سکرتێرە 84

بووە غەربەغەرب و هەرایەک نەبیتەوە، هەرکەس لەڕاستەخۆ قسەی دەکرد، هەبوو دەستخۆشی لە گوڵاڵە خانی دەکرد، هەشبوو هەزار جوونی دەدایێ و بە خائین و خۆفرۆش و بێ نامووس ناوی دەبرد، دادوەر هەر بەچەکووچان لەمێزی دەدا، کەس گێی نەدەدایێ، گوڵاڵە خان تەماشا منی کردو زەردەخەنەکی کرد، تەماشا هەردوو چاویم کرد پڕی فرمێسک بوون، ئەمنیش لەتاو ئازایەتی چاونەترسی ئەو ژنە بەوەفایەی قوڕگم پڕی گریان بوو، فرمێسکم لە هەردوو چاوم هاتە خوارێ و لەبنی درمەوە سوپاسی گوڵاڵە خانم کردو تێرتێر دوعام لۆکرد..!
گوڵاڵە خانیان بردە دەرێ و ناویان لە لیستی شایەدەکان سڕیەوە، پاشان کۆمەرە کەسەکیدیان هینا لەناو وەزارەتی و لەدەرێ، شایەدیان لەسەرمن دەدا، ئەمن هەر نەمدیتبوون و نەمناسیبوون، ئێک دووەکیان لە لوبنان هینابوو، گوایە ئەمن تێکەو لێکەی تریاک و پارە سپی کردنەوەم لەگەر کردینە..! پاش بینەو بەردەکی زۆر پارێزەرەکەم قسەی کردو گۆتی : جەنابی دادوەر بەبرینی پشتی جەعفەری و بە ئیفادەی گوڵاڵە خانیدەردەکەوی کەوا ئەو موەکیلەم بێ تاوانەو غەدری لێدەرێ، ئەتوو برێی لەو وراتەی بەس ئەو کابرایە گەندەڵی کردبی هەتا ئەوهەموو بەزمەی پێبکرێ ؟ لۆ ناچن ئەوانە بگرن کەنان نەبوو بیخۆن ئێستا ساحێبی ملیۆنەها دۆلارینە، دەیان کۆمپانیای زەبەلاحیان هەیەو داست و چەپ کەتینە ناوێ و داهاتی ئەو میللەتە بەستە زمانەی دەخۆن ! جەنابی دادوەر هەرچی هەبووەو هەرچی لەدژی ئەو پیاوەی گۆترایە هەمووی درۆیەو ئەسل و ئەساسی نیە، بەبەڵگەی ئەو میمۆریەی پێشکەشم کردبوو، کە هەرکەسەک ئەو وەزیرە لەگەری دانیشتبی یان سەری لێدابی، یان تەلەفۆنی لەگەر کردبی هەمووی یان بەڤیدیۆی گیرایە، یانیش دەنگی تۆمار کرایە، تەماشای ڤیدیۆیەکانی ناو وەزارەتی بکە بزانە وەزیر شەڕی بە سکرتێرەی دەفرۆشی یان سکرتێرە وازی لێناینی، تەماشای ڤیدیۆی کامیرەی ماریان بکە، بزانە دایە جووجە بەخۆی هاتیە حەوش و ماری لۆ بشوا یان وەزیر داوای کردیە، ببینە بزانە سبەینێ لە وەزارەت کوو سزای ئیداری دەدا چونکە چوویتە ماری و ماری لۆ دەشوا، ڤیدیۆیەکانی دی وەزیرەکان ببینە بزانە چیان کردیە لەلوبنان و کوو بەهۆی ئەو ڤیدیۆیانە شڕبڵ بەسەفتە دۆلاری لێبەرداینەوە، گێبدە شڕبڵی بزانە چدەرێ وەکی تەلەفۆنی لۆ وەزیری کردیە..! دادەر توڕەبوو، گۆتی : مەرێ وەزیر، برێ تاوانبار..! پارێزەرەکەم گۆتی : ئەگەر ئەوە تەوانبار بی هەموو دنیا تاوانبارە، تاوانبار ئەوانەن کە بێدەنگن لە ڕاست ئەو هەموو ستەمەی دەکرێ..! تکایە جەنابی دادوەر بەچاوی هەق و دادپەروەری تەماشا ئەو کەیسەی بکەو زۆر تەئکیدبە ڕۆژەک دادێ بەرامبەر خوای گەورەڕادەگیرێی و هەق و حیسابت لەگەر دەکرێ لەسەر ئەو حوکمەی بەرامبەر ئەو وەزیرەی دەریدەکەی..! دادوەر گۆتی : پێویست ناکا باسی هەق و حسابی لەگەرەمە بکەی، ئەمەش بایی خۆمان خوای دەناسین..!

