سکرتێرە 09
مشەوەش بووم و نەمزانی چبکەم، خۆ ناکرێ یەکسەر مەجلیسەکەی بەجێبێلم و بڕۆم، ئاخر ئێستا ئەمن وەزیرم و بەرپرسیارەتەکی گەورەم لەسە شانیە، لۆیێ گۆتم وەچاکە لەگەر سەرۆک وەزیرانی قسەی بکەم و ڕوخسەتی لێوەرگرم، وەکی چوومە کنی دیاربوو لەگەر وەزیری شارەوانی قسەیان دەکرد، سەریان لەبن گێی ئێکدی نابوو پسەپسیان بوو، ئیدی نازانم باسی عاردە ڕوکنەکانی شاریان دەکرد، یان باسی عاردە بازرگانیەکانی دەورەی دووسایدە تازەکەی واخەریکە دروست دەکرێ، عەلاکووللین پیاو گومانی خراپ نەبا باشە، هەتا شتەکی بەچاوی خۆت نەبینی نابی باس بکەی، وەڵلا چومە کن سەرۆک وەزیرانی و سەلامم لێکردو گۆتم : ڕوخسەتم دەدەی بڕۆم، وەزعەکی ئەوهام بەسەهاتیە، وەزیری شارەوانی ئێکەکی خڕیلەی سەرگەورەبوو، دوو خەنافسی درێژی بەردابۆوە، پێدەچوو قەرەبووی کەچەریەکەی سەری پێکردبیتەوە، وەکی گێی لەقسەی من بوو، هەتا هێزی تێدابوو پێکەنی، چاوم زەق بۆوە، گۆتم : دەبی ئەو کابرایە ئاقری تەواو بی ! ئەمن دەرێم خێزانم لایەکی سەری هەرزڕڕایە، ئەویش لە قریتەی پێکەنینێ دەدا..!! وەزیرەفەندی دەستەکی لەسە شانی دانام و گۆتی : هەتییییم ئەتوو چەند بەبەختی..! گۆتم : بەختی چ ؟ گۆتی : خوا خۆشیەکەی لۆتوو کردە دوو خۆشی، هەم بوویە وەزیر هەم ژنەکەت لەکۆر بۆوە، وەڵڵا هەقی وەیە گایەکی بکەیە خێر..! کێشەی وەزیری شارەوانی ئەوەبوو، وشەی هەتییمی زۆر بەکار دەهینا، ئەوجە وەکی قسەی دەکردو خۆی بادەدا دەتگۆ تازە لەسەر جەنجەڕی هاتە خوارێ..!!
سەرۆک وەزیران گازی سکرتێرەکەی خۆی کردو گۆتی : سواری دووسێ توڕمبێلان ببن و بڕۆنە تەواری، خێزانی جەنابی وەزیری نەخۆشە، فەوری دەریدەینن و دەیبەنە خەستەخانەکی ئەهلی، هەرچی مەسرەفیشە دەیکەنە وەسل و لۆمن دەینن، گۆتم : جەناب ئەمنیش لەگەریان بچم ؟ گۆتی : پێویست ناکا، ئەمە هەونکە کۆبوونەوەکی خێرا دەکەین و بەرنامەی کارمان دادەنێین، ژمارەی مۆبایلی مندارەکانت بدە سکرتێری بابچن بیانبیننەوەو ئیشەکەی تەرتیب کەن..!! ئیدی چارەم نەماو سوپاسی سەرۆک وەزیرانم کردو ژمارەو شتەکانم دا سکرتێرەکەی و ئەوان ڕۆیشتن..!! تەلەفۆنم لۆ کوڕەکەم کردەوەو وەزعەکەم تێگەیاند، ئەویش گۆتی : باشە ئەمن وا چاوەڕێیان دەکەم، گۆتم : داکت کووە ؟ گۆتی : وەڵلا هەتا ئێستا هەر لوغەلوغیبوو، کەس لێی تێنەدەگەیی، بەس ئەوە خەریکە بەخۆ دێتەوە..!! گۆتم : باشە لۆ وەی لێهات ؟ گۆتی : وەڵلا وەکی ئەتووی دیت وا لەناو ئەو هەموو حوکمەت و هەرایەیی و دەبیە وەزیر، باوەڕی نەدەکرد، لەخۆشیان شاگەشکەببوو، نەیدەزانی چبکا، دەوی وێک نەدەهاتەوەو فرمێسک لەهەردوو چاوی دەهاتە خوارێ، گۆتم : ئێ دوایێ ! گۆتی : بەران وەکی گێی لێبوو بوویە وەزیری کاروباری ژنان، ئەعسابی تێکچوو، ڕەنگی سۆربوو، شین بوو، مۆر بوو، تووشی سەرسوڕانەکی بوو نەبیتەوە، ئیدی خۆی پێڕانەگیراو دووجار لەسەیەک سوڕاو بەربۆوە، کەتە سە تەلەفزیۆنی و ئەویشی لەگەخۆی هینا خوارێ و هورد پوردی کرد، وەکی ئەمن غارم دا قیتی کەمەوە، کەفی لەدەوی دەهاتە دەرێ و خین لەسەری فڕکەی دەکرد..! گۆتم : کورە ئەگەر بەخۆهاتەوە، نەکەی پێی برێی بابم نەهاتیە، بەقورعان بزانی و بێتەوە مارێ سواری سەرسەرو کۆکرم دەبی و هەموو گەڕەکم دەینیتە دیارێ..!!!
