شەسس و نۊهەمین جاڕنامەو مافو مرۊڤی
بە بۊنەو (69)هەمین ساڵەو پەسەنڎ کریای جاڕنامەو گەردونی مافوو مرۊڤی، ڕېکوزیاو چەنەۋېیەردەی میانەتەوەی جە ڕاپۆرتو ساڵانەو وېشەنە داوا جە گردلایەو کەرۊ کە ئی دەسکۆتا پارێزنا و جە ژیوای ڕوانەینە بە کردەوە چەسپناشا. هامعان چەنی ئانەیە ئی ڕېکوزیا خەمباری وېش پەی پاشێل کەردەی ئی مافا جە سەرانسەرو دنیاینە بەروست و ویرووڕاو گردیش ئاگادار کەردەو کە پاشێل کەردەی مافوو مرۊڤی جە چن ساڵێ ۋېیەردێنە فرەتەر وبێ بەزەیانەتەر بېیەن. تەنیا جە ساڵەی ۋېیەردێنە زیاتەر جە (280) کەسێ کە پەی پارێزنای مافوومرۊڤی بە گردی و پەی مافوو زڵموەنەکریایاو جێهانی بە تایبەتی، کە بە شێوازێو شارستانیانە گژیاێنێ، جە لاو دەسەڵاتدارە دیکتاتەورەکاوە تێرۆرێ کریاێنی و یان بە ئاشکرا کوشېیاێنی.
ساڵەی ۋېیەردێ پەی کوردی ساڵێە مەینەت بارە و کارەساتاویە بێ. مافە سەرەتایەکاو هاموەڵاتیاو کوردستانی نە تەنیا جە لاو داگیرکەریەو پاشێلی کریای، بەڵکو جە لاو بەشێو جە هېزە دەسەڵاتدارە بە نامی کوردیەکاوە دڕندانە پاشێلێ کریای و هەر ئا دەسەڵاتدارا بیێ بە کڵاو سورێ و چەمساقێ داگیرکەری و ئاردێشا کەرکووک وتوزخورماتو و خانەقین و یاگەکاتەری. کورد نەتەنیا نیمەو خاکەکەیش جە دەس دا، بەڵکوم مافەسەرەتایەکاو خەڵکو ئی ناوچا بە دڕندانەتەرین شێوە پاشێلێ کریای و خەڵکێو بۍ تاوانی فرە یا کوشېیا و ئەشکەنجە دریا، یا بە دەیان هەزار کەسێ ئاوارە ئی لاو ئۆ لای بیێ.
سەرباروو ئانەی بومەلەرزە بەشێوتەر جە وەڵاتوو کوردستانیاش وېران کەرد و چاگەیچەنە خەڵکیو فرە کوشېیا و زامڎار و یانەوېران بی. چیگەیچەنە داگیرکەر نەتەنیا وېش جە یاردیدای پارێزنا، بەڵکوو بی بە هۆکارو وەرگېری جە یاردیدای خەڵکی ئاساییچ کە بۍ هیج چەمەڕایە و فیداکارانە لوای سەردەمو هاموەڵاتیە وەنەقۆمیایەکاشاوە. بار و دۊخوو ئی وەنەقۆمیایا ڕۊبەڕۆ چی سەردا و سۆڵەنە خراوتەربۊ و ئی خەڵکە توشو چارەنوسێو نادیاری بېیەن و هەزاران نەوەشیێ جەسەیی و دەروونیێ ڕوەشا کەردێنە ئی مرۊڤە ئاوارە و وەنەقۆمیایا.
موختار کەریمی.[1]