پارێزەرەکەم هاتەوە لەجێی خۆی دانیشت، بەینەکی باش ناو ژۆری دادگای بێدەنگ بوو، لەهیکڕا دادوەر لەماسینجەری نامەکی لۆ هات، نامەکەی خیندەوەو بڕەکی داما، دوایێ گۆتی : ئەو دانیشتنە سعاتەک تەئجیل دەبی، پشووەکی دەدەین و هەندەک قسەی لەگەر داواکاری گشتی دەکەم و دێینەوە..! ئیدی دادوەرەکان هەستان و پاشی ویش ئەوانەی لەوێبوون هەموو هەستان و ئەمن و پارێزەرەکەم ماینەوەو ئەمنیشیان بردە ئەو ژۆرە گچکەی لەناو دادگای لۆ ئەو کەسانە داندرایە کە گیراینە، گۆتمە پارێزەرەکەم کە لەگەرم هاتە ژۆرەکەی : ئەرێ مام عەوڵا دەنگی نیە، نە لەدادگای، نەلەهیچ جێیەکی ؟ پارێزەرەکەم بەینەکی بێدەنگ بوو، گۆتم : لۆ قسان ناکەی ؟ گۆتی : چت پێبرێم، مام عەوڵا وەزعی باش نیە ! گۆتم : لۆ ؟ گۆتی : وەڵلا داوایان لێکردبوو بێ شایەدیت لەسەر بدا، نەهاتبوو، زۆریان هیناو بردبوو، ڕازی نەببوو، ئیدی بەتۆمەتی دەست درێژی کردنە سەر زێخەو پارە خواردن و دزی، وا لە حەپسخانەی پاری دایتەوەو لەوانەیە لە دوو توو مەحکەمەی بکەن و خوا بزانی چەندی حوکم دەکەن..! سەرو درم گیراو بەتەواوی خەفەتبار بووم لۆ مام عەوڵای، ئەتوو بڕۆنێ ئەو پیاوە لەسەمن چی بەسەرهات و تووشی چبوو، گۆتم : مارو منداری وەزعیان کووە ؟ گۆتی : وەڵلا جار جار سەریان لێدەدەم و ئاگام لێیانە، مندارەکانی تووش باشن و خەمت نەبی، ورەیان بەرزە، ئیشاڵلا بەدری وان دەبی، گۆتم : خوا کەریمە، بەس ئەتوو کوی تێدەگەی ؟ گۆتی : حوکم دانت مسۆگەرە، بەران نازانم چەند سارە، خۆت حازرکە لۆ دە هەتا پازدە ساری..! بەران ئەگەر ئەو حوکمەش دەرچوو، ئەمە لە دادگای تەمیز تەمیزی دەکەینەوە، زۆر تەئکیدبە ئەو بڕیارە لە دەرێی دادگای دەرچووەو دادگا هیچی پێناکرێ، غەیری جێبەجێکردنی ئەو بڕیارەی..!