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
کوڕەکەم گۆتی : خەمت نەبی پێی نارێم بەران ئەتووش ئەوە بوویە وەزیر، دەوجە چاوەکت لێمبی ! گۆتم : لۆ کوڕم قسووریم هەبووە لۆتان، لەچت کەمە، چاوی چم لێتبی..! گۆتی : وەڵلا لەکنە خۆت بزانە بن دیوارەک بەرسێبەرەکم لۆ نابینیەوە، دەوام نەکەم و معاشیش وەرگرم، گۆتم : چیدیش ؟ گۆتی : وەڵلا ئەگەر لەمبەرگینیەکیشم لۆ بکڕی ! گۆتم : چت لۆ بکڕم ؟ گۆتی : سەیارە سەیارە، سەیارەی لەمبەرگینی..! وەرامم نەداوەو مۆبایلەکەم قەپات کرد..! بڕەک پێچوو تەلەفۆنی کردەوە، گۆتی : چیە بابە وەحدەت نەما قەپات بوو، گێمەدێ، لەوەپاش ڕەنگە مۆبایلەکەت ببتە فری و ئەمەش ئستیفادەی لێدەکەین، ئەو ڕەقەمە حیزەش بگۆڕەو چارسەت و چل و پێنجەکی بکڕە، عەیبە وەزیربی و ڕەقەمی علوجت پێبی..! گۆتم : کوڕم ئەتوو ئەوها برێی دەبی خەرکیدی چبرێ..! گۆتی : هەونکە شتەکانی جێبەجێ دەکەی یان بەداکم برێم و ئەوەی بن بەڕی بینمە سەربەڕی..! گۆتم : باشە باش، هەردێمەوە مارێ، ئەمن دەردت تیمار دەکەم..! مۆبایلەکەم قەپات کردو چوومەوە کن جەماعەتی..!
وەزیری پلان دانان سەری لەبن گێی نام و گۆتی : پیرۆزە ! گۆتم : سوپاس مەمنون لەتووش پیرۆزە، گۆتی : کورە ئەوەی نارێم نا، جەڵتەی ژنەکەت دەرێم، بەنامووسم لەتوو بەبەختتر نیە، هەم بوویە وەزیری ژنان و هەم ژنەکەت لەکۆربۆوە..! گۆتم : توخوا ئەو قسەی مەکە، ئەمن ژنەکەی خۆم زۆر خۆش دەوێ و ئیشاڵلا هیچیش نیەو چادەبتەوە..! گۆتی : پێت کووە ئەمنیش ژنەکی عارەب بینم، لۆ نایێی وەکی پیاوان بمکەیە ولداش زاوای خۆت..! لەدری خۆم گۆتم : خوایە ئەو بەرایە چیە تووشم بووە..! ویستم لێی دەربازبم و گۆتم : خوا کەریمە، بابزانین کوودەبی..!!
وەختەکی سکرتێری سەرۆک وەزیرانی گۆتی : کاکە فەرموون، جەنابی سەرۆک وەزیران دەرێ : با بەڕێبکەوین و بچین شوێنی ئیسراحەتی من و نانەکی بخۆین، وەزیری کارو کاروباری کۆمەڵایەتی گۆتی : وەرە پێکەوە بچین ! گۆتم : ئەدی تڕومبێلەکەی خۆم چلێبکەم، گۆتی : سویجەکەی بدە ئەو پاسەوانەی من با ئەو باژوا، گۆتم : لۆ ئەتوو پاسەوانیشت هەیە ؟ گۆتی : ئەدی، پێشی ببمە وەزیر ڕاوێژکار بووم..! سویجەکەم دا پاسەوانەکەی و لۆلای تڕومبێلەکەی وی چووین و سوار بووین..!
کەتینە دوو کاروانی تڕومبێلەکانی سەرۆک وەزیرانی، لەوانەیە بیست هەتا بیست و پێنج تڕومبێل دەبوو، هەمووی لاگزسی ئاخیر مۆدیل بوو، لەیەک ترافیک لایتی ڕانەوەستاین، سۆربا کەسکبا زەردبا لێمان دەدا، تەماشام کرد ترافیک هەبوو کەسک بوو، بەران نەیان دەهێشت شوفێرەکان بجولێن و پێشیان لێگرتبوون، هی واهەبوو سەری بادەدا، هی واش هەبوو پەنجەی هەردەشەقاندو جوونی دەدا..!!
گەیشتینە جێی ئیسراحەتی سەرۆک وەزیرانی، هەتا برێی جێیەکی گەورەبوو، چار دەوری دیوار بەند کرابوو، بەکۆنکریتی ئەستوورو گەورە، سەر قوڵغەکان هەمووی چەکدار بوون، بەسەتان کامیراش هەرواسرابوون، هەتا چاوت حوکمی دەکرد داروبارو سەوزایی بوو، زۆربەی ئەو دارانەی لێیبوو، بەهەموو تەمەنی خۆم نەمدیتبوون، پێدەچوو لەدەرێ هینرابن، بە جادەکی داچووین، ئەوبەرو ئەوبەری داری برند بوون، تەماشا ناو دارەکانم کرد پڕی مامزو تاوس و چین و ماچین بوو، زەلامەکم دیت سێ چار سەی ڕەشی برندی پێبوو، دیاربوو پیاسەی پێدەکردن، سەرم لەجامی بردبووە دەرێ و تەماشا ئەو مارە شاهانەم دەکردو خەیارم ڕۆیشتبوو، لەهیکڕا سەیەک خۆی لەدەست کابرای ڕاپوچڕی و خۆی هەردا لۆلای من و یەک بەدەنگی ڕەوی و گۆتی : عەو عەو..!!!
مایتی...[1]