داستانۊ حەیدەری و سنۊبەرۍ
بەشۍ پەنجاو ششەمە
دمای مۊچیاریەکا ژەنەپېرەکۍ پەی سنۊبەرۍ، وەختێ هانیشدا بلۊنە خزمەتو قەزەنفەری، سنۊبەرە واتش: ئانە چ قسېنۍ کەریشان، چ عادەتێن وەیوە پەی لاو زەمای بلۊ:
سنۊبەر ئەژنی، لەرزا جە هەیبەت
واتش بە دایە: ئەی پیری نەگبەت
عەجەب پەندێ خاس، پەرېم ئاوەردی
دڵم وە ئەڵماس بڕان، پەی کەردی
جە دەورەی ئاڎەم، هەتا بە ئی دەم
کەی قانوون بېیەن، جە نەسڵی ئاڎەم
وەیوە، بلاڵۊ، پەی کام، جە داماد
کەی قانوون بېیەن، جە ئادەمیزاد
مەبۊ کە زەما، کەرۊ ئېلتماس
بەیۊ، هەر وەناز، غەمزەی بېقیاس
وەڕووی نازەوە، وەیوۍ کەرۊ ڕام
ئەوسا، بە دڵواز، بېیاوان وە کام
پەی بۍ، نەشاران، ئېدەش نەکەردەن
من بشوو، ۋزووش، دەسش نە گەردەن
پەی چی قەت نەبۊ، دەستم بە شمشېر
بە ڕووبا بدەم، من ئی لوقمەی شېر
زووانم، بە تېخ پارە پارە بۊ
تەنم ئاوېزان، پای قەنارە بۊ
درېخ بکەردان، ئارۊ کۊتەڵکۊم
بەڵام ئی نائەهل نەبیایا وە شووم
من عارم مەیۊ، واچوو، یە شوومەن
هەر وەخت مەوینووم من ئاخ و تۊمەن
بشۊ، یاگەی وېت، مەدەر ئازارم
ئازارم فرەن، گرانەن بارم
بابۊم خجڵ بۊ، چەنی کاری وېش
من وست نە تۊڕدام، ئەی زشتی بەڎکېش
[1]