پۊختێوە جە تاریخو هۆرامانی و سرووشتو ژیوای خەڵکەکەیش
بەشۍ: ویس و حۆتەمە
نویستەی: #ئیبراهیم میکە عەلی#
هەرپاسە ئەحمەد خواجە یاداشتێوەش هەنە ویٛنێوە کەسایەتی و هەستو مەحمود خانی و حەرەمسەرا و یاگیٛ فەرمانڕەوایەتیەکەیش ویٛنە کیٛشوٙنە و نویستەنش: دمای نیمەڕوٙی لوانیٛ پەی دلیٛ دەگاو دزڵییٛ، دزڵیە فرە نزیکە بیٛ هەوارگەکۆ هەکە منش چەنەبیٛنیٛ.
ئینە ویٛنە و یادەوەری ویناکەی مەحمود خانو دزڵییٛن، من چا بڕوێنە نەبیٛنیٛ دزڵیەنە چیٛوێوە وینو هەتا مەنەنا ویرم نەشوٙوە.
- دیوەخانەکەش دوە نهوٙمبیٛ و بیٛ گەچ و هەڕە تەنیا بە تەوەنی دروس کریابیٛ.
- سەرو بانو باڵەخانەکەیۆ ئاڵێوە کوردەسانی کوٙێبیٛرە و وا شانیٛش.
- چیٛرو ئاڵاکیٛنە بوٙڕیژەنێوە مردابیٛ و عانو نان واردەینە و وەڵیٛ بانگینە گرد وەختو ژەمێوەنە بە لولەکیٛ هاگاڎاریی دیٛ بە خەڵکەکەی.
- یاوانۍ دیوانو خانی و خان ویٛش بڕێ ئاما پیٛوایمۆ و فرەش پەنە وەش بیٛ دیاش.
- پیٛخامەکەو شیٛخ مەحمودیم داپەنە، دەسشۆ گیٛرتا و ماچش کەرد و ڕوەش کەردە ئەنجومەنو پیرەکاش و واتش: قیٛخا زوٙراب مەڵڵای چڕە بابێ.
- مەڵڵا ئاما پیٛخامەکەش پەی واناوە، خان واتش: سەرە... کوڕ... هوٙز و قەوم و کەس... وەڵیٛ گردینە ویٛم و فاتمەخانە ئینایمیٛ ڕاو شیٛخ مەحمودینە.
- یاوانیٛنە گردو دەگایەکا چیٛرو دەسیشەنە خان، پیێوە، قیٛخێوە، کەسێوە فامیڎەو چەنەئاماش هورچنېیەن و ئەنجومەنێوەش چەنە خیٛزنێنیٛ پەی ڕاوەبەردەی هەرمانەکا سنورەکەیش .
هەرچاگە یاونێشەنە بلاوە و چەکدارەکاشا ئامادیٛ کەرا بە جوٙرێوە هەکە گرد پیێوە هۆرامی ئەشوٙم تفەنگێوە و سەڎ فیشەکیٛ و مانێوە گولانیٛ پەڕ توٙشیٛش پەنە بوٙنە و پاپوٙشی خاسش پانە بوٙ و ئاماڎە بوٙ، دلیٛ مانەکیٛنە تفە وشکیٛ و هەچکوچی و نانو دە ڕوا هورگیٛرا.
ۋەرو ئانەیە چینەی فرەتەر باسەکەما دریٛژە نەکیٛشوٙ، پەی ئاشنابېیەی فرەتەری بە کەسایەتیی و کاریگەریی ڕوٙڵو مەحمود خانی و بەشداریش جە شوٙڕشو بەشەکاو تەرو کوردەسانینە و تەقەلا دبلوماسیەکاش، هەچ وەشەسیاێوە مەتڵەبش بوٙ فرەتەر بزانوٙ تاووٙ سەرێ بڎوٙ سەرچەمەکا.[1]