داستانو حەیدەری و سنۊبەرۍ
بەشۍ ششەمە
حەیدەر فەرمانو هېرشیش دان، گرڎیاگێ و هەرچوارلاوە پەلاماردایەن، بەڵام پەی نەگبەتی حەیدەری، لەشکر فرە پژگیا، کەس هاگاش جە کەسی نەمەن، حەیدەر ڕاش گومەکەردە، جە لەشکەری بریا. شەو تا سەحەر بەبۍخورد و خاو مەگېڵان، هیلاک، تەژنە. لاڵیاوە زاتو هەقی بەشکم دەلیلێش پەی بکیانۊ و ڕاش نیشانە بڎۊن.
وەقتی نمای شام، بڕیا جە لەشکەر
غەمگین و غەمبار، عاجز و موزتەر
مەگېڵا ئەو شەو، تا بە سوب سەحەر
تا، خورشید، نەبورج مەشرق، کېشا سەر
زۊر ئاوەرد بە ئەسپ، تا وە نیمەڕۊ
تەی مەکەرد غەمگین، سەحرا و کەش و کۊ
جە تاوی گڕیای شەرارەی سەبوون
وەخت بۍ، جە سەر ئەسپ ببۊ سەرنگوون
بە گۊنا و ڕۊخسار، زوڵفش مەنیشت گەرد
موحتاج بی، پەرێی قەترەی ئاوی سەرد
نە تاقەت، بە ئەسپ گرانمایە مەند
حەیدەر تەشنەگیی، تەمام گیانش سەند
نە قەوم بی، جە لاش، نە ئەتباع، نە کەس
سیوای زاتی وېش، فەردی فەریاد ڕەس
ڕوو کەرد نە بارگەی، بەرزە دیاری
مەگرەوا، بە زار، جە بۍ قەراری
واتش: یا کەریم، کەرەم بۍ شمار
یا، دانای سڕپۊش، واحیدولقەههار
یا، زاتی بۍ میسل، پادشای شاهان
یا، ڕاهنمای خەیر، گومکەردە ڕاهان
یا ڕەب بە حاجەت، نام و ئیسمی زات
بەو نووری لەقای، یەکتای بۍ هەمتات
بە عەرشی عەزیم، موقەڕڕیبات
بە تەوحیدی پاک، مەلائیکانت
بە میعراجی خاس ڕەسووڵی سەروەر
شافیعی عوسیان، ڕووی دەشتی مەحشەر
بە شەوق و ئیخلاس، ئیمامانی دین
بە کەعبەی شەریف، یەکجار نازەنین
بە شەوقی دەروون، حاجیانی پاک
بە ئاهو ناڵەی، ئەسیرانی خاک
بە سوزی سینەی، بدعەتلبەتوول
ئیستیدعای بەندەت، بکەرە قبووڵ
دەلیلێ، خەیرێ، بکیانە جە سەر
هامڕاهێ بدات ئی بەندەی کەمتەر.[1]