سعاتەک پێچوو، ئەمنیان بردەوە ژۆری دادگایی ناو ژۆری دادگای پڕی نەفەربۆوەو، سێ دادوەرەکە و داواکاری گشتی دانیشتنەوە، پاش تەماشا کردنەوەی فایلەکەی من لەلایەن سێ دادوەرەکەیی و چپەچپەکردنەکی زۆر لەگەر ئێکدی، دادوەر دەستی بە قسان کردو گۆتی : بەگێرەی مادەی ئەوەندەو ئەوەندەو لەیاسای فران و فیساری..! ئەمن چونکە دیقەتم دابووە بڕیاری کۆتایی دادگای، زۆر بەهوردی گێم نەدەدا مادەکان و یاسایەکان، دەرچووی کۆلیژی یاساش نیمە هەتا لێی بزانم، لۆیێ هەر چاوەڕێی ئەوەم دەکرد بزانم چەند سار حوکم دەکرێم..!
دادوەر بەینەکی دی قسەی کردو گۆتی : بڕیارمان دا بە پازدە سار حوکم کردنی و جێبەجێکردنی ئەو حوکمە..دادگا کۆتایی پێهات..!

چونکە چاوەڕێی ئەو بڕیارەم دەکرد، خۆم تێکنەداو گۆتم : خوایە کێم هەیە لەتوو زیاتر..! تەماشام کرد پارێزەرەکەم و هەندەکی دی لەوانەی لەوێبوون، بێتاقەت بوون، چونکە دەیانزانی بێ تاوانم.. سێ دادوەرەکە چوونە دەرێ و دوو پۆلیس هاتن قۆریان گرتم و ئەمنیان بردە دەرێ، ئەو چەند کەسەکەی پێشتر بە پاسەکەی ئەمنیان هینابوو، تەماشایەکیان کردم و تێر پێکەنین و لێیاندا ڕۆیشتن، پارێزەرەکەم هاتە تەنیشتم و گۆتی : ورەی بەرنەدەی، داوای تەمیزی ئەو بڕیارەی دەکەینەوەو ئیشاڵلا شتەک بە شتەکی دەکەین..! گۆتم : هەرگێش مەدێ، هەرچی بێتە پێشم پێی ڕازیمەو زۆر تەئکیدبە تەسلیمیئیرادەی کەس نابم، ژیانەکی پێنج و دوو ڕۆژی ئەوەی ناینی پیاو خۆی لۆ سەرشۆڕ کا..! گەیشتینە حەوشەی دادگایی و تڕومبێلەکی جام ڕەش ڕاگیرابوو لۆمن، هەتا بمبەن و تەسلیمی حەپسخانەم بکەن، دوو پۆلیس و پارێزەرەکەم لەگەرم بوون و سێ پۆلیسیش لەکن تڕومبێلەکەی ڕاوەستابوون، گەیشتمە نێزیک تڕومبێلی دیتم، گوڵاڵەخان وا لەبن سێبەری دارەکی ڕاوەستایە، تەماشا من دەکات و فرمێسک بەهەردوو چاوی دێنە خوارێ، دەستم لێبرند کردو بەسینگم وەناو گۆتم هەتا دەمرم مەمنونی توومە، پەنجەی شهادەی برند کردە عاسمانێ و گۆتی : خوایەک هەیە، کوو دروستی کردی، ئەوهاش دەتبینی و ڕزگارت دەکا..!
ویستم سواری تڕومبێلی بم، خێزانم و مندارەکانم گەیشتنە من، تێکڕا باوەشیان پێکردم و لە هۆڕژنی گریانێیان دا، بەدەستە خۆم نەبوو، هەردوو چاوم پڕی فرمێسک بوون و بەڕوومەتم دا هاتنە خوارێ، ئەتوو بینە بەرچاوت کەسەکی بێتاوان لە مارو منداری داببڕێ و لەکونی حەپسخانەی بپەسترێ، تەنها و تەنها لەبەر ئەوەی نایەوێ دزو گەندەڵ و بێ ڕەوشت بی و داوای کەمترین مافی خۆی و خەرکی بکا، کە ژیانە..! گۆتمە مندارەکان ورەتان بەرزبی و خەمێ مەخۆن، بابتان بێ تاوانەو سەربەرز بن کە بابتان نەخائینەو نەدزەو نە بێ ئەخلاقە، کو دەزانم خوا بەهەقە، ئەوهاش دەزانم بەهانام دێ..!
