانایەنە، (حالیەن ئینا پشوو زاڕوڵەگرفتنە) . ئەڎاو هێلینیچ دماو ئانەیە جیا بېیەیمێ، شوش کەردۆ بە قۆمێ وېش، پاسە هێلینە گیڵنوە فرە بەختەوەرېنۍ. وېچم چەنی خاتوو (سەباح)ۍ قۆمېم هامسەر گیریم کەردۆ، زاڕوڵەما نەبی، بە بەشەو خوڎایچ ڕازیېنمۍ. ئېمەیچ تاکو ئیسە بە بەختەوەری ئاوردەنماو وە هیواو بەختەوەریچ پەی گرد خېزانیوی وازمۍ.
هەمیشە هۆڵم دان ئا دروشمەو خاتو (ئەمنە)ی ئەڎێم بەیاگۍ بارو: کە ئەر واتێم ئەڎا گېیان وەش هەنی؟ واچۍ: ئەر خەڵک وەشش بۊ منیچ وەشما. منیچ ئا وەختمە وەش بېیەن کە دۆروبەرم وەشش بیە بۊ، وەبە عەکسەکېچشۆ ئەر تاوابوم کومەکیم کەردەن، وە ئەرنا خەفەتم واردەن. فرەیچ ئینانا خەمو خاک و خەڵکیچەنە، حەر وەختېو دوکەڵو هاواناو ئێرانی و تورکیای وینو دلۍ چەمو دوڵەکەو وڵاتیەنە، هەناسېوی سەرد جە دەرونو منیچۆ هورقوڵیۊ، حەر پاسێچە کە حەشدی شەعبیچ وینو حوکمو کەرکوکی کەرۊ.
پی جۊرە دمایی مارو بە ویرەوەریە دیارەکام جە وڵاتەنە، وە حەرپاسە ژیواو گوزرانم جە غەریبېیەنە. ئومېڎوارەنا پەی شمەیچ لایەنی کەم یادەوەری و جە عومری ۋېیەردەیتانە چەکەرەش کەردەبوە. هیچ هەرمانېوەیچ بۍ عەیبە نېیەنە، جگە ئا هەرمانۍ کە هەرگیز نەکریێ بۊ!
هەرگیز نمێوە عومری ۋېیەردە
مەحاڵەن ئامای دوسی بار کەردە.
فاروق سان ئەحمەد.[1]