باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و وېس و دوەمە
میزا ئۆلقاڎرو پاوەی، ئەچی بەشەنە باس جە چا سەروەختەی کەرۊن کە مەگنۊ سەرەتاو بەرکەوتەی هامسەرگیری مېیانو(محەمەد و خەدیجە)ی، وەختێ کاروان گېڵاوە، کەسە نزیکەکېشا تەڵەبشان وەنەکەردۍ کە هامسەرگیری کەران.
یەک عەورەتێ بۍ نەفیسە نامێ
زەعیفەی مەزبووت، شیرین کەلامێ
زەعیفە عاقڵ، ساحیب کەماڵ بۍ
حەکیمی زەنان، حاڵزانی حاڵ بۍ
خەدیجە، پەنا، بەو زەعیفە بەرد
ئیزهار، مافی زەمیری وېش کەرد
نەفیسە، وە زات، خوڎا، سەوگەند وەرد
پەی مەواسەلەت، حەزرەت عەهدش کەرد
تا، شیی وە خدمەت، شای (بەتحا) یانە
عەرزی خدمەت کەرد، بە مەحرەمانە
واتش: خەدیجە، بە تۊ مەفتوونەن
جە فیراقی تۊ، جەرگش پەڕ هوونەن
باڵی مەرحەمەت، بکېشەش وە سەر
نیحکاحش بکەر، وە ئەمری داوەر
قەومی قوڕەیش گرد، تەڵەب کارشەن
ئەهلی سەنادید، گرد داغدارشەن
کەس وە جفتی وېش، قابل نەزانان
زی بەشەر، بە وېش، مەحرەم نەوانان
حەزرەت، فەرماوا، ئەر حەقق ڕەزاش بۊ
ڕەزام، وە قودرەت، هەرچی قەزاش بۊ
نەفیسە، زانا، حەزرەت، ڕازییەن
ڕاغیب، وە تەزویج فیتوای قازییەن
دا، وە خەدیجە، موژدەی بەشارەت
خەدیجە، خەرمان خەم دا، بە غارەت.[1]