قوماش 125
نووسینی: #ئوسامە جەمیل#
گۆتم: دەتوو جارێ لێبگەڕێ با ئەمن بازۆی ببینم! یەکسەر دوو سێ مستی لە مێزی دا، چەکدارەک هات و گۆتی: بەرێ مامەستا! ئەویش گۆتی: بڕۆ بازۆی بینە! چەکدارەکە چووە دەرێ و بڕەک پێچوو هاتەوەو بازۆشی لەگەر بوو، بازۆ سەلامی کردو ئەمەش چاک و چۆنیمان لەگەر کرد، ئەمن باوەشم پێکردو یەک دوو ماچم لێکرد، گۆتم: کوڕم ورەت بەرزبی، ئیشاڵلا ئەوڕۆ سبەکی بەردەبی! گەلاوێژ خان گۆتی: وەی لۆت کۆرەبم بازۆ، باشە بێتاقەت نەبوو؟ بابم گۆتی: بێتاقەت نەبوو، بەران زۆر توڕەبوو، ئاگری لە نیوچەوانی دەباری، ئاخر ئاسان نیە برادەری دونێت بتهاوێتە ژۆرێ لەسەر جاشەکی خۆفرۆش! شێرۆ گۆتی: ئەدی ئیشی کوردی هەر ئەوها فشەنیە! گەلاوێژخان گۆتی: وەڵلاهی دەقاودەق قسەی تووە دختۆر شێرۆ! دختۆر شێرۆ هەوایەکی چووە کوونە کەپوویی و گۆتی: وەکی دەرێم دختۆر شێرۆ ئیشی خۆی بەخۆی دەزانی و بەخۆشی دەزانی چدەکاو چناکا، دایە عاجی فشەی پێدێ! داکم سەرەکی لەقاندو گۆتی: دختۆر شێرۆ ڕجات لێدەکەم قسەم پێمەکە، ئەمن بەخۆم ئەعسابم فوولە! گەلاوێژ خان گۆتی: یەعنی درم خۆشبی بازۆ بەردەبی؟ بابم گۆتی: سەتاسەت بەردەبی، لەمنی وەرگرە!
هێوارەکی شێرۆ لە خەستەخانەی هاتەوەو لایدا مارێمە، پاش سەلام و کەلامی، گۆتیە بابم: ئەوڕۆ ئیسعافەک هات و ئەو سەرۆک جاشەیان هاویشتە ناوێ و گۆتیان دەیبەینە تورکیایی و لەوێش ڕەوانەی ئەلمانیا یان فەڕەنسای دەکەین! بابم گۆتی: وەزعی کوو بوو؟ شێرۆ گۆتی: باشە، لەو ماوەی دەیانهینا قاوشەیی و دوو کەس دەچوونە بن پاری و پیاسەیان پێدەکرد! بابم گۆتی: خوای گەورە لە زوڵمی ئەو کەسانە بمانپارێزی، شێرۆ گۆتی: ئەمن وا تێدەگەم ئەو کابرایە چابیتەوە، بە ئاسانی واز ناینی! بابم گۆتی: ئەمە خوامان هەیەو خوای گەورەشمان بەسە! داکم گۆتی: دەبی هەورینۆکە کووبی و ئێستا چبکاو چنەکا، شێرۆ گۆتی: وەڵلاهی ئەو هەورینەش چنیە! بابم گۆتی: لۆ؟ گۆتی: دەبایە چەند سارە فرسەتی هیناباو گووللەکی لە تەختی نیوچەوانی ئەو خۆڕیەی دابا، پێم نارێن لە دیار چ دانیشتیە، ئەگەر ئەو جاشەی بکووشتبا، هەنگی هەورین هەرچی لێ هاتبا سوومان نەدەبۆوە، خۆ کوری دری مەی دادەمرکاند! بابم گۆتی: کوڕم ئەوەش ئاسان نیە، وەتێدەگەی ئەو سەرۆک جاشە ئەوەندە گێل بی هەورین بە سووک و سانایی بیکوژی!
