#فازڵ ئوسوڵیان#
سوید - 2019
درەختی ئاسووریگ بە یەکێک لە ئاسەوارە کۆنەکانی ئەدەبی جیهانی دەژمێردرێت. لێکۆڵەرانی بواری زمانە کۆنەکانی ئێرانی دەڵێن کە هەڵبەستە (منظومة)یەکی ئێرانییە کە گوایی لەسەردەمی ئەشکانییەکاندا بە شێوەی زارەکی هاتووتە بەرهم و دواتر بە خەتی پەهلەویی ئەشکانی تۆمار کراوە و وەک یەکێ لە ئاسەوارەکانی ئەدەبی کۆنی فارسی ناوی لێ دەبن. بەڵام ئەم بۆچوونە لە ڕاستی بەدوورە. درەختی ئاسووریگ بەیتێکی کۆنی کوردی سەردەمی مادەکانە.
ئەم بەیتە دەمەقرێیەکە (مناظرە) لە نێوان بزن و دارخۆرما کە کامەیان باشتر و بەسوودترن. درەختی ئاسووریگ بەیتێکی سیاسی- ورووژێنەر (سیاسی- تهیجی)ە. لەم بەیتەدا بزن سیمبۆڵێکە بۆ مادەکان و ئایینی زەڕدەشتی و درەختی ئاسووریگیش (دارخورما) هێمایەکە بۆ فەرمانڕەوایی ئاشوور. لێرەدا بزن لە پێگەیەکی بەهێزەوە ڕووبەڕووی دارخورما دەبێتەوە، بە دەم هەراشییەوە لەگەڵی دەدوێ، سوکایەتی پێی دەکات و مۆژدەی تیاچوونی دەدات. لە کوتاییشدا لەگەڵ ئارەزوی سەلامەتی تەن و ڕەوان بۆ کەیخەسرو داوا دەکات کە خەڵکیش سروود بخوێنن تا بە زوویی سەری دوژمن بە مردوویی ببینن.