هاونیشتمانیانی کوردستان
گەلەکەمان ئەمڕۆ بە قۆناغێکی هەستیارو مەترسیداردا تێدەپەڕێ. قەیرانی دارایی و بۆشایی یاسایی و نەبونی عەدالەتی کۆمەڵایەتی ژیانی هاوڵاتیان و ئاشتی کۆمەڵایەتی خستۆتە بەردەم مەترسییەکی گەورەوە. هەمو ئەمانەش دەرەنجامی سیاسەتی شکستخواردوی بیستوپێنج ساڵەی دەسەڵاتی خۆماڵییە. سەرەڕای ئەوانە دەسەڵاتە شکستخواردوەکەی هەرێمی کوردستان لە بری چارەسەرکردنی کێشەکان و باشکردنی گوزەرانی هاوڵاتیان و دەستەبەرکردنی یەکڕیزی نیشتمانی قەیرانێکی تری سیاسیان لەگەڵ حکومەتی فیدڕال و دەوڵەتانی ناوچەکەو کۆمەڵگای نێودەوڵەتی دروستکرد، کە ئەویش وروژاندنی پرسی ڕیفراندۆم بو لە کاتێکی نەگونجاودا.
هێنانەپێشەوەی ڕیفراندۆم و ئەنجامدانی لەم کاتەدا بەبێ زەمینەسازی و هێنانەدی یەکڕیزی نیشتمانی بەو هەمو کەموکوڕی و تەزویرو دەسکارییەوە، بۆ خۆدزینەوە بو لە چارەسەرکردنی کێشەکان و درێژەدان بە قۆرخکردنی دەسەڵات و تاڵانکردنی زیاتری سامانی وڵات. ڕیفراندۆم هێندەی تر ڕیزەکانی گەلەکەمانی تێکداو هێزو لایەنە نێودەوڵەتییە دۆستەکانمانی نیگەران و نائومێد کرد. هەروەها بیانوی دا بە هەندێ کەس و لایەنی سیاسیی شۆڤێنی کە دژی داخوازییە ڕەواکانی خەڵکی کوردستان بوەستنەوە. ئێستا دەرەنجام و کاردانەوەکانی ڕیفراندۆم بونەتە مایەی هەڕەشەیەکی جیدی لەسەر ژیان و گوزەرانی هاوڵاتیانی کوردستان و مەترسی لەسەر دەسکەوتەکانی خەڵکی کوردستان دروستکردوە.
#بزوتنەوەی گۆڕان# هەر لە سەرەتاوە ڕایگەیاند کە لەم کاتەدا هەلومەرجی ناوخۆیی و دەرەکی لەبارنین بۆ ئەنجامدانی ڕیفراندۆم. هەروەها داوامانکرد پێشوازی لە دەسپێشخەری کۆمەڵگای نێودەوڵەتی و نەتەوە یەکگرتوەکان بکرێ بۆ نێوەندگیری لە دانوستان لەگەڵ حکومەتی بەغدا. بەڵام سەرکردایەتی پارتی دیموکراتی کوردستان و یەکێتی نیشتمانی کوردستان و هاوڕاکانیان بێگوێدانە بەرژەوەندی گەلەکەمان و هەڵسەنگاندنی بارودۆخەکە و تاوتوێکردنی ئەگەرو کاردانەوەکان ڕیفراندۆمیان ئەنجامدا. ئێستا هاوڵاتیانی کوردستان لە چاوەڕوانی چارەنوسێکی نادیاردا توشی ترس و دڵەڕاوکێ و نائومێدی بون
سەرەڕای هەمو ئەمانەش، دوێنێ لیژنەی باڵای ڕیفراندۆم، کە لیژنەیەکی حیزبی و نایاساییە، خۆیان وەک سەرکردایەتی سیاسی کوردستان – عیراق ڕاگەیاند. ڕاگەیاندنی ئەو سەرکردایەتییە گەڕانەوەیەکی ڕونی پرۆسەی سیاسیە بۆ دواوە. جگە لەوەش ئەوانە مافی ئەوەیان نیە بەناوی سەرکردایەتی سیاسی کوردستان خۆیان ڕابگەیەنن، چونکە بەپێی دەنگ و کورسی پەرلەمانیش بێت چەند حیزبێک ناتوانن نوێنەرایەتی هەمو کوردستان بکەن. گەلەکەمان چاوەڕێی ئەوە بو دەسەڵاتدارانی ئەم هەرێمە دامەزراوەکانی هەرێمی کوردستان تۆکمەو بەنیشتمانی بکەن. بەڵام ئەو هەنگاوەی ئەوان هەوڵێکی ئاشکراو کۆسپێکی ترە بۆ پەراوێزکردن و فەرامۆشکردنی دامەزراوە شەرعییەکانی هەرێمی کوردستان و قۆرخکردنی زیاتری بڕیارو دەسەڵاتی سیاسی. هەروەها بەم کارەیان پاساو بۆ ناحەزو نەیارەکانی گەلەکەمان دەهێننەوە کە گەلی کورد شایستەی سەربەخۆیی و ئامادەیی خۆبەڕێوەبردنی، لە ڕێگای دامەزراوەی یاسایی و نیشتمانییەوە، نیە.
