سکرتێرە 76

وەرامی جەعۆم داوەو نوسیم : پاقڵاوەکەی مەکڕە ! دەبینم نامەکیدی ناردو نوسیتی : زۆر مەمنون کە مەسرەفی بیپسی و پاقڵاوەکەت هاویشتە سەرەخۆت، بەران با پاقڵاوەی بە فستقی بی، بەگیزی نەینی و شەرمەزارمان بکەی..! لەدری خۆم گۆتم : یاڕەببی خوایە زۆر شوکر، باشە ئەمن ئەو کەرەی کوو لەو قوڕەی دەرینم ؟ لەو خەیارانە دابووم، مام عەوڵا گۆتی : ئەرێ ئوستاج ئەتوو گۆتت ئیشەکم هەیە، بچین یان نا ؟ گۆتم : بچین باشە، پارچە عاردەکم هەیە بزانم نایفرۆشم و هەندە پارە قەردارم، بەشکو بیدەمەوە ! میرۆ گۆتی : ئەوجە عارد ئێستا کا پارەی دەکا ئوستاج، ئەدی ئەوانە گوویان لەهەموو چشتی نەکرد، ئەو میللەتەیان هیناوە سەر گوفەکی هەی خوا بیانگری، ئەگەر دەمزانی ئەوانە شۆڕشی لۆ بازرگانی و پارە پەیداکردن و میللەت ڕووتاندنەوەی دەکەن، کوو عومری خۆم لەو چیاو چۆلەی بە زایع دەدا ! مام عەوڵا گۆتی : قورعان بەهەقت بە ساعێبت، ئەوەی ئەوانە لەگەر ئەو میللەتەیان کردیە کافر بەکافراتی خۆی نایکا..! گۆتم : مام عەوڵا خەتای خۆشمانی تێدایە، کاکە هەتا ئەو میللەتە نقەی نەکاو دەنگی لێوەنێ ئەوانە هەرئەوها دەکەن، مام عەوڵا گۆتی : ئەشەدەن و بیللا قسەی تووە، گۆتم : هەستە بابڕۆین هەستە، ئەو ئیشە بە قسان تەواو نابی، میرۆ قیت بۆوەو گۆتی : دەفەرموون بابڕۆین ! مام عەوڵا گۆتی : میرۆ خێرت دەگاتێ ئەگەر نێی ؟ میرۆ گۆتی : لۆ نێم ؟ مام عەوڵا گۆتی : میرۆ ئەمن دەتناسم، ئەتوو لەجەعۆی کەمتری، ئەتوو لۆ هەر ئیشەکی بێی گووی تێدەکەی، ئەوجە یان لێرەبە هەتا دێینەوە، یان سەر هەرگرەو بڕۆ لایەکی ! میرۆ دایە کەراتی و گۆتی : دەوەڵلاهی مادام وەت لێکرد هەردێم ! مام عەوڵا ئەعسابی نەماو گۆتی : بەنامووسم نایێی ! میرۆ گۆتی : دە بەنامووسی زێخەی دێم..! مام عەوڵا شێت بوو، گۆتی : هەی ڕۆژی سەت جار لەگۆڕی توو و زێخەی بەم ! دەرێم نایێی یەعنی نایێی ! گۆتم : کاکە واز لەو هەرایەی بینن و ناچین، بابە نەخۆمکاو نەئەو عارد فرۆشتنەم کا..! میرۆ گۆتی : ئوستاج خۆت مشەوەش مەکە، خۆم و خۆت دەچین، با عەوڵا بچی سەرەکی لە ست زولەیخای کەونە قلی بدا، مام عەوڵا غاریدا گۆپاری و میرۆ دەرپەڕی، مام عەوڵا هاواری کرد : ئەگەر پیاوی ئەوجارە پێ لەو مارەی دەنێی ! میرۆ سەری لە دەرکەی حەوشێ هینا ژۆرێ دەستی بەو گۆ#ڕانیە#ی کرد، ئەوی دەرێ : زولەیخایە زولەیخایە جەرگی دەرهێنام..! مام عەوڵا غاریدا دەرێ، هەتا ئەو چوو میرۆ سواری تڕومبێلی بوو و تێی تەقاند..! مام عەوڵا هاتەوە ژۆرێ و گۆتی : خوایە سەبرم بدەی لەو کەربازاڕیەی ! گۆتم : کاکە خۆت مشەوەش مەکەو تازە ناچین، گۆتی : ئەوە بەڕاستە، کوو ناچین، یەک دەققە با چشتەکی بەسە پێم وەکەم دەڕۆین، مام عەوڵا کراشەکی لەپێکردو گۆتی : فەرموو بابڕۆین..!