وەختەکی شەمسەدین گەندەبایی و پیرداود بێددان و مەجید دۆنکی و کۆمەرەکیدی هاتن، هەموو باوەشیان پێکردم و گریان و دوعای خێریان لۆ کردم، گۆتم : ئاگاتان لە مام عەوڵای نیە ؟ گۆتیان : وەڵلا وا لە حەپسخانەیەو هەبزانە وەکی توو درا دادگای، گۆتم : ئەمن دەبی بڕۆم، ئەگەر مام عەوڵاتان دیت پێی برێن ئیمانی بداتە جەعۆی، جەعۆ زۆر مەردو بە وەفایە..! گۆتیان : بەچاوان پێی دەرێین و هیچ خەمت نەبی، پارێزەرەکەم گۆتی : ئەمن پارێزەری مام عەوڵایمە، ئەمەلم زۆرە ئەو بەرببی، ئەو فەقیرەو هیچی لەگەر هیچ دانیە، داوەکە بەتەنێ لۆ تووبووە..!
خواحافیزم لە هەمووان کردو مندارەکانم تێر ماچ کردو گۆتم : زۆرتان ئاگا لە داک و بی، بەگێی بکەن و تووشی کێشەو دۆخەی نەکەن و زۆریشتان ئاگا لە خیندنێ بی، سەریشتان لەناو خەرکی برندبی و بەقسەی کەس بڕوا نەکەن..! سواری پاسەکەیان کردم و سلفیان لێداو بەڕێکەتین لۆ حەپسخانەی، ئیدی لەگەر سواربوونی پاسی ژیانەکی تازە لۆمن دەست پێدەکاو جارێ بەس خوا دەزانێ ئەو ژیانە کووە..!

پاسەکە بەڕێکەت لۆ حەپسخانەی، ئێک لەو پۆلیسانەی لەگەرم بوو، زۆر سوحبەتچی دیاربوو، هەر بەڕێکەتین، پاکەتی دەریناو گۆتی : با سەرو جغارەی بەباکەین کاکۆکە، پاکەتی لۆ ڕاگرتم و گۆتی : ڕاکێشە ! گۆتم : ببورە جغارەی ناکێشم.! گۆتم : دەترسێم چایەش نەخۆیەوە ! گۆتم : با چایەی دەخۆمەوە، بەران بێ شەکر، گۆتی : برێ ئاوی گەرم دەخۆمەوە، بەس بەمن برێ چایەی بێ شەکر تامی چیە !؟ چدەنگم نەکردو وەرامم نەداوە، جغارەکەی بەدەوی وەناو چەرخەکی لێدا، گۆتی : برێ ئێ ! گۆتم : ئێ، گۆتی : ئەو چەرخەی دەبینی ؟ گۆتم : بەرێ ! گۆتی : ئەوە لە عەویجەی لۆم هاتیە ! گۆتم : دیارە خزمت هەنە لەوێندەرێ ؟ گۆتی : ناوەڵلا، ئەوە قەولە بچم لەوێ ژنەکی عارەب بینم، ئەوجە کابرایەکیان لۆ دیتیمەوە، لەوێ موختارە، چار کیژی هەیە، گۆتیتی پێی برێن بابێ بەناوکەوی، کیهانی بەدری بوو، با پەلی بگری و بیبا، ئەوجە بابی ئەو کیژانە ئەو چەرخەی بەدیاری لۆ ناردیمە، وەکو نیەت پاکیەک بەرامبەرە من..! پۆلیسەک لە پێشەوە دانیشتبوو، ئاوڕەکی داوەو گۆتیە