1. پەرلەمانی کوردستان دەستەیەکی گفتوگۆ لە نوێنەری حکومەتی هەرێم و پەرلەمان و کەسانی نیشتمانپەروەرو پسپۆڕ دیاری بکات و دەست بکرێ بە گفتوگۆ لەگەڵ بەغدا بە سەرپەرشتی نەتەوە یەکگرتوەکان و کۆمەڵگای نێودەوڵەتی، بۆ چارەسەرکردنی هەمو کێشە هەڵپەسێردراوەکانی نێوان هەولێرو بەغدا لە چوارچێوەی دەستوری عیراقدا.
2. حکومەتی فیدڕالی عیراق و ئەنجومەنی نوێنەران پێداچونەوە بە هەمو ئەو بڕیارو ڕاسپاردانەدا بکەن، کە لە پێش ئەنجامدانی ڕیفراندۆم و دواتریش کراون و ئەوانەیان هەڵوەشێننەوە کە دژی بەرژەوەندییەکانی خەڵکی کوردستانن و دەبنە مایەی ئاڵۆزی و ناسەقامگیری و نابێ ڕێگە بە گەلەکۆمەکی ئیقلیمی بدرێ بۆ سزادانی گەلەکەمان. هەروەها بەرپرسیاریان دەکەین لە جێبەجێکردنی هەمو ئەو مافانەی لە دەستوری عیراقدا بۆ خەڵکی کوردستان چەسپێنراون، بەڵام لە ڕابردودا خۆیان لە جێبەجێکردنی دزیوەتەوە. نابێ ڕیفراندۆم بکرێتە پاساو و بیانو بۆ پەشیمان بونەوە لە جێبەجێکردنی داوا ڕەواکانی گەلەکەمان کە لە دەستوردا چەسپێنراوە.
3. پێشوازی و دەسخۆشی لە هەوڵ و دەسپێشخەری کۆمەڵگای نێودەوڵەتی و مەرجەعییەتی ئایینی و هەمو ئەو هێزو کەسایەتیانە بکرێت کە لەپێناوی دەستەبەرکردنی گیانی بەیەکەوە ژیان و سەقامگیری و بەرجەستەکردنی مافە نەتەوایەتییەکانی خەڵکی کوردستان کردویانە.
4. سەرکردایەتی سیاسی کوردستان – عیراق هەڵوەشێتەوەو لەبری ئەوە دامەزراوەکانی هەرێمی کوردستان گەشەیان پێبدرێ و بەنیشتمانی بکرێن.
5. هەڵبژاردنی گشتی لە وادەی یاسایی خۆیدا لەلایەن کۆمسیۆنی هەڵبژاردن و ڕاپرسی کوردستان و لەژێر چاودێری نێودەوڵەتی ئەنجام بدرێ.
بزوتنەوەی گۆڕان
02-10-2017