#وەلی دېوانە#
یاران مەجنۇنم، یاران مەجنۇنم
دېوانە و واریس قەومی مەجنۇنم
ئاخکېشی زۊخنۆش، زام نە دەرۇنم
وېنەی مەجنۇن وېڵ، ئاوارەی تۇنم
ئەوڕۆکە مەجنۇن زۊخی زام قنیات
جورعەی ئەجەل چەشت، شی نە ڕۊی مەمات
من کەرد بە وارس، خاس و کەستی وېش
گشت وە من سپەرد، هەرچی ئاما پېش
خەم چەنی هېجران، پەژارە و خەیاڵ
ئاخ و داخ و دەرد، دڵگیری، مەلاڵ
وېڵی و چۊڵگەردی سەرگەردانی سەر
سەودا و سېیاسەت یەک جە یەک بەدتەر
بېخوردی ڕۊوان، بېخاوی شەوان
ڕەفیق زومرەیی دەری سەر کۊوان
شین و واوەیلا زامی پەڕ نە سۊ
فەریاد نەبەردا، ئېشی کۊنە و نۊ
یەک یەک جەم کەردم تەمام سەراسەر
ئه و وە هۇنی دڵ، نویشت وە دەفتەر
وات من مەجنۇنم، تۊ دېوانە بە
هامڕای وەحشییان بېدېیانە بە
ئاڵەم گشت تەمام یەکسەر مەزانۊ
کەس نەبیش تاقەت جای ئه و بسانۊ
من کەردم حەرام جە وېم خورد و خەو
هابیم وە وارېس، نیشتام نە جای ئەو
بەڵۍ خەمم هەن ئەی دنیای فانی
هەم فانی کەرۊ مەجنۇنی سانی
فرۊزانی دەور دنیا پاماڵ بۊ
وەبۍ من یاگەی مەجنۇن بەتاڵ بۊ
[1]