پێشکەشکار لەنێوان پیشەییبوون و گاڵتەجاڕیدا
#کەنار قاسم#
لەم ڕۆژگارەدا، شۆو پڕۆگرامە تەرفیهییەکان پێویستن، کاتێکی دیاریکراوی ڕۆژەکەت پێویستت بەوەیە پشوویەک بە مێشکت بدەیت، واتە جگە لە هەواڵ و بەرنامەکانی تایبەت بە پۆڵەتیک و کێشەکانی ڕۆژگار پێویستمان بە بەرنامەیەکە سترێس و جەنجاڵی ڕۆژەکەمان بڕەوێنێتەوە، ئێمەش چەند کەناڵێکمان هەیە و چەند پڕۆگرام و شۆیەکی لێوە پەخش دەکرێت، بەڵام ئەوەی پێشکەش دەکرێت نەک ئەم پێویستییەی ئێمە پڕناکاتە، بەڵکو لایەنی نەرێنی لەسەر کۆمەڵگە جێدەهێڵێت و میدیای بەرەو سەرلێشێواوی و لاوازی بردووە0
ماوەیەکی زۆرە تیڤیکەم دەکەمەوە چەندین بەرنامەو پڕۆگرام و شۆی هیچ و بێناوەڕۆک هەیە، کە هەموویان لەیەک دەچن، ئەوەی کە هەیە پێشکەشکارێک و مۆدێلێک یان گۆرانیبێژێک بەرامبەر یەکتر دانیشتوون قسەی بێ ماناو قاقای پێکەنین بەرنامەکە تەواو دەکات، ئەسڵەن هیچ پەیام و مەغزایەک لە بەرنامە و هەگبەی پێشکەشکارەکەدا نییە، ئەوەی دەیبینم مۆدێلێک لەمیدیاکار و وردتر بڵێم پێشکەشار پەیدا بووە، کە خۆشی نازانێت چی دەڵێت، گوێبگرە نیوسەعات بۆ سەعاتێک ڕستەیەکی ڕێکوپێک ناڵێت، پرۆدیۆسەر و دانەری بەرنامە خۆشی نازانێت چی دەوێت، تەنها ئەوەیە لە پەخشی کەناڵەکە کاتێکی پێ پڕ دەکاتەوە، کێشەکە لەوەدایە زۆربەی کەناڵەکان لەم جۆرە بەرنامانەی هەیە و بووە بە مۆدێل، هەروەها ئەم جۆرە پێشکەشکارانە خەریکە ڕەوتی میدیای کوردی تەواو دەگۆڕن پێویستە هەڵوەستەی لەسەر بکرێت.
پێشکەشکار تەنها کاری دانس و هەڵپەڕکێ و پێکەنین نییە، پێویستە پەیامی هەبێت و وریای هەڵسەکەوت و قسەکانی بێت لەکاتی پێشکەشکردندا، بەرنامەیەکی تەرفیهی پێویستی بە پێشکەشکارێکە کە بتوانێت زۆرترین بینەر بۆلای خۆی ڕابکێشێت و لەهەمان کاتدا زانیاری و سوود بە بینەر بگەیەنێت.
پیشاندانی بەرنامەیەکی تەلەفزیۆنی جۆرێکە لە هونەر، پێشبڕکێ لە دروستکردنی بەرنامەیەکی ئینتەرتەیمێنتی باش سەختە، ئێمە نامانەوێت لە گرنگی ئەم جۆرە شۆو پڕۆگرامانە کەمبکەینەوە، بەڵام ئەویش ئیتیک و شێوازی خۆی هەیە و دەکرێت جگە لە بەخشینی کاتێکی خۆش پەیامی جیاواز و گرنگ بگەیەنێت.
لە جیهاندا تەلەفزیۆن سەرچاوەیەکی گرنگی ئینتەرتەیمێنتە بۆ بەکارهێنەرانی، پرۆگرام یان بەرنامە تەرفیهیەکان بەردی بناغەی ناوەڕۆک و پەیامن بۆ تەلەفزیۆنەکان، ئینتەرتەیمێنت لەچوارچێوەی چەند جۆرێک لە بەرنامە پەخشدەکرێت، وەکو فیلم، بەرنامەی کۆمیدی، پڕۆگرامی یاری و پێشبرکێکان، مۆسیقا، پێشبڕکێی بەهرە و قسەکردن. کەواتە ئەو ئەرکە دەکەوێتە سەر تیڤیە کوردییەکانیش بەرنامە ئینتەرتەیمێنتەکان بەشێوازە ڕاستەکەی و بە ئیتیکی تایبەت بەبوارەکە پەخشبکەن و پێشکەشارێک بهێننە سەر شاشە کە بەتواناو بە ئەزموون بێت و ئەرکەکەی خۆی بەباشی جێبەجێ بکات.[1]