سواری تڕومبێلی بووین و گۆتم : ئەرێ مام عەوڵا چبکەین لۆ مەسەلەی جەعۆی ؟ گۆتی : بەخۆشم نازانم، سەرم لێشێوایە، وەڵلاهی ئەمن بەس خەمی ئیمانۆکەمە، دەزانم دری بەو گێپەڕاکەستوورەی وەیە، دەستی خانێشی تێدایە ! گۆتم : بەشکو بتانین بەهەموومان چارەکی ببینینەوە، گۆتی : ئەوجە برێ ئێ ! گۆتم : ئێ ! گۆتی : ئەوە دەبینم دونێ، ئیمان و خانێ سەرو تەنەکەیان پێیە، نازانم لەکێیان پەیاکردبوو، گۆتم : ئەوەچیە ؟ گۆتیان وەڵلا لیسی لۆ کۆتری دروست دەکەین، عەزمان لێیە دووسێ جۆت کۆتران ڕاگرین..! گۆتم : ئەتوو بەڕاستتە ؟ گۆتی : ئەرێوەڵلا، هێشتا چنەبووە، بوک و خەسوو بووینە کۆترباز..! بەو قسەی زۆر پێکەنیم، دوایێ گۆتم : دەزانی چیە ! گۆتی : چیە ؟ گۆتم : ئەمن سەرەکی لەمارێ جەعۆی دەدەم و لەگەرەوی و داکی دادەنیشم، بزانم ئەو ژن تەراق دانانەی جەعۆی لەسەر کۆتریە یان چشتی دی لەگۆڕێیە ! گۆتی : کاکە ئەوە ئەتووم کردە وەکیل، بەران توخوا عیسابی ئیمانی وەکی کیژی خۆت بکە، کورە کیژ گەلە گوناعن و غەدریان زۆر لێدەکرێ، وەڵلا ئەو نانەی دەیخۆم ئی کیژەکانە، هەر مارەک کیژی تێدابی بەرەکەتی تێدا، هەر کیژیش بەهانای داک و بابی دێ..! لەگەر ئەو قسانەی مام عەوڵای هەردوو چاوم پڕی ئاو بوو، هەقی وایە ئەو قسانەی مام عەوڵای بە ئاوی زێڕی بنووسرێن..!

لەگەر مام عەوڵا لە نوسینگەکی کڕین و فرۆشتنی عاردی لاماندا، سەلاممان کرد و چاک و چۆنیمان لەگەر کردن، دوو زەلامی خڕکەرەی تەنگەستور دانیشتبوون، ئێکەکیان کرەکی خاوینی لەبەربوو، ئەویدیش قاتەکی ڕەشی خەتخەتی، بەگەرمی بەخێراتنیان کردین، دیاربوو ئەمنیان دەناسی، سەرو ئاویان داینێ و ئێکیان گۆتی : مامەستا سوڕ دەزانم ئەتوو قاوەی دەخۆیەوە، با قاوەکی قەزوانیت لۆبکەم ! گۆتم : کوو دەزانی قاوەی دەخۆمەوە ؟ گۆتی : ئیشەکە ئەوهایە مەسوول و پیاوی دەورەمەند هەتا قاوە هەبی چایەومایەی ناخۆنەوە، مام عەوڵا گۆتی : دەمادام وەیلێهات قاوەکی لۆ ئوستاجی بینەو چایەکی ئەسعەد بەگیش لۆمن بینە ! کابرا گۆتی : وەڵلاهی دەبی ببوری بەس چای سەفەریمان هەیە ! مام عەوڵا گۆتی : کوو ئەو چای سەفەریە ئەمنی کووشتیە، بڕواتان هەبی بەس چایە نیە، ئەوجە خاسەتەن وەکی لە قۆغە کارتۆنەکان دەکرێ، تام قاقەزی جغارەی لێدێ..! ئەوی کرە خاوینەکەی لەبەربوو، گۆتیە من : فەرموو ئەمرکە با خزمەتت کەم، مەزرەعەی زۆر عەنتیکەمان لەکنە، پێم باشە جەنابت مەزرەعەکی بکڕی لە دە دۆنمی کەمتر نەبی، ڤیللەکەش لەسەر هەزار مەتری دروست کرابی، مەسبەح و تەرتیباتی جستانی و هاوینی هەبی، ئەگەر بەس خانیشت دەوێ، ئەوە خانی هەزار مەتریمان هەیە، لەسەری هەتا بنی مەڕمەڕە، هەرچی درت بچتێ تێیدایە، فڕنی و جێی گۆشت و کەباب برژاندنی تێدا، مەسبەحیش ئەو هەر حسابی نیە..! ئەمنیش هوردە هوردە زەردەخەنەم لۆ دەکردو سەرم دەلەقاند، مام عەوڵاش سەری سوڕمابوو، هەر تەماشای من و کابرای دەکرد..!
