منی ڕێبوار لەبیرم نییە لە کەنگێوە سەرنشینی شەمەننەفەری زەمانم
بەڵام ئەوەندە دەزانم
لە کووپەی ژمارە سێزدە دانیشتووم
لە پەنا بەر و بوخچەی ئاواتەکانم
ئەو گوڵانەی تۆ داتمێ بە یادگار
ئێستا هەموو هەڵوەریون، گەڵا گەڵا لە دەستی من کەوتوونە خوار
گشت کووپەکان گوڵ و ئەوینیان تێدایە
بەڵام کووپەی من بۆنی گوڵ و ئەوینی لێ نایە
شەمەننەفەر نە ئەوەیە بمگەیەنێ
نە ئەوەیە لە وێستگەیەکی گڵینا لەشی ساردم دابەزێنێ
خۆزگە مەلی دڵ بسرەوێ
دەگەڵ بم و دەگەڵ نەبم شەمەننەفەر لەسەر من پەکی ناکەوێ
بەڵێ گیانە
ئەو چرکەچرکەی تۆ دەڵێی کاتەژمێری بێ وچانە
لە گوێی مندا گرمەگرمی شەمەننەفەری زەمانە[1]
هۆنەر: #ناسر ئاغابرا-ژاکاو#
پەرتووکی: #کەژاوەی دڵ#
ڕۆژی: #1994-12-12#
شوێن: #مەهاباد#