قوماش 9
نووسینی: #ئوسامە جەمیل عەلی#

لەگەر دەنگی داکم بە خەبەر هاتم، گازی دەکردم و دەیگۆ: هەستە کوڕم نوێژەکەی بکە، هەتا نەچووە! هەستام و بڕەکی لە سەر جێی دانیشتم و داڵغەکم لێدا، دوایێ چوومە دەرێ، هەر لەبەر بەلوعەکەی حەوشێ دەستنوێژم شووشت، دووگردەکەم ڕاهێخست و نوێژی مەغریبێم کرد، هەتا ئەمن لێبوومەوە سەماوەر دەستی بە گیزەگیزێ کرد، بابم دانیشتبوو بە دەنگەکی نزم قورعانی دەخیند، چوومە سەر دۆشەکەکی تەنیشتی و بە کزی دانیشتم، بابم بەینەکی بێدەنگ بوو، دوایێ گۆتی: ڕۆرە کوی؟ گۆتم: باشم ئەلحەمدولیللا، وا دەڕوا! گۆتی: هەست بە خەمت دەکەم کوڕم، در لە دری مەدە، ئەگەر هەتا دوو ڕۆژی دی دەنگیان نەبوو، بەخۆم دەچمە دائیرەی ئاوێ و لەگەر قادرە فەندی قسەی دەکەم! گۆتم: دەبی؟ گۆتی: لۆ نابی کوڕم، خۆ ناچم دزی بکەم، دەرێم کاکە حار و حساب ئەوهایە و دوو قسەم لە مستی بنێ! داکم گۆتی: وەڵلا ئەوە باشترین چشتە ئەتوو دەیکەی، بەران دوو سێ ڕۆژی دیش با چاوەڕێ بکەین، گۆتم: یەعنی واز لە مەوزوعی قووماشەکەی بینین! بابم گۆتی: قوماشی چ ڕۆرە؟ گۆتم: وەڵلا بابە ئەوڕۆ پێشی عەسرێ ژنەک هاتبووە مارێ قادر قرپەستوری و گۆتبوویە پلکە زەکیەی بەو مارەی جیرانتان برێ: ئەو قووماشەی هینابوویانە کنەمە دووریتمان و با بێن بیبەنەوە! ئەمن وەکی ناوی قادرم هینا بابم سەر و دری گیرا، دیاربوو ژانی پێلەقەکەی بە بیر هاتەوە، بەران گۆتی: وەڵلاهی ئەمن وای لۆ دەچم ئەو ژنە لە تەرەفی ماری قادرە فەندی هاتبی، باشە نەیگۆ ژنەکی کوو بوو؟ گۆتم: وەڵلا برێم کوو بوو، زەکیە دەرێ ژنەکی ژنانەبوو! بابم سەرەکی بادا و گۆتی: یاڕەبی خوایە زۆر شوکر، کوو ڕدێنم کەتیتە دەست قادر و زەکیەی! داکم چایەکی لە پێش بابم دانا و پێکەنینەکی کرد و گۆتیە بابم: بریا هەر ڕدێن بایە پیرەمێرد! بابم چ دەنگی نەکرد، بە بێدەنگی دەستی دا مراکی و خۆی بە چایە تێدانێ مەشغول کرد!
یەک مانگی ڕەبەقمان قەپات کرد و هیچ دەنگ و سەدا نەبوو، ئەمن چاوم بە هەر پارچە قووماشەکی بکەتبا هەورینم بەبیر دەهاتەوە، خۆم پێ ڕانەگیرا و چوومە کن پلکە زەکیەی: گۆتم: خێرت دەگاتێ، تێمبگەینە ئەو ژنەی هات باسی قووماش دوورینی کرد ژنەکی کوو بوو؟ زەکیە بەینەکی تەماشای کردم، ئەوجە جغارەکی سۆمەری دەرینا و بە لالێوی وەنا و بە شقاتەکی پاکستانی پێی کرد و گۆتی: چ ئیشت بەو ژنەیە سەر لووس، ئەمن ئەتوو بناسم چشتەکت لە بن سەریە! گۆتم: وەختی هەندێ نیە، بەس توخوا پێم برێ ژنەکە چیگۆ و چینەگۆ؟ زەکیە چارێگەک قسەی لۆ کردم وەکی ئەوەی وا بوو قوڕی بشێلی، چونکە نەمتانی هیچی لێ هەرکڕێنم، هەستام بە جێم هێشت، هەر گەیشتمەوە حەوشێ، زەکیە لەگە من گەیشتە ماری مە، گۆتی: کا داکت سەر لووس؟ گۆتم: وا لە ناندینیە، گۆتی: دە هێوەڕو با بچم وەخەبەرەکی بکەوم سەر لووس! گۆتم: ئەگە سەریشم لووس بی، وەکی ئی مندارەکانی توو پڕی کێچ و ئەسپێ نیە! زەکیە لێم گەڕاوە و گۆتی: وەرە بمخۆ وەرە، زمانی چەند درێژە، دەرێی ک...رە سەیە! گۆتم: وەڵلاهی بچمە دەرێ لە هەمووی باشترە!
چوومە دەرێ و هەتا پاش عیشایێ نەهاتمەوە مارێ، وەکی چوومەوە داکم و بابم بە مشەوەشی لە پێش دەرکەی ڕاوەستابوون، چاویان بە من کەت، گۆتیان: کورە کوڕم ئەو زروفە ئی هەندێیە ئەتوو پاش عیشایێ بێیەوە، چەند جارم پێ گۆتی: لەگە مەلای مەغریبێ لە مارێ دەبی، کورە کوڕم تاقەتی گرتن و بردنی دائیرەی ئەمن و دەست ماچ کردنانم نیە، بکە لە ڕاهی خوای چیدی شەوێ تاخیر مەبە، گۆتم: ئەنگۆ نازانن ئەمن درم چەند بەخەمە، وەڵلاهی وەم لێهاتیە بە ئاقاری کەوم! داکم و بابم زۆر زگیان بە من سووتا و گۆتیان جارێ با بچینە ژۆرێ! چووینە ژۆرێ و بابم دەرکەی حەوشێی کلیل دا و ئەوجە گۆتی: وەعدبی سبەینێ بچمە کن قادرە فەندی، ئەوجە هەرچی دەبی، با ببی!

مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!