لەو قسانە دابووین، زیڕەی ئیستاپی تڕومبێلەکی هات لەپێش دەرکەیی و یەکسەر لە دەرکەی درا، شێرۆ گۆتی: ئەنگۆ لێرەبن، ئەمن دەچم، خۆ مشەوەش مەکەن و ئیشاڵلا هیچ نیە! داک و بابم ترسان و مشەوەشیان پێوە دیار بوو، ئەوەی هەستی بە هیچ نەدەکردو سەری لەو وەزعەی دەرنەدەچوو ئەمن بووم، ئەمن هێشتا نەهاتبوومەوە سەرەخۆو نەمدەزانی وەزعەکە چیە، هەرچەندە زۆر جار بروسکەک لە مێشکی دەدام و کۆمەرە شتەکی کەون وەکی فیلمەکی سینەمایی دەهاتە بەرچاوم، بەران زوو تێدەپەڕی و کۆتایی پێ دەهات، زۆر جاریش خەونم بەو کیژەی دەدەیت کە پێیان دەگۆ هەورین، لەخەوێ دەهات، تووند دەستی دەگرتم و دەیگۆ باش بزانە ڕۆژەک دادێ دەمناسیەوەو دەزانی ئەمن کێمە، بەران زۆر دەترسێم ئەو ناسینەوە ئەو وەختی هیچ سوودی نەبی، نەک هەر ئەوەندە، بەرکوو ببیتە زووخاوەکی هەتا هەتایی لە هەناوت!
دختۆر شێرۆ لە پشت دەرکەیی ڕاوەستاو گۆتی: کێیە ئەوە؟ دەنگەک لەو دیووی دەرکەی گۆتی: زووبە ئەو دەرکەی بکەوە!
دختۆر شێرۆ دەرکەی کردەوەو زەلامەک بە مشەوەشی هاتە ژۆرێ، داکم گۆتی: ئەیڕۆ خۆ ئەوە بازۆیە، دیارە بەریان دایە! بازۆ گۆتی: ناوەڵلا بەریان نەدایمە، بەرکوو هەراتیمە! بابم گۆتی: کوو هەراتی کوڕم؟ گۆتی: برادەرەکی بەوەفام لەوێبوو، بەدزی هات دەرکەی ژۆرەکەی لۆ کردمەوەو گۆتی: خۆت قورتارکە، ئەمنیش یەکسەر هاتمە ئێرەو نەچوومەوە مارێ، ترسام بێنە مارێ و بمگرنەوە، ئەنگۆ دوایێ خەبەرەکی بدەنەوە داکم و بابم، با هەرئێستاش دختۆر شێرۆ ئەمن بگەینیتە عەنکاوەی و دەچمە ناو ڕێکخراوەکەی، تەئکیدم مستەر جۆرج دەمپارێزی و تەسلیمم ناکاتەوە، دەرفەتەکیش وەرگرم لەگەرەوان دەچمەوە سوید، بابم گۆتی: ڕەببی کوڕم خوا بتپارێزی، دختۆر شێرۆ زوو بازۆی بگەینە عەنکاوەی هەتا نەهاتینە سەر ماریمەش! دختۆر شێرۆ گۆتیە بازۆی: یاڵلا بابڕۆین یاڵلا، چاو بەلەبۆقی سەیانی، نۆبەتی تووە تووشی کێشەو دۆخەم بکەی! بازۆ هات دۆقەی لەگەر کردم و دوو سێ ماچی لێکردم و خواحافیزی لە هەمووان کردو لەگەر دختۆر شێرۆی ڕۆیشتن!
خەریکبوو بنووین، بەتووندی لە دەرکەی درا، داکم چووە پشت دەرکەیی و گۆتی: کێیە ئەوە؟ ئێکەک گۆتی: برێ بازۆی فەوری بێتە دەرێ، دەنا بێینە ژۆرێ دەیکوژین! داکم دەرکەی کردەوەو گۆتی: دەی دەی ئەنگۆش لەمە ببنە بەعسی و نیوەی شەوێ هەرکووتنە سەر ماران، بمرن باشترە نەک لەسەر سەرۆک جاشەکی خۆفرۆش سەر لەدوو پێشمەرگەکی بنێین، ئەوها بڕوا خەرک دەرێ خۆزگەمان بە سەددامی! چەکدارەکە گۆتی: ئەو قسانە لۆمە مەکە، هێوەڕو با ئەو مارەی سەراوبن بکەین، بزانین بازۆ لەکێ خۆی شاردتەوە! ئیدی چار پێنج زەلام بەژۆرێ کەتن و هەموو مارەکەیان سەراوبن کرد، بابم ڕاوەستابوو، هیچ قسەی نەکرد، هەر ئەوەندە نەبی لە ئاخیری گۆتی: کێ مەسوولتانە؟ ئێکیان هاتە پێش و گۆتی: ئەمن هەوم مامەستا! بابم گۆتی: زۆر دەترسێم ڕۆژەک دابێ ئەنگۆ ڕووی بەعسیە پیس و دڕندەکان سپی بکەنەوە، کوڕم ئەنگۆ لە چیای بوون و خەرک لۆتان دەگریا، وای دەبینم ڕۆژەک دابێ خەرک لەبەر دەستتان بگریێ! مەسوولەکە بەینەکی تەماشا بابمی کرد، پاشان سەری شۆڕ کردو ڕووی لە چەکدارەکان کردو گۆتی: یاڵلا بە بابڕۆین!
