دەقی پەیامەکەی د. #هەڤاڵ ئەبوبەکر# پارێزگاری #سلێمانی#...
هاوڵاتیانی خۆشەویست..
‎وەک هەمیشە؛ پشتیوانیی لەداوا ڕەواکانی خەڵکی کوردستان و داکۆکیی لەچارەسەرکردنی قەیران و کێشە کەڵەکەبوو تاقەتپڕوکێن و درێژخایەنەکان و ئازادیی ڕادەربڕین و مێدیاو چالاکیی و ناڕەزایەتیدەربڕین و خۆپیشاندانی هێمنانه و مەدەنیانه و دورکەوتنەوە لەبەریەککەوتن و توندوتیژیی و پێداگریی لەتەجریمکردنی شەڕی یەکتریی و تەحریمکردنی یەکترسڕینەوە؛ دەکەین.
‎دەستبردن بۆ شکۆو ژیان و ژینگه و کارو کەسابەت و بژێویی و موچه و کاسه و گیرفان و دەرەتانی هاوڵاتیان؛ بەناڕەوا دەزانین.
‎متمانه و دەنگ و ڕەنگ و پشتیوانیی ئێوەی جوامێر؛ ئەرک و بەرپرسیارێتیی ئێمەی لەگۆشەی هێزێکی سیاسییەوە بۆ پانتایی حکومڕانیی شیاوو ئیدارەدانی پارێزگایەکی زیندوو گۆڕیوە، دانەبڕاوو بەردەوام و جەسورو مکوڕو شێرگیرانە؛ هەموو توانستەکانمان بۆ خزمەتکردن تەرخانکردوە، لەم دۆخە ئاڵۆزو ناجێگیرو پڕ لەنەخۆشیی و ناخۆشیی و کۆرۆناو قەیران و کێشانەدا؛ بەپشتیوانیی هەموتان مۆدێلێکی مەدەنیانەی خزمەتگوزارانەی حکومڕانیمان بنیاتناوە.
‎ڕاست و ڕەوا؛ لەگەڵ ئازادیی مێدیاو ڕادەربڕین و ڕاگەیاندنین، دژی هەر سانسۆرو ڕێگریی و ئاستەنگێکی بەدەر لەیاسای بەردەم کارو پەیام و پەخشی هەر مێدیایەکی بەرپرسیارین بەکەناڵیNRTو ئەوانی تریشەوە.
‎هەموو هەوڵەکانی ئێمە بۆچەسپاندنی سەقامگیریی و هاووڵاتیی سەنتەریی و گێڕانەوەی متمانەیە بۆ دامەزراوەکانی دەوڵەت، ئەرکمان ڕێزگرتن و پاراستن و بەرگریکردنە لەهەموو هاوڵاتیان بەهەموو جیاوازییەکانیانەوە.
‎دژی بەکارهێنانی چەک و توندوتیژیین لەهەرکەس و لایەن و هێزێکەوە بێت، داوا لەهەموو هێزە دەوڵەتییەکانیش دەکەین؛ خۆیان لەهەر ڕوبەڕوبونەوه و بەریەککەوتن و توندوتیژییەک؛ بەدوربگرن.
‎دۆخی سەختی سیاسیی و حکومڕانیی و ئابوریی و دارایی و تەندروستیی و کۆمەڵایەتیی وڵاتەکەمان؛ پێویستی بەلێکتێگەیشتن و بەیەکگەیشتن و کاری هاوبەش و یەکڕیزیی میللەتەکەمان هەیە، پێویستی بەگیانی بەرزی لێبوردن و بەیەکەوەهەڵکردن و بەیەکەوەڕێکردن و هاوئامانجیی و یەکترقبوڵکردن و دیالۆگ و هەڵگرتنی بەرپرسیارێتیی قۆناغەکە هەیە.
‎دەخوازین هەمومان خۆنەویستانە لەهەوڵی شیاوانەی بەدیهێنانی داواو خواست و ئامانجە گشتیی و نیشتمانییەکانماندابین.
پارێزگاری سلێمانی