دیباچەی کیتاب نادرەی شیرین
وەی تەور بەیان کەرد جە نۆش ئافەرین
سەحەر فەراشان خان سپای زەنگ
هۆر پێچا تەناف خەیمەی سیا ڕەنگ
بێدار بی جە خاو شای شیرین چارە
باڵ چەم هۆرداشت بە لەنجە و لارە
هۆرێزا بەناز باز شیروانی
پۆشان وە بەدەن دیبای کەیانی
دایە وات ئەی شۆخ نازدار بێگەرد
حەرفێ مەپەرسوو جە لات نەبۆ دەرد
ئەو کەسە کێ بی ئیمشەو هامڕازت
تەکیە کەردەبێ دوو بازووی نازت
یە ڕەفتار نییەن گرتەنت نە سەر
ئەگەر بزانۆ پادشای سەروەر
مەکەرۆ وە پەند ڕووی ڕۆزگارم
گوربە مەوزۆ نەتۆی شەڵوارم
ساکە ئێد شنەفت شۆخ سیا خاڵ
دەست بەرد پەی گەردەن زوجاجەی زڵاڵ
بەرئاوەرد لەعل قیمەت پڕ مایە
نە ڕووی ئیلتیفات بەخشا بە دایە
دایە خۆشحاڵ بی دانە گرت بە دەست
جە گفتوگۆی بەد زمان وێش بەست
واتش بە دایە ئەی غەمگوسارم
بویەر جە تەقسیر، خەجاڵەتبارم
خاترت جەم بۆ کار وە ی تەور نییەن
بەی دەستوور ڕازمان مەعلوومت بییەن
دایە ساکین بی جە وەسواسەی بەد
جە کار دوڵبەر خاترش جەم کەرد
تا ئینە واتن شەو ئاما بەکار
سەرزەمین پۆشا پەردەی سیا تار
فەرما مەشعەلان کەردشان ڕەوشەن
بە شاد بەردشان پەی باغ گوڵشەن
شەمع خۆش تەرکیب شەمدان بەمووری
مەشعەل وە لەعل دانەی فەغفووری
پایە وە پایە تەرتیب بەردشان
پەی زەوق مەجلیس ڕەوشەن کەردشان
ساقی موترێبان حازر بین تەمام
سوراحیی پڕ مەی عوود و بادەی جام
موهەیا بە زەوق کەردەن ئامادە
چەم نە ڕاگە بین پەرێ شازادە
#خانای قوبادی# [1]