قوماش 88
نووسینی: #ئوسامە جەمیل#

ڕۆژی مهاجە(مواجەهە)ی هات و ئەمە جێمان پێ جێنەبوو، درمان لەسەر هەزاری لێیدەدا، ئاخر ناهەق نەبووین، ئەمە لە مردنەکی مسۆگەر گەڕابووینەوە، خزم و کەس ئێستا دێن و دەبینن ئەمە زندینە و لەسەر پێی خۆمان ڕاوەستاینە، ئاسان نیە، هەر لەناو ژۆرەکەی دەهاتووین و دەچووین، وەختەکی دیتمان دەرکە گەورەکە کراوە و خەرک وا هێدی هێدی دێتە ژۆرێ، هەیە زەمبیلۆکەکی بە دەستە و هەیە کیسە و هەشە گووشی پڕی چشت، سەرمان لە دەرکەی ژۆرەکەی بردبووە دەرێ و چاومان لە کۆرانە دور و درێژەی دەگێڕا کەنگی خزم و کەس و کار بە دەر دەکەون، وەختەکی لە دووری تەماشام کرد وا داکم و بابم دێن و شێرۆشیان لەگەرە، چەند درم خۆشبوو بە داک و بابم، دە هەندەش بە دختۆر شێرۆی، ئەو مرۆڤە سادە و ساکارانە پیاوی ڕۆژی تەنگانەیە، تەئکیدم داکم و بابمی بە شڕە لادەکەی خۆی هینایە و نەیهێشتیە تووشی بینە و بەردەی گەراج و مەنشەئەی بن، لەمن نێزیک بوونەوە و چاویان بەمن کەت، داکم لە جێی خۆی کەت و نەیتانی بڕوا، ئەمن غارم داو باوەشم پێکرد، ئەو قوڕگی گیرابوو، وەها سامگرتی ببوو، نە قسەی پێدەکرا و نە هەناسەی باش دەهات، بەینەکی ئەوها ماوەو بەس تەماشا هەردوو چاوی دەکردم و دەستی بە ڕوومەت و شانم دادەهینا، دەیوویست تەئکیدبی لەوەی کەوا ئەوە ئەمنم مایمە و لە سێدارەی نەدرایمە! هاتەوە سەرەخۆ و پڕم دا هەردوو دەستی بابم و تێر تێر ماچم کرد، گریان و خۆشی تێکەر ببوون و نەماندەزانی چبکەین، شێرۆ باوەشی پێکردم و گۆتی: سەرلووس، وەڵلاهی ئەتوو لە قورپی گەڕایەوە، هەتیم چەند بە بەختی، پشیلەی عەفت ڕوعیش هەرئەوهایە! داکم سەر و دری بۆوە و گۆتی: دەی دەی قوون کەتی بزانە مۆری بە ئیعدام کردنی لێنادەی! شێرۆ گۆتی: بزانە هەموو ئەبوغرێبم لێ تێناگەینی، خەتای منە بە تڕومبێلی خۆم، ئەتووم هینایتە ئێرە! بابم دەستی لە ملی شێرۆی کرد و گۆتی: وەڵلا هەربەخۆت پشت و پەنامی!