قاوەکەیان لەپێش دانام و فڕەکم لێدا، کابرا گۆتی : قاوەکەی تەواوکەو دەچین جەولەکی ناو مەزرەعەکان دەکەین، ئەگەر بەدرت بوو خێر عەلەخێر، ئەگەر بەدریشت نەبوو، ئەوە دەچین تەماشا ڤیللەکان دەکەین ! قات لەبەرەکە گۆتی : وەڵلا مامەستا ئەمن لەعاسمانێ لەدووت دەگەڕام ئەتوو لەعاردی کەتیە بەردەستیمە ! گۆتم : یا ئەڵلا خێر دەبرێ بزانم چ ئیشت بەمن بوو ؟ گۆتی : ئەوی ڕاستی بی عاردەکی تیجاری دەرەجە ئێک هەیە، هەرچەند خەریکم نامدەنێ، بڕوات هەبی ئەگەر بارەخانەکی لەسەر دروست بکەی حیسابکە بیری نەفتێت هەیە، ئەو ئیشە بەتوو دەکرێ، ئەتوو دەتانی وەبکەی بمدەنێ، وەعدبی سەتا سی قازانجیت بدەمێ..! گۆتم : سەتا سی کەم نیە ؟ گۆتی : بابە دەیکەمە چل، بەس ئەتوو لۆم بکە..! قاوەکەم تەواو کردو بەینەکی دامام، کر لەبەرەکە ئیشارەتی دا ئەویدی و گۆتی : لۆی زیادکە، گۆتی : کاکە ئەوە چل و پێنج ! مام عەوڵا سەری لەبن گێی نام و گۆتی : فرسەتە لۆیان بکە، هەتا حەفت پشتت دەحەسێنەوە..! کابرای کر لەبەر گۆتیە برادەرەکەی لەمامەستای گەڕێ با ئەوشۆ فکرەکی لێبکاتەوەو سبەینێ وەراممان بداتەوە، ئەویش گۆتی : سبەینێ، سبەینێ..!
قومە ئاوەکم خواردەوەو گۆتم : براینە وەڵلا ئەنگۆ سەرچیخ چووینە، ئەمن نە مەزرەعەم دەوێ و نەڤیللە، نە معامەلەی عاردی تیجاریش لۆ کەس دەکەم ئەگەر نەک سەتا چل و پێنج، هەمووشم لەسەر تاپۆکەن، بڕوا بکەن ئەمن لەو ئیشانە دوورم، لۆیێ لەوەزیراتیش نەمام، ئەمن هاتیمە عاردەکم هەیە بەشکو لۆم بفرۆشن، چونکە هەندە پارە قەردارم و دەمەوێ قەردەکان بدەمەوە ! وەکی ئەو قسەم کرد هەردووک سارد بوونەوەو چ قسەیان نەکرد، هەر ئەوەندە نەبی گۆتیان کا ڕەقەمی عاردەکەمان بدێ بزانین چەندی دەینی ! ڕەقەمەکەم دانێ و لەسەر خەریتەکی دیواری بەینەکی تەماشایان کرد و پێکەوە خوندە خوندەکیان کرد، دوایێ ئێکیان بەمۆبایلی لەگەر سێ چار مەکتەب عەقاریدی قسەی کرد، ویستی قسەم لۆ بکاو تێم بگەینی چەندی دەکا، میرۆ ڕاست بەژۆرێ کەت و گۆتی : ئەوجە سەلامو عەلەیکوم، کونە باشن، ئەعوارتان ؟ ئەمن و مام عەوڵا تەماشایەکی ئێکدیمان کرد، مام عەوڵا گۆتی : میرۆ ئەوە لەچ دەگەڕێی ؟ میرۆ گۆتی : وەڵلاهی ئەمن شارەزاییەکی باشم هەیە لەکڕین و فرۆشتنی عاردی، دەترسێم گەوادەک لەوسەریڕا بێ و فێرتان لێبکاو لەبن دەستتان دەرینی..!

