کوتەک جە بەهشتۆ ئامان
نویستەی: ئەسعەد هۆرامی
هامڕایی (شېر و وەرگ و ڕواس) ۍ جە زوانو میرزا ئۆلقاڎرو پاوەیۆ.
یەک شېرو وەرگێ چەنی ڕوبایێ
وەتەن کەردشان نە گۊشە جایێ
ڕوبایێ = ڕواسێ
ڕوێ جە ڕوا (شېرو وەرگ و ڕواسە) قەدەرشا کۆت لاو یۊترینی و پېوەرە لوێ پەی ڕاوۍ .
مودەی چەنی هەم بەسەر بەردشان
شکاری نەچیر وەحشی کەردشان
هەرچن ئەچی ڕەفیقایەتیەنە شېر پەنەوازیش پاڎییشا نەبۍ ، بەڵام پېسە ڕېزو تەقدیرێ پەی وەرگی و ڕواسۍ وېش کەرد بە هامشانشا .
شېرەکە بە هېزو تەواناو وېش گاوێ کۊییەو و بەرانێ کۊیی و هۆرېشێش ڕاوەکەردۍ .
تا یەک ڕۊ وېیەرد خېڵی عەزیمێ
جە خۊف ئەو شېر پەڕ تەرسو بیمێ
لېشان بەجا مەند نە پەنای سەنگێ
مېش و چەپوشێ و گۊساڵە لەنگێ
مام شېر نیازش کەرد ڕەفېقەکاش تاقیۍ کەرۊوە ، بە وەرگیش وات ئادەی بزانو چەنی نەیچیرەکا دابەش کەری ملمارە ؟ .
شېر واتش بە گورگ حسە کەر لېمان
هەرکام بوەرمۍ نەسیبی وېمان
مام وەرگ کۆت بەشکەردەی :
گاوەکۍ پەی جەنابیت
بەرانەکە پەی وېم
هۆرېشەکە پەی مام ڕواسۍ .
ئا مېشە خاسەن ئانە پەرۍ تۊ
تەناوڵش کەر نۊشی گېیانت بۊ
پەی ڕواس چەپوش ، پەی من گۊساڵە
ڕزقێوەن ڕازق کەردەن حەواڵە
مام شېر ئەپا بەشکەردەیە فرە تووڕەبی ، پەوکەی مشتەکوڵېوەش سرەونانە دەمو وەرگی و کۊشتش .
چەپاڵەش شل کەرد چوون خونەخوارە
داش نە بناگۊش گورگی بېچارە
ئینجا مام شېر ڕوەشکەردە ئۆ مام ڕواسۍ و ماچۊ ئادەی تۊ بەششاکەرە .
شېر وات وە ڕواس تۊ بکەر حسە
مکافات حەرف هەرزەکار بەسە
ڕواسە دەسشکەرد بە بەشکەردەی نەچیرەکا:
گاوەکۍ پەی ژەمۆ ساعبیت
بەرانەکە پەی ژەمەو نیمەڕۊیت
هۆرېشەکەیچ پەی ژەمەو وېرەگایت
گۊساڵە پەی چاشت ، مېش پەی ئیفتارت
چەپووش لەزیزەن پەرۍ نەهارت
مام شېر فرە دڵوەش بی بە بەشکەردەکەی
شېر وات ئافەرین ڕواس جە هۊشت
جە نیکی کەلام جە تیزی گۊشت
ئەی حسە وەڕاس کېن دان وە یادت
ڕەحمەت وە تەعلیم دەرزو ئۊستادت
مام ڕواسە ماچۊ ئی زانستو بەشکەردەیە جە وەرگه بۍ ئەقڵەکەیۆ فېربېیا .
ڕواس وات ئەقڵم جە گورگ ئاموختەن
چەپاڵش چەنی وە هەمدا دوختەن
هونی کەللەی گورگ نیشانم دادەن
خاستەر جە تەعلیم هەزار ئوستادەن
دمایی مام شېر ماچۊ من تەنیا شمەم تاقیۍ کەردیدێ ، مادام سنورو وېت زانات و بە ئەدەبۆ مدرای وەراوەرۆ ئانە هەریەر نەچیرەکە پەی تۊ ، من لازمم نېیەن پەنەشا .
یەرە نەچیرەکەش بەخشێ بە مام ڕواسی .
ئامېشە = گاوە
گۊساڵە = بەران
چەپوش = هۆرېشە
ئی کوڵە داستانە جۆهەرێ عیرفانیش دلۍ وېشەنە پەنهادان ، مەولانای ڕومی جە وینگێوە عیرفانیۆ تەماشەش کەرۊ ، دەسەڵات و زاتو خۊڎای بۍ هامتاو شەریکا و تەنیاو تەنیا زاتو وېش دەسەڵاتدارا ملو گردو هەرمانەکاو ئینسانیرە و ڕۊزی بەخشی تەمامو مەخلوقاتیەن.[1]