شێرۆ دەستی دا کەل و پەلەکان و چووینە ژۆرێ، بابم و داکم و شێرۆ سەلامیان لە هەموو گیرایەکان کرد و پیرۆزباییان لێکردن کەوا لە مردنەکی مسۆگەر قورتار بووینە، لە قولینچکەکی ژۆرەکەی دانیشتین و داکم سەری بە سینگم کردبوو، هەرچەند دەیکرد نەیدەتانی لێم دوور کەویتەوە، بابم جانتای کردەوە و قورئانەکی دەرینا و دایمێ، گۆتی: کوڕم ئەوە دیاری گەلاوێژخانی داکی بازۆیە، گۆتی: لۆی ببەن و زۆر سەلامی لێبکەن، گۆتم: خوا خێری بنووسی، ئەدی خزم و کەس و جیران کوونە؟ گۆتی: هەموو باشن و زۆر سەلامت لێدەکەن، دوعای خێریان لۆ دەکردی، گۆتم: دایە ئەتوو کوی؟ گۆتی: دەبی لە دووری توو کووبم کوڕم، نەمری و نەژییە، بەران هیچمان پێناکرێ و دەبی شوکری خوای بکەین، گۆتم: ئەدی ماری مام حەمەدەمین و خەجەی کوونە؟ داکم گۆتی: وەڵلا باشن، خەجە خۆی کووشتیە هەنکی لۆت بگریێ، هەر چاوەکی ئەوەندە لێکردیە، گۆتم: دیارە هەر مێردی نەکردیە؟ گۆتی: ناوەڵلا کوڕم نەیکردیە! داکم تورەگەکی ڕاکێشا و کردیەوە، پڕی ناوی چەرەزات و لوقم و کولیچە بوو، دەریهینا و لە پێشی دانام، گۆتی: دەبخۆ کوڕم چشتەکی بخۆ، ئەو کولیچانەم بە دەستی خۆم لۆ کردی، ئەو چەرەزاتە دیاری حاجی سمایل سۆفی جیرانمانە زۆر سەلامیان لێدەکردی و دوعای خێریان لۆ دەکردی، گۆتم: یاڕەبی باش بن و خوا بیانپارێزی، ئەنگۆ بەمن برێن هەورین کووە، هەورین؟ هەموو بێدەنگ بوون و هیچ قسەیان نەکرد، نەک هەرئەوەندە دیتم ڕەنگیشیان سۆر هەرگەڕا، شێرۆ گۆتی: وەختی هەندێ نیە، دەتوو ئەو گووشەی بکەوە بزانە داکت چی لۆ هینای! گۆتم: بابە لۆ قسەکی ناکەن، پێمبرێن بزانم هەورین کووە؟ داکم گۆتی: کوڕم، هەرچی بەسەرت هات لەنیوچەوانی هەورینی بوو، ئەتوو ئێستاش وازی لێناینی و هەر فکری لێدەکەیەوە! گۆتم: بابە، ڕاست و ڕاستم پێبرێ، هەورین مایە یان نا؟ بابم بەینەکی بێدەنگ بوو، ئەوجە سەری برند کرد و گۆتی: مایە، بەران، گۆتم: بەران چ؟ گۆتی: بەران فەوزیە خان نەمایە و مرد! گۆتم: ئەتوو بەڕاستتە؟ گۆتی: ئەرێوەڵلا کوڕم، لە خەمی توو و هەورین و قادرە فەندی بەزگی داو مرد، هەزار ڕەحمەت لەگۆڕیبی! لە بنی درم ئازارم پێگەیی و فرمێسک لە هەردوو چاوم هاتە خوارێ، گۆتم: انا للەواناالیە ڕاجعون! هەزار ڕەحمەت لەگۆڕی، ئەتوو بڕۆنێ ئەو خێزانە چیان بەسەر هات، هەزار حەیف و مخابن لۆ فەوزیە خانی بە ڕاستی ژن بوو! بابم دەستی لەسەر شانی دانام و گۆتی: چبکەین کوڕم، ژیان ئەوهایە و دەبی شوکربین، ئەمان خەبەرەکیدیش هەیە با بتدەمێ! گۆتم: ئەو خەبەرە چیە بابە؟ گۆتی: ئەمە مارمان لە پشت خەستەخانەی جمهوری نەمایە و چووینەوە شاوێسی! گۆتم: لۆ؟ گۆتی: وەڵلا کوڕم، کە ئەمری لە سێدارە دانت دەرچوو، بەیانیەکی مەفرەزەکی دائیرەی ئەمن هاتن بەخۆو بە شۆفەرەوە، شۆفەرەکیان لە مارێ داو ڕووخاندیان، گۆتیان: ئەو مارە مارە موخەڕیبە و دەبی بڕوخێندرێ!