دوو زەلامەکە سۆر هەرگەڕان و تەماشا ئێکدیان کرد، میرۆ ئاگای لەمن نەبوو، ئەمن چاوەکم لێ قوچاندن و وام تێگەیاندن کەوا ئەو زەلامە ئاقری زۆر تەواو نیەو لێی مەگرن، ئەوان هەرچەندە ئەو شتەیان زۆر نەچووە مێشکی بەران لەبەر دری من چ دەنگیان نەکرد..! وەلحاسر پاش بینەو بەردەکی زۆر گۆتیان ئەوعاردە بیکوژی و بیبڕی لە چار دەفتەری زیاتر ناکا، ئەوجە ئەتووش ئەگەر دەفرۆشی ئەوە هەتا کڕیارەکت لۆ ببینینەوە، ئەگەر ناشفرۆشی هەرکەس لەماری خۆی، گۆتم : دەکرێ سەبرەکی یەک دوو ڕۆژیم لێبگرن و خەبەرتان بدەمەوە ؟ گۆتیان : لۆ ناکرێ، بەران بەگێیمە بکە، لەزۆر نوسینگان دایمەنێ، دوایێ عاردەکەت لێدەشکێ و کەس دینارەکی پێنادا، گۆتم : کاکە زۆر مەمنون و مارتان ئاوابی، هەستاین بڕۆین، میرۆ موداخەلەکی کردو گۆتی : کاکە، ئەمن با لەئێستاوە چشتەکتان پێبرێم، وەبی سبەینێ گلەیی نەکەن ! دوو زەلامەکە تەماشا ئێکدیان کردو گۆتیان فەرموو برێ..! گۆتی : ئەو کابرایە کە ئەو عاردەی دەفرۆشی، کەونە وەزیرەو دەرکرایە، بەس خوا دەزانی لەسەر چ دەرکرایە، لەگە عوکمەتیش عەداوەتەو بەینی تەواو نیە، سبەینێ لەوانەیە بگیرێ یان دەست بەسەر مورک و ماریشی دابگرن، لەوانەیە ئەوەی ئەو عاردەشی لێبکڕی تووشی کێشەبی و کاکە کێ دەرێ نایگرن و ناشیکوژن، ئەوجە خینی خۆتان لەملی خۆتان..! ئەمن و مام عەوڵا ئەعسابمان نەما، ئاخر توخوا ئەو قسەیە میرۆی کارخانچی دەیکا، بەو قسەی عاردی منی کردە زبرو خۆر..! مام عەوڵا گێی میرۆی گرت و تووند بایداو گۆتی : بەس بزانم کەنگی فێرە قسە دەبی، هەی تۆڕی، ئەوجە لە دوو خۆی ڕاکێشاو بردیە دەرێ ! ئەمن نەمزانی چ بە زەلامەکان برێم، هەر ئەوەندە نەبی گۆتم کاکە زۆر مەمنون و هاتمە دەرێ..! مام عەوڵا میرۆی ڕەزیل کردو بەڕێی کرد، ئەمەش سواری تڕومبێلی بووین بگەڕێینەوە، مام عەوڵا لەخەمی میرۆی لێوی خۆی دەکرۆشت، گۆتی : خەمی جەعۆی خوێڕی نەبڕاوە ئی میرۆشی هاتە سەرێ، باشە برێ ئەوە ئەمەی لەکێ دیتەوە ؟ گۆتم : هەبی و نەبی بەدوومان داهاتیە، دەنا کوو دەزانی ئەمە لەو نوسینگەی دانیشتینە ! گۆتی : وەتی وەبیرم دێ ئەو کەر پیاوە بەس کێشەی لۆمن دروست دەکا، گۆتم : گێمەدێ، لەهەر مارەکی کەر پیاوەکی ئەوها هەیە، گووی لەهەرچی چشتی باش هەیە بکا..!
