کۆسار عوسمان
بەگوێرەی ڕاگەیێندراوێکی پارێزگای ئیستەنبووڵ ئەو ژنە کوردە بەساڵاچووەی کە گوایە بەهۆی نەزانینی تورکییەوە هاوکاری نەکراوە، خزمەتگوزاریی تەواوی پێشکەشکراوە و ئەو ڤیدیۆیەس کە بڵاوکراوەتەوە، تەنیا بە مەبەست بووە.
دوای بڵاوبوونەوەی گرتەی ڤیدیۆیی ژنێکی کورد لە فڕۆکەخانەی ئیستەنبووڵ کە دەگوترا بەهۆی نەزانینی تورکییەوە هاوکاری نەکراوە، پارێزگای ئیستەنبووڵ ڕاگەیێندراو و گرتەی ڤیدیۆیی بڵاوکردەوە و ڕەتیکردەوە هاوکاری نەکرابێت.
گرتەی ڤیدیۆیی ژنێکی بەساڵاچووی کورد لە فڕۆکەخانەی ئیستەنبووڵ، تۆڕە کۆمەڵایەتییەکانی تەنی. گرتەڤیدیۆییەکە ڕۆژی 18-2-2024 بڵاوکرایەوە کە تێیدا کەسێک لە تەنیشت ژنەکە وەستاوە و باس لەوە دەکات کە بەهۆی ئەوەی ژنەکە زمانی تورکیی نەزانیوە، هیچ کەسێک بە هانایەوە نەچووە.
ئەمڕۆ دووشەممە، #19-2-2024،# پارێزگای ئیستەنبووڵ ڕاگەیێندراوێکی لەمبارەیەوە بڵاوکردەوە کە تێیدا هاتووە: ڕووداوەکە بەتەواوی هەڵەتێگەیشتنی تێدایە و دوورە لە ڕاستییەوە. ئەو ڤیدیۆیەی لەبارەی هاووڵاتییە بەساڵاچووەکەمانەوە بڵاوکراوەتەوە، بە مەبەست بووە. ئەمە پڕوپاگەندەیە لە دژی دەوڵەتمان.
ڕۆژی #17-2-2024# ژنە کوردە بەساڵاچووەکە لە فڕۆکەخانەی پارێزگای وانەوە بەرەو ئیستەنبووڵ گەشتیکردووە. کوڕەکەی لە فڕۆکەخانەی ئیستەنبووڵ چاوەڕێی کردووە. بەوتەی کوڕەکەی، ئەو ژنە بەهۆی ئەوەی زمانی تورکیی نەزانیوە، بێبەش کراوە لە خزمەتگوزارییەکانی فڕۆکەخانە و ماوەی دوو کاژێر و نیو نەیتوانیوە لە فڕۆکەخانە بڕواتە دەرەوە.
ئەمە لەکاتێکدایە پارێزگای ئیستەنبووڵ گرتەڤیدیۆییەکی بڵاوکردووەتەوە کە تێیدا کارمەندی فڕۆکەخانە بە عەرەبانە ئەو ژنە کوردە دەگوازنەوە. [1]