جەودەمدا بەنی ئومەییەم کەرد یاد
هەی دام بەسەردا هەی کەردم فەریاد
ڕەسووڵی بەی تەور ساحێب عیززەت بۆ
عیززەتش هەردەم فەخر میللەت بۆ
کۆگای کەرەم بۆ ڕوتبەش ڕەفیع بۆ
پەی ئوممەت وێش هەردەم شەفیع بۆ
وەی تەور جەسارەت بێ ئەدەبیشان
بێدادی نە حەق ئال نەبیشان
حەیف نەبی کەردن پەی جیفەی دنیا
خەتای خانەدان خیتامەت پەنا؟
ناز کەن مادە مەکەر حیکایەت
جە ڕەمز حیکمەت مەکەر شیکایەت
«فەقێ» یە وەعدەی قورب ویسالەن
وەسڵ ئەحمەد و شای «ذوالجلال» ەن
تۆ خۆ مەزانی ئەحواڵت چوونەن؟!
پەی وەسڵ سەحرا دەروونت خوونەن
ئەر بەیۆ یەکێ تۆ کەرۆ ئازاد
چەند مەمنوون مەبی چەند مەبی دڵشاد
تۆ پەی وەسڵ یار فانی وەی تەوری
وەی تەور نە عەزاب مەعرەکە و جەوری
خاسە ئەو پەی وەسڵ زات قەدیمەن
قائیم و دائیم حەی و عەلیمەن
یەک ئانش لەززەت سەد ساڵەی جەننەت
بێ شک مەبەخشۆ بێ موزد و میننەت
سا دەی کۆتا کەر حیکایەی کەلام
ڕەوان بۆ نەبی «عليه السلام»
یاڕەب بە میقدار دنیا و «ما فيها»
دروود بەر موحەممەد نەبییی هودا
سا چون موحەممەد ڕاهی بی نە فەرش
شی پەی ئەندەروون مەقامات عەرش
جەبەرووت چەنی ناسووت و لاهووت
پەردەی حیجابات هەم جای مەلەکووت
هەم عەرش و کورسی هەم لەوح و قەلەم
سەیر کەرد سەراسەر «صاحب العلم»
گەنجینەی ئەسرار ڕەمز مەقامات
مەکشووف بی پەرێش پەردەی حیجابات
ئەوسا کەرد ویداع جە موقەڕڕەبان
ڕوو کەرد نە ڕەفڕەف پایەی نەردەبان
ڕاهی بی نەو جا «سيد الانام»
شی پەی فەوق عەرش بێ سەبر و ئارام
هەوا سەند جە عەرش بە بێ واسیتە
خاریج بی جە خەت جیهات سیتتە
لابی جە مەکان مەکانش بی لا
پەی بێچوون جوستش نە چوون تەوەللا
#فەقێ قادری هەمەوەند# [1]