خەندان - ڕاماڵ قەسرەیی
لە ساڵی 2013 چەندین خزمەتگوزاریی جۆراو جۆر پێشکەش بە کەسوکاری شەهیدان و ئەنفالکراوانی دەڤەری سۆران و ڕەواندز و باڵەکایەتی کراوە، کەسوکاری شەهیدانیش داوا دەکەن خزمەتگوزاری زیاتریان پێشکەش بکرێت و جیاوازیان لەنێواندا نەکرێت.
ئەشقی مەلا بەرێوەبەری بەرێوەبەرایەتی شەهیدان و ئەنفالکراوانی سۆران بەخەندانی ڕاگەیاند: لە سنووری قەزای سۆران
2623شەهیدەی سەنگەر و 2012 شەهیدی هاوڵاتی و 220 ئەنفال و جینۆسایدیش ن هەیە.
ئەشقی مەلا وتیشی: لە ساڵی 2013 دا 220 پارچە زەوی نیشتەجێبوون بەسەر کەسوکاری ئەنفالکراواکان دابەشکردووە و چەکی خانوی خۆکردیش بەبڕی 27 ملیۆن و 500هەزار دینار وەک دیاری پێداون.
وتیشی: "هەر لە ساڵی ڕابردودا 300پارچە زەویمان لەشاری هەولێر بەکەسوکاری شەهیدان داوە،100کەسیش لەوارسی شەهیدان و ئەنفالکراوان خەرجیی نەشتەرگەریان بۆ کراوە و بەهاوکاری بەرێوەبەرایەتی تەندروستی سۆرانیش لە زۆربەی بنکەکانی تەندروستیەکان بەشێکی تایبەت بەکەسوکاری شەهیدان کراوەتەوە.
بەرێوەبەری شەهیدانی سۆران وتیشی: هەر لەساڵی 2013 دا 200 خوێندکاری کور و کچی شەهید لەسەر ئەرکی خۆمان ڕەوانەی زانکۆ ئەهلییەکان و پەیمانگاکانی ئێوارانی حکومی کردوە بۆ درێژەدان بەخوێندن، هەر لە ساڵی ڕابردودا 220 کور و کچی شەهید پێنچ ملیۆن دیناریان وەک دیاری هاوسەر گیری پێدراوە و 400 دایک و باوکی شەهیدی سەنگەریش مووچەی بەخێوکەریان بۆ بڕاوەتەوە کە بۆ هەریەکەیان مانگانە بڕی 75هەزار دینار بووە.
ئەشقی مەلا بەرێوەبەری بەرێوەبەرایەتی شەهیدان و ئەنفالکراوانی سۆران ئاشکرایکرد کە لە سۆران 20 گەرەکی تایبەت بەکەس کاری شەهیدان هەیە کە زۆربەیان سەربە سەنتەری قەزای سۆرانن.
بۆ پلانیش ئەمساڵیش وتی: لەسەر ئاستی هەر سێ قەزای سۆران و چۆمان و ڕەواندز بە ئامادەبوونی هەرسێ قائیمقام و سەرجەم بەرێوەبەری ناحیە و فەرمانگە حکومییەکان و چەند وەزیرێکی پەیوەندیدار و نوێنەری حزب و لایەنە سیاسیەکان، بەنیازین کۆنفرانسێک لە سۆران ببەستین بەمەبەستی زیاتر خزمەتکردنی کەسو کاری شەهیدان و دۆزینەوەی ڕێگایەک بۆ ئەوەی کەسوکاری شەهیدان ئاسانتر لەجاران کارەکانیان لە فەرمانگە حکومیەکان بۆ ڕایبکرێت.
وتیشی، هەر لەبەرنامەمان دایە بۆ قۆناغی هەشت، ئەمساڵ زەوی بەسەر ئه و وارسی شەهیدانە دابەشبکەین کە تائێستا زەویان وەرنەگرتووە کە ژمارەیان لە سەرووی 400 شەهید دەبێت.
- 06-01-2014