مەدرەسیە و نەوارە
کەلاسوو چواری ڕیازی بېنمێ
دوە یەرە ڕوێ جە ساڵەی تازێ دەرز وەنای نەوېیەردەبې، ئاردەی نەوارەی کاستێ پەی مەدرەسەی نیمچە قەتڵێ بې!
نازمێما بې بەنامې ئاغەی شەریفی کەتازە شارو (بابەکییەو) ئامابێ، پیەیوە سەختگیر و دڵپاک بې.
ڕوێ یۊ جە مەدرەسیەکا نوارێوە تازێ (شارام شب پەڕەی)ش ئاردێبېوە پەی مەدرەسەی و ڕاڕەو مەدرەسەینە کیسەشنە کەوتەرە.
دەم و دەس ئاغەی شریفی پېسە واشەی پېڎا بی، وەلێم ڕەحموو خوڎایەو دلې قەربالغیی زەنگوو تەفرێحینە نەزاناش کیسەو کینە کەوتێنەرە. پەرساش وەنەو سەعیدی کە هەر هینوو وێچش بې،
ئینێ هینوو کێنە؟
ئاڎیچ کەردشەو جواب؛ ئاغە هینوو هەرکەسی بۊ نامەکېش ئینا سەرشەو!
ئاغەی شەریفیچ ئیتر نقش نەکەرد هەتا ئاما سەرو کەلاسی، ئاکات بە دەنگی بەرز واتش: سەرگۆرەو کەلاسی کێن؟ منیچ هۆرساوە واتم : بەڵې ئاغە،
واتش شارامی شەب پەڕە کامشانە؟!
واتم ئاغە ئارۊ نامان! واتش هەرعانێ ئاما نازی بەی سەرو کەلاسی، بارەش پەی دەفتەری! واتم سەرو چەمی.
ئی قسێ کەوتە دەمو مەدرەسەیاو بېیە بە گەمەجاڕوو زاڕۆڵا.
چن ڕوېش پەنەشی ئاغەی شەریفی چڕیاش پەی دەفتەری و بەتووڕەییەو واتش: ڕەزا!
من چەمەڕا نەبېنې دروېم چەنی کەری!
منیچ واتم ئاغە دروەو چېشێ؟
واتش جەریانەکەو شارام شەب پەڕەی، ناقم چنیا و دڵنە واتم یۊ دانش پامەو، بە پرتە پرتێوە واتم: ئاغە مەر چېش بېیەن؟
واتش: من پەرسام وەنەو زاڕۆڵەکا واتشا ئێساڵ هەر چی مەدرەسەنە نامېش نەنویستېنە و لوان پەی دەبیرستانوو واعێزی!
هەناسەم ئاماوە وېرە و واتم ئاغە من ئەوڵ ڕۊ دیم ئەجیام هەڵای ئینا چی مەدرەسەنە.
واتش: ئەو خاستەر زاڕۆڵا مەردمی جەڕابەرێ.
جە ویرە وەریەکا ڕەزا عەتارانی.[1]