بەدوای شکستی حزبەکانی بزوتنەوەی کوردایەتی لە 16 ئۆکتۆبەردا و خولقاندنی کارەسات و کوشتارو ئاوارەیی، ڕۆژ لە داوی ڕۆژ دۆخی سیاسی کوردستان ئاڵۆزتر و نا ئارامتر دەبێت. هێزە شکستخواردوەکان، چ ئەوانەی دەسەڵاتدارن وچ ئەوانەشی بەموخالیف ونارازی لەدەسەڵات خۆیان دەناسێنن، دەوری ڕاستەخۆیان هەیە لە تێکدانی زیاتری ئەم دۆخە، تاڕادەی ئەوەی ‌ئامادەن لەپێناو هەستانەوەی لاسەنگی شکست و بنبەستە سیاسیەکانیاندا، ژیان و گوزەرانی خەڵکی بەره و مەترسی کێشمەکێش و شەری نیوانیان ڕاپێچ بکەن. ڕوداوەکانی شەوی29ی ئۆکتۆبەری ناو پەرلەمان و هێرش و پەلاماری بارەگای حزبەکان لە زاخۆ و تۆمەتبار کردنی یەکترو شەری میدیایی تا بەنگەشەی تۆلەکردنەوه لەیەکتری‌.. سەرەتای دەرکەوتنی شێوازێکی ترە لەشەری ناوخۆ، کە بێگومان لەئاکامی قوڵبوونەوەی زیاتریدا، نەک هەر دەبێته ‌مایەی نائارامکردنی هەرچی زیاتری ژیانی خەڵک، بەڵکو کوردستان بەره و دابەشبوون ولێکترازان وچەندەستەیی‌ دەبات.
ئه و هێزانەی شەوی ڕابردوو پەرلەمانیان کردە مەیدانی شەڕو هەرای نێوان خۆیان و لەمیداکانیانەوە بەرامبەر بەیەک ڕاوەستان، ئه و هێزانەن کەبەشێکیان شکستەکانی خۆیان بەگرتنەبەری سیاسەتی تەسلیمبوون بەهێزەکانی عێراق درێژە پێداوە، بەشەکەی تریشیان بەچاوپۆشیکردن لەکارەسات و تاوانەکان و ‌لەشکرکێشی عەبادی و وحکومەتی فاشیست- ئیسلامی و شۆڤێنستی عێراق بۆسەر کوردستان بۆ گێڕانەوەی خەلکی کوردستان بۆ ژیرسایەی دەسەڵات ودەستورە قەومی و ئیسلامیەکەی، دەیەوێ پایەی حکومەتی ڕزگاری نیشتمانییەکەی دابمەزرێنێ! ئیستاش هەردولایان دەیانەوێت خۆیان لەبەرپرسیارێتی و شکستەکان بدزنەوه و بەهەڵخراندنی کەشوهەوای پشێوی خەبات ونارەزایەتی ڕەوای جەماوەر بۆ نان و ئازادی بخنکێنن و کۆمەڵگاش بەره و هەڵدێرو لێکترازانی زیاتر بەرن. بەمجۆرەش شەڕو ململانێی ئەم هیزە کۆنەپەرستانه و ئاکامەکانی بۆسەر ژیانی خەڵک مەحکومە و دەبێ لەلایەن جەماوەر وخەلکی ئازادیخوازە‌وە وەڵامی شایستەی پێبدرێتەوە.
بێگومان لەدۆخێکی وەک ئیستادا، توڕەیی و بێزاری و نارەزایەتی بەرفراوانی جەماوەری کوردستان وهاتنە مەیدانیان لەبەرامبەر ئەم پاشەکشە ڕیسواو ڕەزیلایەنەی حزبە دەسەڵاتدرەکان و ملکەچ بوونیان بۆ حکومەتی عێراق و ئێران، حالەت و کردەیەکی نەک هەر ڕەواو بەرهەقه، بەڵکو پێویستە تاسەر ئاستی ڕاپەڕینێکی شۆڕشگێرانە هەڵکشێ. دەستکۆتاکردنی دەسەلاتی ئەم حزبانە و هێنانەکایەی دەسەڵاتدارێتی جەماوەری لەکوردستانێکی ئازادو سەربەخۆدا لەڕێگای خەباتێکی سیاسی یەکگرتوو ڕێکخراو وئازادیخوازنەوە بەکردەوە بگرێتەبەر‌. لەم پێناوەشدا پێویستە خەڵکی ناڕازی کوردستان لە هەموکات زیاتر هوشیارانە ڕاوەستن وڕێگانەدەن بەهیچ لایەن و دەستەو تاقمێک یاری بە چارەنوسی خۆیان و نارەزیەتیەکانیانەوە‌ بکەن‌. پێویستە ڕیزی سەربەخۆی خەباتی جەماوەریان بپارێزن و تێکەڵ بە نەخشەو سیاسەتی هیچ لایەنێکی دەسەڵاتدارو ئەو هەلپەرستانە نەبن کە بەرژەوەندیەکانی جەماوەری کوردستان دەکەنە قوربانی نەخشەو سیاسەتەکانی خۆیان. بەتایبەتیش لەئێستادا کە‌بارگرژی وکێشەی نیوان‌ کۆنەپەرستان هەڵگیرسانی شەری ناوخۆ و لێکترزانی کۆمەلایەتی کردۆتە ئەگەرێک، دەبێ بەرەی ئازادیخواز وخەلکی توڕه و نارازی بەرووی ئەم هێزانەدا بیتەمەیدانەوە وڕیگانەدەن کوردستان بۆلێواری دابەشبوون ولیکترازانی کۆمەڵایەتی بەرن وئامانجە گلاوەکانی دەولەتی عیراق و ئیران بەسەر خەڵکی کوردستاندا بسەپێنن.
#حزبی کۆمۆنیستی کرێکاریی کوردستان# بانگەوازی هەموو دەستەو کەسایەتی و هەڵسوڕاوانی چەپ و ئازادیخوازوهەر لایەنیک دەکات کەخۆی بەبەرپرس دەزانێ بەرامبەر بە ژیان و مەدەنیەتی کۆمەلگا، بۆئەوەی لە بەرەیەکدا ‌دژی ئەم دۆخە کۆبینەوە بەمەبەستی وەگەڕخستنی فشارێکی کۆمەلایەتی بۆسەر ئه و هیزانه و ناچارکردنیان بەدەستهەلگرتن ‌لەشەڕو ململانێی کۆنەپەرستانه و دورخستنەوەی ئەگەری هەلایسانی شەری ناوخۆ.
حزبی کۆمۆنیستی کرێکاریی کوردستان
30-10-2017