پۆلیسەکەی : واز لەو کابرایەی بینە، دنیات تێگەیاندیە ژنێ دەینم ژنێ دەینم، هەمووش فشەیە، وەتی وەبیرم دێ وەدەرێ، وەڵلاهی باپیرم عەمەد لەقەبری قیت بیتەوەو ژنێ بینی، ئەتوو ناینی، ئەو جغارەش بکوژێنەوە، ئەمەت خنکاند لەگەر چڕە دووکەرێ..! پۆلیسی ژنهین چ قسەی نەکرد، جغارەکەی کوژاندەوەو بێدەنگ بوو، ئەمنیش سەرم نوی کردو فکرم لەوەی دەکردەوە کوو کاتی خۆم لە حەپسخانەی ببەمە سەری، گەیشتمە ئەو فکرەی باشترین چشت کتێب خیندنەوەیەو دەبی خۆم بەکتێبی خەریک بکەم، وەختەکی سەرم برند کرد دیتم پۆلیسەکە تەماشام دەکا، ئەمنیش تەماشام کردەوە، هەر چاوی دانەنا، ناچار ڕووم وەرگێڕاو تەماشا لایەکی دیم کرد، وەختەکی تەماشام کردەوە ئەویش هەر تەماشای دەکردم، ئەمنیش چاوم دانەنا، گۆتم بزانم چیدەوێ.! هەر تەماشای دەکردم و هەر تەماشام دەکرد، بەینەکی باش ڕۆیی، وەختەکی لەهیکڕا یەک بەدەنگی گۆتی : هوو..! هەر زەندەقم چوو، ئەویش هەتا هێزی تێدابوو لەقریتەی پێکەنینێی دا، گۆتم : یاڕەببی خوایە، ئەو بەرایە چیە تووشم بووە، گۆتمە ئێک لە پۆلیسەکان کاکە خێرتان دەگاتێ ئەو بەرایەم لەکۆر کەنەوە..! ئیدی خۆیان لەپۆلیسەکەی تووند کردو گۆتیان چیدی قسەی لەگەر بکەی بە معاونی دەرێین، باشبوو ئەویش وازی لێهینام و بێدەنگ بوو..!
زۆر ناخۆشە ئەتوو درت یەک پارچە خەمبی و زەلامەک لەوسەریڕا بێ و فشەی خۆی باوێتە سەرەتوو، زۆر خۆشە هەموو کەس تێکەر ژیانی تایبەتی کەس نەبی و میزاجی نەگری، ئەمن لەو خەیارانە دابووم، وەختەکی پۆلیسەکەی پێشەوە گۆتی : زۆرمان نەمایە، هەونکە دەگەینە جێ، ئەمن لەجێیەکی وا دانیشتبووم دەرێم هیچ لێدیار نەبوو، ئاخر جامی پاسەکەی هەمووی ڕەشبوو، دەرێت نەدەبینی، دیاربوو تایبەت دروست کرابوو، لۆ گۆستنەوەی گیرایان..!
گەیشتینە پێش حەپسخانەی، پۆلیسەکەی پێشەوە جامی کردەوەو نوسراوەکی دا پاسەوانەکەی پێش دەرکەیی و گۆتی : ئێکەکمان هینایە تازە حوکم درایە، ئەویش تەماشا نوسراوەکەی کردو ئیمزایەکی لەسەر کردو پاشان ژمارەی پاسەکەی مەی نووسی، لەگەر ناوی هەموومان، ئیمزایەکیشی بە پۆلیسەکەی کردو ئەوجە گۆتی بڕۆنە ژۆرێ..!