گەیشتینەوە لای مارێ، مام عەوڵا زۆر تەکلیفی کرد پێکەوە نانی نیوڕانێ بخۆین، گۆتم : ئەتوو وەرە کنەمە، دەنێرم ماسیەک بێ، گۆتی : ناوەڵلا هەرکەس لەماری خۆی، خواحافیزیمان لێککردو چوومەوە مارێ، نوێژی نیوڕانێم کردو نانم خوارد و بڕەکم ئیسرەحات کرد، وەختی عەسرێ تەلەفۆنەکم لۆ جەعۆی کردو گۆتم : لەکێی ؟ گۆتی : وەڵلا واشفتیەکی دەکڕم و دێمەوە مارێ، لۆ نایێ پەلکە شفتی بڕنێنیەوە، بەقسەی پیرداود گوو گەورەی بی ئیشی ڤیاگرای دەکەی ! گۆتم : ئەوجە ئەتوو چت هەیە هەتا پەلکە شفتی بڕنێنیەوە، هەیەو نیە خۆت و گونت، بەران مادام وەتگۆ وا شۆڕ دەبمەوە لۆلای مارینگۆ با دوو قسان پێکەوە بکەین ! گۆتی : زۆر باشە وا بە ئۆدێی دەرێم چایەکی دەرەجە ئێکمان لۆلێنێ، گۆتم : ئەزیەتی مەدە شفتیەکە بەسە، گۆتی : لۆ ئەتوو وەتێدەگەی شفتی لۆیێ دەکڕم ئەتوو بخۆی ؟ گۆتم : ئەدی لۆ دەکڕی ؟ گۆتی : لۆ مارێ مام عەبدوڵای خەزورم دەبەم، ئیمانم گوجیلکی بڕەک دێشێ دەرێن شفتی لۆ هەندێ باشە..!

گۆتم : کوو دەزانی گوجیلکی دێشی ؟ گۆتی : دەنگ و باسی ماری مام عەبدوڵلای نەقل موباشر دەگاتە من ! گۆتم : دەباشە، زوو وەرەوە، ئەمنیش وا بەرەو مارینگۆ دێم، گۆتی : پاقڵاوەو بیپسیەکەت کڕیە ؟ گۆتم : هەی گێل و وێل، دیارە ئەو خەبەرەت پێنەگەیە، ئیشەکە گرێ و گۆری کەتیتێ ! گۆتی : کوو ئەمن نەمزانیە ! گۆتم : دیارە دریان نەهاتیە پێت برێن، ئێستا ئیمانی توو هەتا بە گوجیلکی ڕادەگا، فاتە ڕەشەشی بەژان کەتیە ! جەعۆ بەینەکی داما، دوایێ گۆتی : دەترسێم میرۆ مارمیلۆق تێکی دابی ! گۆتم : ناوەڵلا، ئەو بەستەزمانە هەر تێکەرنەبوو، دەتوو لەهەندێ گەڕێ، بابێمە مارێ قسەکی لێدەکەین، گۆتی : ئەمن وا بەڕێکەتم لۆ مارێ، خوات لەگەر..
دەوری جغارە خۆرەکی پێچوو، هەتا گەیشتمە مارێ جەعۆی، لەدەرکەم داو جەعۆ کردیەوە، مشەوەش دیاربوو، گۆتی : تێمبگەینە ئیشی من و ئیمانی من لۆ تێکچووە ؟ گۆتم : دەلێگەڕێ با سەلامەکەی بکەم ! گۆتی : عەلەیکەسەلام بەخێراتی لۆ تێکچووە ؟ گۆتم : کورە دەبا بێمە ژۆرێ هەی مارت خرانەبی ! گۆتی : وەرە ژۆرێ ئیشەکە لۆ تێکچوو ؟ گۆتم : یاڕەببی خوایە زۆر شوکر، ئەمن لەگە کێ لێم قەومایە !