زۆر خەمم بەو خەبەرە ناخۆشانە خوارد، کە لۆیان باسکردم، لە هەمووی ناخۆشتر ئەوەبوو کە گۆتیان: نەیانهێشت مارەکەش دەربینین و خانیەکەیان بەسەر کەلوپەل و مارەکەی داڕوخاند، هەردوو چاوم پڕی ئاوبوون و گۆتم: خوایە دەبی ئەو ڕژێمە لۆ ئەوها لە میللەتی خۆی بکا، باشە ئەگەر لەگەر میللەتی خۆی باشبی و دەستی بەسەری دابینی و خزمەتی بکا، خەرک لۆ بەرامبەری ڕادەوەستی و ملی لەبەر ملی دەنێ! لەو خەیارانە دابووم داکم دەوی گووشیکردەوە و یەک دوو قات کراس و بێجامە و دوو سێ خاولی جوانی دەرینا و گۆتی: ئەوە لۆتووم هینا، نەک هەرئەوە داکم فلچەی دەوو ددانیشی لەبیر نەکردبوو!
زۆرمان قسەی خۆش کرد و یادگاری گەڕەکێمان گێڕاوە و هەندەجار پێدەکەنین و هەندەک جاریش چاومان پڕی ئاو دەبوو، شێرۆ لە قسە خۆشەکانی خۆی نەدەکەت، بە منیشی گۆ: هەتا دەمرم مەمنونی توومە چونکە لەبن ئەو لێدان و کووتانەی ناوی منت نەدا، خۆ ئەگەر ناوی منت بدا ئێستا ئەمن لەجێی تووبووم، گۆتم: باشە دختۆر شێرۆ، ئەتوو کوو ئەوەت بە خەیاری داهات تڕومبێلی لە دووری ڕابگری، ئەوجە بچیە ئەو مارەی لۆ تیمارکردنی بازۆی، باشە کە چوویە ژۆرێ کوو فکرت کردەوە لەگەر بازۆی بەسەر بانی ئاودیوو بی و لەوێ بڕۆی؟ گۆتی: ئەو پرسیارانە مەکە، چونکە دختۆر شێرۆ بەخۆی ئیشی خۆی دەزانی و هەر بەخۆشی دەزانی چدەکا و چناکا! گۆتم: ئەشەدەن و بیللا ڕاست دەکەی، وەڵلا برام ئەتوو بەخۆت ئیشی خۆت دەزانی، گۆتیە من: خەمی داکت و بابت نەبی، ئەمن عەفتەی دوو ڕۆژ سەریان لێدەدەم و چیان پێویست بی لۆیان جێبەجێ دەکەم، بابم گۆتی: ڕاست دەکا، وەڵلا کوڕم هیچ قسوری نەبووە، یا ڕەبی خوا بیپارێزی!
هەتا نەیانگۆ مهاجە تەواو داکم و بابم و شێرۆ هەرنەستان، خەرکەکە دری نەدەهات گیرایەکانی بە جێبێلی، لۆیێ ئاخیری پۆلیس هاتن و بە زۆری خەرکەکەیان بردە دەرێ، بابم لە هەستانێ هەشتا دیناری هاویشتە باغەرم، ئەو پارە لۆ من زۆر باشبوو، چوکە لەناو بەندیخانەی دوکان هەبوو و دەتتانی پێداویستی خۆی بکڕی، داکم و بابم تێرتێر ماچیان کردم و ئەمنیش دەستەکانیانم ماچ کرد و لەگەر شێرۆش باوەشمان پێککرد و ئیدی ڕۆیشتن، خەرکەکە هوردە هوردە ڕۆیشت و ئەمەی زیندانی بەتەنێ ماینەوە، دەرکە گەورەکانی بەندیخانەیان پێوەداو هەرکەسە چۆوە سەر جێی خۆی، هەتا درەنگی شەوێ ئەو جلک و کەلوپەلانەمان هەرگێڕ و وەرگێڕ دەکرد کە لۆیان هینابووین، هەرکەسە و هەندەک لەو خواردن و شیرنیەی لۆی هاتبوو دایناو تێکەرمان کرد و پێکەوە خواردمان، بە ڕاستی ئەو ڕۆژە خۆشترین ڕۆژم بوو کە لەو ماوەی گیرابووم تێیدا ژیام، ناخۆشیش بوو چوکە مردنی فەوزیە خانی داکی هەورینی و ڕوخاندنی خانیەکەمان برینەکی قۆری لە هەناوم کرد!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!