داستانۊ حەیدەری و سنۊبەرۍ
بەشۍ پەنجاهەمە
وۍ ئاماڎەکەردەی زەمای بەڎخووی بەڎکاری، پەی شەوەو پەردەی و یاوای بە سنۊبەرۍ، لوایش پەی حەمامی و لوای پېوایشۆ:
بشین وە سەر وەخت، زادەی بەڎگەوهەر
زشت و ناهەموار، وەیشوومەی وەیشەر
بەڎ لەهجەی بەڎ زات، بەڎ نابەکارێ
بەڎ خووی بەڎ کردار، سېیا چنارێ
سوار بی، بە ئەسپ، مەرسەعی لەجام
بە عېززی شاهیی، لوا بە حەمام
جاڕچی جاڕ کېشا، تەمامی خاس و عام
گرد حازر ببان، نە دەرگای حەمام
سوارشان کەرد و بە عېززی شاهیی
بېخەبەر، جە کار، کەردەی ئیلاهی
سەنج و گەبرگە، دەهۊڵ چەنی ساز
پېشا پېشی ڕووش، مەنوازان بە ناز
ناڵەی موتریبان، کززەی مووکەشان
مەوېیەرد نە چەرخی سەما و کەهکەشان
نا غافڵ، جە دەور چەرخی لاجیوەرد
زاوا بە دڵشاڎ، نە مېڎان وېیەرد
ئامان، بە ڕاگەش دوو هەرزەکارێ
دوو بەڎ عەقڵ و هۊش، دوو بەڎکردارێ
دوو نەرگس جوانێ، دوو حاڵ نەزانێ
دوو وەحشی سەرمەست، دوو نەوجوانێ
یەکێ وات، بەو یەک، بڎیە بە گوناش
شاڎەن، وە پاشخوان، خەڵکی قزڵباش
ئەم ساڵ، جە ئێران، جەرگەی ئێرانی
تەمام ئاواییش کەردەن وېرانی
زاوا چوون ئەژنیش، شی نە جامەی قین
وەخت بین نە ڕووی ئەسپ، بگنۊ وە زەمین
وات: ئینە بە من، مەواچان نامەرد
دایېم، ڕېسوا بۊ، منش ڕېسوا کەرد
[1]