چووینە ژۆرێ، دیتم داکی جەعۆی دانیشتیە و قاپە داندۆکەکی لەپێشە، هەندە ئاوی تێکردیەو یاغر یاغر داوێتە دەوی، چاوی بەمن کەت قیت بۆوە، سەلامم لێکردو بەگەرمی وەرامی دامەوە، گۆتی : یاخوا بەخێر بێی وەزیرۆکێمە، مارو مندار کوونە، هەموو باشن ؟ گۆتم : باشین، لەو خوایەی بەزیادبی.! جەعۆ کورسیەکی لۆ هینام و هەر لەحەوشێ دانیشتم، بەخێراتنیان کردم و داکی جامە ئاوەکی لۆ هینام، خواردمەوەو هەناوم فێنک بۆوە، جەعۆ گۆتی : دەوجە لۆم باسکە پڕۆژەکەی من لۆ لەتەندەری دەرنەچوو ؟ گۆتم : با داکیشت بێ دانیشی، گۆتی : ئۆدێ، کچێ ئۆدێ، دەوەرە دانیشە، گدۆ ئیشی پێتە ! گۆتم : کەرە لەکن داکت مەیکە فشقیات ! گۆتی : داکم لەوەی چوویتە دەرێ، لەسەت ئاوی دایەو پێشی تەڕنەبووە..! داکی هات دانیشت و گۆتی : دەبرێ وەزیرۆکێمە برێ، بزانم چت پێیەو چ هەردەڕێژی..! گۆتم : ئەمن لۆ جەعۆ چوویمە داخوازی ئیمانی کیژی مام عەوڵای، هەندەی نەمابوو پێکبێ، کێشەک دروست بوو، ئەوجە ئەو کێشە بەنگۆ چارە دەکرێ ! جەعۆ گۆتی : گدۆ، دۆغری بڕۆ ناو مەسەلەکەی ! گۆتم : کاکە، دەمەوێ ئێستا بەهەردووکان لۆم ڕۆنکەنەوە و بزانم جەعۆ ئەتوو لۆ دوو ژنت تەراق دایە، چونکە لەگەڕەکێ وا براوبوویتەوە ئەتوو لەسەر کۆتران ئەو ژنانەت تەراق دایە ! گۆتی : دەزانم خەرک وەدەرێ، بەران بڕوا بکە، لەسەر کۆتران نەبووە، ڕاستە ئەمن کۆتر بازم و عومری خۆم لەگەر تەیروتاری بردتە سەری، بەران پیاوەک ئەگەر پیاوبی کوو ژنی بەقوربانی کۆتران دەکا ! گۆتم : دەمادام وەیە لۆم باس بکەن، بزانم لۆ دەستت لەو ژنانە کردتەوە ؟ جەعۆ گۆتیە داکی : ئۆدێ، دەئەتوو ئی یەکەمی لۆ باسکە، ئەمن ئی جەولەی دووەمی لۆ باس دەکەم ! داکی گۆتی : بابچم دوو چایان بینم، ئەوجە دێمەوە بەدورو درێژی لۆت دەگێڕمەوە، داکی جەعۆی هەستاو چووە ناندینی و هەندی دەمێ دوو چایەی لۆ هیناین، قۆدیە شەکرەکیش لەگەر هینابوو، گۆتی : ئەوە شەکرم تێنەکردیە، گۆتم : نەکوو بێ شەکری بخۆیەوە، ئەگەر بەشەکریش دەخۆیەوە بەخۆت تێکە..! گۆتم : ئەی دەستخۆش، ئەمن بێ شەکر دەخۆمەوە، چایەکەم ڕاکێشاو لە پێشە خۆم دانا، داکی جەعۆی دانیشت و گۆتی : دەوجە بالۆت باس بکەم، ئی یەکەم خزمەکی دووری خۆم بوو، هەستام لۆی چوومە داخوازی، پێکهاتین و هەموو چشت بڕاوە، جەفعەرۆکە پێی گۆتن : ئەمن لە ئێستاوە پێتان دەرێم ئەمن داکم لەسەر سەری خۆم دادەنێم و هەتا مابی خزمەتی دەکەم، سبەینێ قبور ناکەم ئەو ژنە بێ و برێ دەبی داکت دەرکەی