$لە (گۆران و ڕەفیق چالاک و تۆفیق وەهبی)یەوە بۆ پەرواز حوسێن$
#ئیدریس مستەفا#
بۆ زەڕڕەیەک گلەیی ناکەم لە ئیسلامیەکانی کوردستان کە هەمیشە پشتیوانی خۆیان بۆ ئیسلامیەکانی تری ناوچەکە دەرببڕن و دەست خۆشی لە ئەردۆگان بکەن لە قەتڵ و عامی کورددا، چونکە ناسنامە و بوونی خۆیان بە ئاشکرا بەیان کردووە کە دژە کوردن و تەواو، نوقتە لەسەر دێڕ. بەڵام ئەوەی بۆ من و زۆرێک لە خەڵکی تری کوردستان ئەوەیە کە ئەم جاش کلتووری و بێ ئاوەزیە بچێتە نێو کەسانی هونەری و نێوەندی ڕۆشنبیریەوە لە ئێستادا و بۆ ئەم نەوەیەی ئێستا. کچێکی گۆرانی بێژ کە ناوی پەرواز حسێنە ئاڵای فەڵەستین لە ملی خۆی بپێچی و هاوسۆزی و پشتیوانی خۆی بۆ ئیسلامیەکانی فەڵەستین دەرببڕێ کە هەڵوێستی هەبێ و نەبێ بە سفر حساب دەکرێت لەوێ بەڵام بۆ ئێمە جێگە دەگرێ و دەبێ هەڵوێستەیەکی لێ بکەین. هەمووان دەزانین ئەو کچە بەهۆی کوردبوونیەوە لە عارەب ئایدڵ ناوبانگێکی باشی دەرکرد و کوردیشی باش ناساند بە جیهانی عەرەبی و ئەمە ڕاستیە دەبێ بوترێ، بەڵام پرسیارەکە ئەوەیە پەرواز بۆ ئەمە دەکات.
بێ ئاگایی و نەزانی لە کێشەی فەڵەستین و دەوڵەتی ئیسرائیل و ئەو بێ مێشکیەی ڕەگێکی مێژوویی هەیە وا لەو کچە دەکات ئەو کارە قێزەوەنە بکات و واشدەزانێ شتێکی باشی کردووە بەڵام نازانێ دەبێتە شەرمێکی مێژوو بۆ خۆی و بۆ هونەرەکەی و بۆ میللەتەکەشی. ساڵی جارێ دوو جار ئیسلامیە تیرۆرستەکانی فەڵەستین بەزمێک درووست دەکەن تاکو نانێکی چەوری لەو هەڵایەی درووستی دەکەن بخۆن و هەروەها سوودێکی سیاسی نێوخۆیی هەیە کە دەیانەوێ دووبارە لە ڕێگەی هەست و سۆزی نیشتمانی و ئایینیەوە خەڵک لە دەوری خۆیان کۆبکەنەوە. بۆ حکومەتە یەک لە دوای یەکەکانی ئیسرائیلیش وەها بووە. دووبارە نیشاندانەوەی هێز و بازووی سەربازی دەوڵەتی ئیسرائیل و تەغزیە کردنەوەی هێزی نێوخۆی کۆمەڵگەی ئیسرائیلی. لەم میانەیەدا لایەنگیری بێ مێشکی نەتەوەکانی تر دەردەکەوێ بۆ ئیسلامی سیاسی وەک لەنێو کورددا هەیە و لێرەدا من باسی نوخبەی هونەری و ڕۆشنبیری دەکەم کە بەشێکی سەرەکین لەو بێ عەقڵیەدا.
ئەو بێ مێشکیەی پەرواز حسێن ئێستا دەیکات ڕەگەکەی بۆ باووباپیران دەگەڕێتەوە. لە ساڵانی جەنگی دووەمی جیهانیدا گۆرانی شاعیر و ڕەفیق چالاک و تۆفیق وەهبی چوو بوون بۆ فەڵەستین و لە ڕادیۆی قودس بە خۆبەخش کاریان دەکرد بۆ فەڵەستینیەکان دژ بە جوولەکە و درووستبوونی وڵاتی ئیسرائیل و بە شانازیەوە نامەیان دەناردەوە بۆ هاوڕۆشنبیرانیان لە کوردستان لەوانە پیرەمێرد لە سلێمانی گوایە ئیمام و خەتیبی قودس خۆی سەردانی کردن و سوپاسی کردوون. ئەمە لە کاتێکدا کورد لە ئێڕاق و سووریا دەربەدەر و تەعریب دەکران و دەکوژران. هەر ئەو نامانە و ئەو عەقڵانە بوون کە کوردانی جوولەکە ئایینزاکانیان لە کوردستان دەرپەڕاند لە وڵات. کوشتن و داگیرکرنی موڵک و ماڵی جوولەکەکان وتەنانەت هەڵدانەوەی گۆڕەکانیان لە کوردستان بە تایبەت لە سلێمانی بەرهەمی ئەو بێ عەقڵی و جاش کلتووری و بیری فاشی قەومی ئاری هیتلەری و فیتی عەرەبیە ئیسلامیە بوو کە ئێستاش لە ناو میللەتی ئێمەدا بوونی هەیە. ئەو شەکر شکاندنەی کە ئێستا کچە گۆرانی بێژێکی کوردی وەک پەروازخان دەیکات ئەوە لە گۆران و ڕەفیق چالاک و تۆفیق وەهبیەوە بۆی ماوەتەوە. بێ مێشکی لە کورد نابڕێت! [1]
Questo articolo è stato scritto in (کوردیی ناوەڕاست) lingua, fare clic sull'icona
![](https://www.kurdipedia.org/images/flags/ku.png)
per aprire l'articolo in lingua originale!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
Questo oggetto è stato visto volte 595
Scrivi il tuo commento su questo articolo!