پاسەکەمان چووە ژۆرێ و بەینەکی ڕۆیی، تەواوەک چووینە پێش، ئەوجە ڕایگرت، پۆلیسەکان هاتنە خوارێ و ئەمنیشیان هینا خوارێ، ئاوڕەکی چار دەورم داوە، دیتم دیواری دەرێی حەپسخانەی زۆر برندە و سەریشی بە سیمی دڕکاوی داپۆشرایە، ئیدی قۆریان گرتم و ئەمنیان بردە ژۆرێ، چووینە ژۆرێ و ڕایانگرتم، نوسراوەکەیان لۆ بەڕێوەبەری برد، بڕەک پێچوو پۆلیسەک هات گۆتی : بابێتە ژۆرێ، چوومە ژۆرێ و ڕاوەستام، سەلامم نەکرد، نەوەک وەرامم نەدەنەوە، ئاسان نیە بە پازدە سار حوکم درابی و سەلامی بکەیی و وەرامت بدەنەوە، بەڕێوەبەر تەماشا نوسراوەکەی دەکرد، پاشان سەری سوڕاندە لای پەنجەرەیی و بەینەکی تەماشای دەرێی کرد، ئەوجە سەرەکی باداو هەناسەکی قۆری هەرمژی و هینایەوە دەرێ، ئاوڕی لۆلای من داوەو گۆتی : نازانم برێم بەخێراتی یان نا ؟ ئێرە جێی ئەوەی نیە بەو کەسانەی دەگیرێن برێی بەخێراتی..! خوای گەورە لۆت ئاسان بکاو بەهانات بێ، ئەوجە ئیمزایەکی لەسەر نوسراوەکەی کردو گۆتی : بیبەنە ئەو دیوی، با ئیجرائاتی پێویست چیە لۆی بکرێ و جێیەکی باشیشی لۆ دیاری بکەن، با تێکەری هەموو کەسی نەبی..! پۆلیسەکە تەحیەکی لۆ کردو گۆتی : بەسەرچاو گەورەم..! ئیدی دوو پۆلیس ئەمنیان لەوێ بردە دەرێ و بردمیانە جێیەکی دی، ئیش و تەرتیباتی نوسراوەکەی تەواو بوو، ئەمنیان بەڕێکرد لۆ لای ژۆرێ، هەتا گەیشتینە ژۆرەکی، گۆتیانە من جێت ئێرەیە..! ئەمنیش چوومە ژۆرێ دیتم چار کەس لەو ژۆرەینەو پاریان دابۆوە، وەکی چاویان بەمەکەت هەستانەوە، سەلامم کردو وەرامیان داوە، پۆلیسەکان جێیەکیان لۆمن دیاری کردو گۆتیان ئێرە جێی تووە، ئەوان چوونە دەرێ، ئەمنیش بەبێدەنگی چووم لەجێی خۆم دانیشتم، ئەو چار کەسە بەخێراتنیان کردم و وەرامم دانەوە، ئیدی نە ئەوان دەنگ و نە ئەمن دەنگ..!

بەینەکی پێچوو، ئێکەکیان هاتە تەنیشتم و گۆتی : کوی ؟ گۆتم : باشم بژی مەمنون..! گۆتی : خێرە لێرەی ؟ گۆتم : لۆ دەپرسی ؟ گۆتی : هەتا ماوەک پێش ئێستا ئەتووم دەدیت لەتەلەفزیۆنی وەکو وەزیر دەردەچووی، هەونکەش وا لەتەنیشتە من کەتی، پێم عەنتیکەیە ! گۆتم : هیچ پێت عەنتیکە نەبی، ژیان ئەوهایە، ڕۆژەک وەزیری و ڕۆژەکیش گزیری..! گۆتی : ئەو قسەی جەنابت تەواوە، بەران لە وراتیمە وەزیر بە ئاسانی ناکەوتە حەپسخانەی، قاتی شۆڕشەک کودەتایەک لەدەرێ نەکرایەو ئەمە نەمان زانیبی..! گۆتم : نەخێر هیچ نەکرایە، ئەوڕۆ هەر وەکی دونێیەو دونێش وەکی پارو پێرار..! سەرەکی باداو گۆتی : ئەمن ناوم سەعدیە، ئەوەش ناوی ڕەحمانە، ئەوێهێش ناوی بەختیارە، ئەوەی چارەمیش ناوی بورهانە، ئیشاڵلا هەر چارمان شتەکی ناکەین ئەتوو درت بێشی، بەس پێم برێ چەند سار حوکم درای ؟ گۆتم : پازدە سار..! گۆتی : وەی بابە، ئەوجە ئەوە بەچ تەواو دەبی..! گۆتم : خوا گەورەیە، لەکن خوای چاو قووچانەکە..! گۆتی : حەزناکەم لێت بپرسم لەسەرچ گیرای، چونکە ئەوە ناخۆشترین پرسیارە کە لێمان دەکرێ، گۆتم : ڕاستە قسەی تووە، کێشەنیە ئەگەر بزانی ئەمن لەسەر چ گیرایمە، گۆتی : ناوەڵلا لێی گەڕێ با نەزانم، خەمی خۆم کەم نیە، خەمی تووشی بێتە سەرێ..