لەمارێ ! کیژە گۆتی : ئەمن لۆیێ دێم هەتا خزمەتی داکت بکەم و پێراوی لەسە چاوی خۆم دانێم..! باسەرت نێشینم، مارەکی ڕێک و پێکمان لۆ کیژەی داناو گۆستمانەوە، چار پێنج مانگی ئەوەلی دەتگۆ پەلیکە، ئەو مارەی وەکی گوری لێکردبوو، دوایێ هوردە هوردە دایە تەمبەری، لە ژۆری خۆی نەدەهاتە دەرێ و هەر دەنووست، نانەکی لۆ ئەو پیاوەی عازر نەدەکرد، بەسەری لمۆزی قسەی لەگەمن دەکرد، هەر لچ و لێوی لێهەردەهینام، چەندی قسەم لۆکرد، داکەکەم کیژەکەم ئاگات لەمارو مێردت بی، ژیان ئەوهانیە، بەگێی نەدەکردم، ڕۆژەکی جانتای بەقۆری وەکردو گۆتی : دەچم سەرەکی لەماری بابم دەدەم، جەفعەرۆکەش بردیەوە، ڕۆژەک بووە دوو ڕۆژ، دوو ڕۆژ بووە عەفتەک، ژنە هەرنەهاتەوە، جەفعەرۆکە چووە دووی، ژنە گۆتی : یان ئەمن یان داکت، بمکوژی و بمبڕی لەگە داکت دانانیشم ! شێخ و مەلای دنیایێ نەما پێی وە نەنێین، فایدەی نەبوو، ژنە نەهاتە ڕایێ و ڕایێ، جەفعەرۆکە دری گەلە بەخەم بوو، هەر دالغەی لێدەداو جغارەی بەبا دەکرد، گۆتم : کوڕم وەرە ئەو خانیەی دەفرۆشین، دوو خانی سەت مەتری پێ بکڕە، ئێک لۆ خۆت و ژنت ئێکیش لۆمن، قیڕسی ئەمن بەتەنێ دەژیم، بەس ئەتوو هێلانۆکەت لێ تێکنەچی ! جەفعەرۆکە گۆتی : دایە ئەوە ئەتوو بەڕاستیتە، چما ئەمن ژنی هەموو دنیایێ بە گۆزینگەکی توو دەدەم، کوو درم دێ ئەتوو بەتەنێ بنێرمە خانیەکی، ئەدی داک لۆ داکە..! وەڵلا هەستا دەستی لە ژنەی کردەوەو کوو ڕۆیی نەیهیناوە..!

گۆتم : باشە داک و بابەی کیژەی چیان نەگۆ ؟ جەعۆ گۆتی : وەڵلا ئەوان تیخ تیخەیان دەدا، دەیانگۆ ئەمە کیژی خۆمان لەدەشتێ نەدیتتەوە هەتا بێ خزمەتی ئەو پیرەژنەی بکا ؟ گۆتم : ئێ خۆ ئەوان یەکەمجار دەیانزانی داکت لەگەتووە، جەعۆ گۆتی : ئەرێوەڵلا دەیانزانی، بەران دوایێ لێم هەرگەڕانەوە، گۆتم : دەی خێری تێدا ئیشاڵلا، مادام لەبەر داکت ئەو ئیشەت کردیە قەت نادۆڕێنی، دەوجە باسی ژنی دووەمم لۆبکەن، بزانم کووت هینا ؟ جەعۆ گۆتی : وەڵلاهی گدۆ برێ کووم هینا ! گۆتم : کوو ؟ گۆتی : دەبا لۆت باس بکەم..! داکی جەعۆی گۆتی : ئەرێ ڕۆرە وەزیرۆکێمە هەندە داندۆکت لۆنەینم باوێیە زارت ؟ گۆتم : ناوەڵلا دەستت خۆشبی ناخۆم، جەعۆ ئەتوو مەسەلەی ژنی دووەمم لۆ تەواوکە ! گۆتی : ئەمن پاش ژنی یەکەم دەوری سارو نیوەکی بێ ژن بووم، لەبە ئۆدێی درم نەدەهات ژنێ بینمەوە، دەمگۆ نەکوو دیسان تووشی کێشەبم، برادەرەکم لەگەربوو لەمەیدانی کۆتران، جارجار پێکەوە تێکەولێکەمان دەکرد، ڕۆژەکی گۆتی : ئەرێ ئەوە کووە ژنێ ناینیەوە ؟ گۆتم : وەڵلا برێم چ، قسمەت و نسیب، گۆتی : کیژەکی خزمی خۆمان هەیە زۆر ڕێک و پێکە، لۆنایێی بیهینی، گۆتم : بابە وازم لێبینە، ئەمن جارەکیدی ژنێ ناینمەوە، گۆتی : ئەو کیژەی بینی پارووت دەکەوتە ڕوونی ! کاکە سەری لەبن سەرینام و وازی لێنەهینام هەتا قەناعەتی پێکردم، ئەمنیش لەگەر ئۆدێی باسم کردو داکم خەنی بوو، دوو سێ ڕۆژی پێچوو چووینە پێش، ئەلهەقی بەکراسی بەری پێشکێشیان کردم، کیژەم گۆستەوەو چووینە شارع عەسەنی (شهر العسل -مانگی هەنگینی) و ماوەکی خۆشمان برد سەری، سێ چار مانگمان بەخۆشی بەڕێکرد، هەر کۆترەک، تەیرەک، بازەکم بکڕیبا، ئەو ژنە پرسیاری دەکرد، بەچەندت کڕیە، بیفرۆشی چەندی دەکا ؟ ئەمنیش پێم دەگۆ، ئەمن شکی هیچم نەدەکرد، بەدر سافی خۆم وەرامم دەداوە، ئێ کاکە پیاو کوو دەبی چشتی لەژنی بشارتەوە، ڕۆژەکی دوو جۆتە کۆترم کڕیبوو بە چار دەفتەری، هینامەوە مارێ و دامنابوو خێرەکی زۆر لێببینم، خێزانم پرسی ئەوانە گرانن، گۆتم : زۆرت ئاگا لێبن، ئەوانە بایی چار دەفتەرینە، ئیشاڵلا دوو سێ ڕۆژیدی دەیانفرۆشمەوەو بیست سی وەرەقەی قازانج دەکەم، وەختی نیوڕانێ بوو، نانمان خوارد و داکم گۆتی : کوڕم ئەمن دەچم سەرەکی لە بەهیەی خوشکم دەدەم، گۆتم : دایە با بتبەم ! گۆتی : ناوەڵلا کوڕم لەسەری کۆرانێ سواری کۆستەری دەبم، ئەتوو لۆ ئەزیەت دەخۆی، داکم عەبای هاویشتە سەر شانی و ڕۆیی، ئەمنیش پارام داوە بڕەکی چاوم گەرم کەم، وەختەکی لەگەر بانگی عەسرێ بەخەبەر هاتم، تەماشام کرد خێزانم دیارنیە، گۆتم : بزانە چوویتە مارە جیرانان..! هەر چاوەڕێم کرد نەهاتەوە، بووە بەرەبەری هێوارێ، وەختەکی ئۆدێ هاتەوە، سەلامی کردو گۆتی : ئەدی کا ڕێزانۆکە ؟ گۆتم : وەڵلا دایە لەخەوێ هەستام دیارنەبوو، نازانم کێوەچووە، هەرنەهاتەوە، گۆتی : ئێ کوڕم دە لەمارە جیرانان بپرسە، هەستام و چووم پرسیم، گۆتیان نەهاتتە ئێرە ! بگەڕێ بسوڕێ نە دەنگی هەبوو نەڕەنگ..! زۆر مشەوەش بووم، هەستام سواری تڕومبێلی بووم و چوومە ماری خەزورم، گۆتیان وەڵلا نەهاتتە ئێرە ! گۆتم : یاڕەببی دەبی کێوە چووبی، گەڕامەوە مارێ، داکم گۆتی : هێشتا نەهاتتەوە، وەزعم بەتەواوی تێکچوو، گۆتم : ئۆدێ دەچمە خەستەخانەو مەخفەری پۆلیسان بزانم سەروسۆراغەکی ناکەم، بەو شەوەی هەمووم کرد هیچم دەست نەکەت، گەڕامەوە مارێ، دیتم ماری خەزوریشم هاتینە ! گۆتیان : چبوو هیچ سەرو سۆراغ نەبوو ؟ گۆتم : ناوەڵلا..!

مایتی[1]