پایتەختە وەشەکەو جارانو ئېراقی، پایتەختو دەسەڵاتو عەباسیەکا پەی سەڎەها ساڵا. پاسە باسکەران کە فرەو گۆرەو وەڵاتە عەرەبیەکاو ناوچەییەکا ئاواتشان پەنە واستەن. بەڵام ئیسە ڕەونەقو جارانیش نەمەنەن و ئارامی و ئاوەڎانی و گېڵای شەوانەش وەنە بڕیان.
شارو بەغڎای کاریگەریش سەرو بەشێ فرەو جە شاعېرەکاوە بیەن و نامېش جە دیوانە شېعرەکاشانە و دلۍ شېعرەکاشانە ئامێنە
حاجی قادری کۆیی جە شېعرێنە نامۍ(بەغڎا)ی مارۊن:
کە دوونێ هاتی فەرمووت بێ و نەهاتم، مەسڵەحەت وابوو
ئەوێستە چاوەکەی من چی دەفەرمووی؟ بەندە فەرمانم
ئەگەر (بەغدا) شکا سەددی نەما داری لەسەر بەردی
لە دیجلەی ناگرن حاجی دیارە جۆشی گریانم
میرزا ئۆلقاڎرو پاوەی جە تاریفدای دوسێشەنە فرە زەریف ماچۊ:
عەقرەبان سەف سەف چنووران چین چین
کەردەن وە پەرچین دایەرەی جەمین
گیسوو چوون کەمەند قەترانی زەنگی
چوون حەڵقەی ئەرقەم ئەژدەهای جەنگی
سەر ها وە سەروین (بەغدا) شارەوە
پیشانی بەو سەیف هندی کارەوە
دوو عەینی مەخموور ڕشتەی ئیلاهی
هۊرچەرخنای عەین شابازی شاهی
بەڵام جە گردی زەریفتەرو وەشتەر مەولەوی شاعېرەن، مەولەوی ئارەزوو دیڎاری دوسێ وەشەویسیش مەکەرۊن کە جە شارو بەغڎای نیشتەجان. مەولەوی دەروونو وېش کە پەڕەن جە خەمو خەفەت پەی دوسەکەیش، وېنامەکەرۊن بە(دیجلە)ی کە شاروو بەغڎایرە مەویەرۊن، وەرو ئانەی دیجلەو دەروونیش توغیان نەکەرۊن چواردەورو چەماشەرە بە خاروخاشاک سەد بەسۊن
وە خارو خاشاک مووژەی چەسپیدە
سەد بەستەن نە دەور سەرچەمەی دیدە
وەرنە دیجلەی غەم توغیان کەردەبۍ
تا ئیسە چن جار بەغڎاش بەردەبۍ.