ئەوان چوونە دەرێ و بابم ئاخەکی هەرکێشاو گۆتی: خوایە، زۆر دەترسێم ڕۆژەک دابێ و ئەو میللەتە برێ: خۆزگەمان بەکفندزی! داکم دەستی گرتم و گۆتی: هەستە ڕۆرە هەستە، بڕۆ پاردەوە، دەبینی ئەو عەشقەی توو کوو ئاگری لە هەموومان بەرداو ماری وێرانکردین، بریا بە عەستەم مێشکت وەئیشکەتباوەو بتزانیبا دنیا چباسە!
ئەمن پارمدابۆوەو خەوم لێنەدەکەت، هەردەموویست بزانم ئەمن کێمەو چدەکەم لێرەو ئەو مشەوەشیە چیە دروست بووە، وەختەکی لە دەرکەی دراوە، ئەمن هاتمە دەرێ، دیتم داکم دەرکەی دەکاتەوە، لەپشت دەرکەی گۆتی: کێیە؟ ئێکەک گۆتی: خۆمانین، داکم دەرکەی کردەوەو گۆتی: ئەوە ئەتووی دختۆر شێرۆ؟ گۆتی: بەرێ ئەمنم، بە مامەستای برێ بازۆم گەیاندەکن مستەر جورجە مشکە نازانم کێیە، خەبەریشم دا گەلاوێژخانی هەتا خەمی هیچی نەبی، داکم زۆر مەمنونی دختۆر شێرۆی بوو، دختۆر ڕۆیی و داکم دەرکەی پێوەدا، ئاوڕم داوە دیتم بابم لە دەرکەی هاتەدەرێ، داکم گۆتیەمن: دەبڕۆ پاردەوە جەرگی دایەی، داکم لۆلایی بابم چوو و قسەکانی شێرۆی لۆ گێڕاوە، ئیدی ئەوانیش چوونە ژۆرێ و ئەمنیش چوومە ژۆرێ و لێمپارداوە!
ئەو ماوەی جەماعەت هەر تاقیبی بازۆیان دەکردو زووزوو بەلای مارێمە دادەهاتن، چووبوونە ماری بازۆیی و گەڕابوون و ماریان تێکوپێکدابوون، گەلاوێژخان توڕەببوو و جوونی پێدابوون، بێ شەرەفەکیان زللەکی لە گەلاوێژخانی دابوو، هاتبووە مارێمەو هوڕهوڕ دەگریا، ئەمن لەگەر دختۆر شێرۆی بەردەوام دەچوومە عەنکاوەی لۆ چارەسەری، سەرۆک جاشەکەشیان ڕەوانەی ئەڵمانیای کردبوو لۆ چارەسەری! هەرجاری بچووبامە عەنکاوەی بازۆ دەهات لەگەرم دادەنیشت و تێرتێر باسی منداری و جاحێری خۆمانی دەکرد، بەسەرهاتەکانی من و هەورینی دەگێڕاوەو فرمێسک بەهەردوو چاوانی دەهاتە خوارێ، مستەر جۆرج سەریسوڕمابوو لە وەفای بازۆی لۆمن، بە بازۆی دەگۆ: ئافەرین بەردەوام قسەی لەگەر بکەو مێشکی بجوولێنە! بازۆ ڕووی لەمن کردو گۆتی: ئەمن چاوەڕێی چابوونەوەی توومە، دەنا هەموو چشتم لەگەر خۆخی قلم بڕیتەوە، مام حەمەدەمینیش پێشکێشی کردیمە، بەران هەرچەند دەکەم لەبەتوو درم نایێ بیگۆزمەوە، ئەو وەزعە تەواوبی دەیگۆزمەوەو لەگەخۆم دەیبەمە سوید، مستەر جۆرج وەعدی پێدایمە بە تڕومبێلی ڕێکخراوەکەی خۆیان خۆخم لۆ بیننە ئێرەو لێرەش لەگەوان بڕۆین لۆ تورکیایی و لەوێش لۆ سوید! ئەمن سەرم لەهیچ دەرنەدەچوو، هەر ئەوەنەبی، تەماشا ناو چاوە پڕ فرمێسکەکانی بازۆی بکەم و وەکی وی بگریێم و بگریێم!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!