(پێشهاتەکان پێماندەڵێن داگیرکەران باجی قورسی ئەو سەرەڕۆییانەیان دەدەن و دەچنە زبڵدانی مێژووەوە)
- جەماوەری خۆڕاگری کوردستان...
- کەس و کار و بنەماڵەی سەربەرزی شەهیدانی کوردستان
جەژنی نەورۆزو ساڵی نوێی کوردیتان پیرۆز...
بەبۆنەی جەژنی نەورۆزو سەری ساڵی کوردییەوە جوانترین پیرۆزبایی لە تەواوی گەلی کوردستان و بنەماڵەی سەربەرزی شەهیدان و کەسوکاری ئەنفالکراوان و هێزەکانی پێشمەرگەی کوردستان و گەریلا و شەڕڤانان و زیندانیانی سیاسی نێو زیندانەکانی داگیرکەرانی کوردستان و ئێوەی خۆشەویست دەکەم و، هیڤیدارم ئەم نەورۆزە ببێتە نەورۆزی سەرخۆبوون و ئازادی کوردستان و ڕزگاربوونی نەتەوەکەمان لەژێردەستی داگیرکەران.
نەورۆزی ئەمساڵمان لەگەڵ نەورۆزی ساڵانی ڕابردوو جیاوازە، لە لایەک ڕژێمی عێراق لە 16 ی ئۆکتۆبەری 2017 ەوە کەرکووک و مەخموور و شنگاڵ و زوممار و توزخورماتووی داگیرکردووە و، لەلایەکی دیکەوە دوای بەرخودانێکی بێوێنەی شەڕڤانان و گەلەکەمان لە هەمبەر هێرشی ڕژێمی تورکیا و چەتەکانی، ڕژێمی تورکیای فاشی و خوێنڕێژ لە 18 / 3 / 2018 ەوە عفرینی قەڵای بەرخودانی داگیرکردووەو دەستی بە وێرانکردنی شارەکە و جینۆسایدکردنی خەڵکەکەی کردووە، ئەم تاوانانەش بە بەرچاوی هەموو دونیاوە ئەنجامدەدرێن و، وڵاتانی زلهێزی ویژدان مردوو بێدەنگن و ئارەقەی شەرمەزاریان لێدەتکێت، لێرەوە جارێکی دیکە زۆر بەتوندی داگیرکردنی کەرکووک و عفرین ئیدانەو مەحکووم دەکەین و، سڵاوو ڕێزو خۆشەویستیمان بۆ خەڵکی خۆڕاگری کەرکووک عفرین و مەخموور و شنگاڵ و زوممار و توزخورماتوو هەیە و، پێیاندەڵێین کەوا ئەو داگیرکارییە تا سەر نابێت و، پێشهاتەکان پێماندەڵێن داگیرکەران باجی قورسی ئەو سەرەڕۆییانەیان دەدەن و دەچنە زبڵدانی مێژووەوە.
بێگومان نەورۆز سیمبوڵی نوێبوونەوەو دەستپێکردنی ژیانێکی نوێیە، ئومێد دەکەين ئێمەی کوردیش وەکو نەورۆز دەست بە ژیانێکی نوێتر بکەین و بەرنامەیەکی نوێ بۆ داهاتوومان دابڕێژین و بەرەو ئایندەیەکی گەش هەنگاو بنێین، ئەمەیش بە ڕێکخستنەوەی ناوەندی سیاسی کوردستان و یەکدەنگی و یەکڕیزی گەلی کوردستان و لایەنە سیاسییەکان دێتەدی، بۆئەمەش پێویستە بە زووترین کات (ئەنجوومەنی سیاسی کوردستان) بە بەشداری تەواوی هێزو لایەنەساسییەکانی کوردستان پێکبهێنرێت، ئەمەیان بۆ چارەسەرکردنی پرسەکانی باشووری کوردستان دەبێتە فاکتەرێکی بەهێز، لەهەمان کاتدا لەسەر ئاستی نەتەوەیی پێویستە هەموو لایەکمان کار بۆ بەستنی کۆنگرەیەکی نەتەوەیی لەسەر ئاستی کوردستانی مەزن بکەین، ئەمەش ئەڕکێکی بەپەلەی نەتەوەیی و نیشتمانی ئەم قۆناخەی خەباتی گەلی کوردستانە، بۆیە لەسەر هەموو لایەکمانە بەو ئاراستەیە کاربکەین بۆئەوەی بگەین بە ئازادی و سەربەخۆیی.... لەگەڵ ڕێزو خۆشەویستی و پیرۆزبایی دووبارەمان بۆ هەموو لایەک.
هەر بژین و سەرکەوتوو بن و سەربەخۆیی کوردستان ببینن.
دڵسۆزتان
#غەفوور مەخمووری#
سکرتێری گشتیی
#یەکێتی نەتەوەیی دیموکراتی کوردستان# YNDK
#20-03-2018#