کابرا لەتەنیشتم هەستاو چۆوە کن سێ برادەرەکەی، ئەمنیش لەسەر جێی خۆم پارم داوە و فکرم لەوەی دەکردەوە، دەبی کەنگی پارێزەرەکەم حوکمەکەی تەمیز کاتەوە، بەشکوو بەردەبم، یانیش حوکمەکەم بڕەک سووک دەکرێ..! چونکە ماندی بوون، بەو داڵغانەوە خەوم لێکەت..!
وەختەکی یەک لەوانەی لەگەرم بوون هەریستاندم، گۆتی : هەستە پارە نانەکی بخۆ، نان هاتیە ! ئەمنیش هەستامەوەو سوپاسم کرد، دیتم سنیەکیان دانایە برنج و ترشی لەسەرەو سەر برنجەکەش بەشی پێنج کەسی مریشکی لەسەرە، فەرموویان لێکردم، ناوی خوامان هیناو دەستمان پێکرد، چونکە ڕۆژی یەکەمم و جەمی یەکەمم بوو لەگەریان، بەشەرمەوە دەستم لۆ خواردنەکەی دەبرد، ئێکەکیان هەستی پێکرد، گۆتی : مامەستا شەرمی پێناوێ، بەدری خۆت بخۆ، بەران ئاگات لەخۆبی، با قەرەو نەبی، بەس ئەتوو بەمن برێ لۆوەها لاواز بووی ؟ گۆتم : ئەمن چار پێنج مانگ دەبی گیرایەو هەر لەبن لێکۆرینەوەی بووم، جاری وابووە بە دە ڕۆژ ڕۆناکیم نەدیتیە..! هەر چاریان بەینەکی تەماشا ئێکدیان کردو هیچ قسەیان نەکرد، هەر ئەوەنەبی گۆتیان دەتوو جارێ نانەکەی بخۆ، خواکەریمە لۆ ئەو قسانە..!
نانەکەمان خواردو چایەشمان لەسەر کرد، ئێکیان گۆتی : بالۆت باس کەم ئەمن لۆ گیرایمە، گۆتم : ئەگەر برینت دەکولێتەوە لۆم باس مەکە، گۆتی : ناوەڵلا ئاساییە، ئەمن مارم لەگوندیە، ئیشم فەللاحەتیە، سێسەت چارسەت دۆنم عاردم هەیە، هەموو سارێ دەمچاندو پێ مەشغول دەبووم، لۆ جارەکی لەگەر شوانەکی لێک گیر نەبووین، مەڕی هینابووە ناو دەغری، گۆتم : کاکە وەڵلاهی گوناحت دەگاتێ، ئاخر خوا قبور ناکا، ئێک لەوی ئێک لەمن وەرگەڕاینە ئێکدی، لەبەختی من کەس لەوێنەبوو لێکمان کاتەوە، ئەوەی لەوێبوو شەیتان بوو، شەیتانیش بەنزینی بە ئاگری دادەکا، گۆپارەکم ڕاوەشاند بەتەپلی سەری کابرای کەت، کوو پێیکەت، کەتە ئەو گۆڕەیی و حەیاتی لێبڕا، بینەو بەردەو مەحکمەو ڕاکێشان، کاکی توو بیست سار حوکم کرا، ئەوە پێنج سارە ڕایدەکێشم و خوا کەریمە لۆ پازدە ساریدی..!
مایتی[1]