ئەڤرۆ، وانێ:
ل رۆژێن 28-30 گولانا 2022ێ، ل زانکۆیا وانێ سەمپۆزیۆما هۆزانڤانێ کورد (فەقیێ تەیران) ب پشکدارییا کۆمەکا نڤیسکارێن کورد ژ باژێرێن باکور و رۆژهەلات و باشۆرێ کوردستانێ هاتە گێڕان، تێدا هژمارەکا سمیناران ب شێوەیەکێ کورت هاتنە پێشکێشکرن.
ل رۆژا 28ی گولانێ، ب بەرهەڤبوونا هژمارەکا بەرپەرسێن شارەدارییا وانێ و ئەندام پەرلەمانێ تورکیا و سەرۆکێ زانکۆیێ و خانم گولشەن ناجی بەگ، ئەنداما بەرێ یا پەرلەمانێ تورکیا و نوکە ڕاوێژکارا سەرۆکێ تورکیا، کو هەر ئێک ژ وان پەیڤەک خواند و د پەیڤێن خۆ دا بەحسێ گرنگیا ئەڤان چالاکیان و هۆزانڤان فەقیێ تەیران کرن. هەژی گۆتنێ یە بۆ برێڤەچوونا کۆنفرانسی، هندەک لیژنە هاتبوونە دانان بۆ رێکخستنێ، وەک؛ (لیژنا شەرەفێ، لیژنا لدارخستنی، لیژنا زانست و شێورێ). پاشی روونشتنا ئێکێ دەست پێ کر و تێدا چار سمینار هاتنە پێشکێشکرن.
بەرنامەیێ رۆژا ئێکێ، دەست پێ کر ب ئاخفتنا پرۆتۆکۆلێ کۆنفرانسی، هەروەسا مێهڤانێ شەرەفێ (محەمەد خالد یاڵچن/ سادینی) و کورتییەک ژ ژیانا وی هاتە خواندن و بۆ کارێ وی و چاپکرنا دیوانا فەقیێ تەیران و هاریکارییا وی بۆ زانکۆیا وانێ ژ بۆ رێکخستنا کۆنفرانسی هاتە خەلاتکرن و دەلیڤە دایێ چەندەکێ ل سەر خەبات و بزاڤا کارێ خۆ یا ئەدەبی باخڤیت.
پشتی بێهنڤەدانەکێ، روونشتنان دەست پێ کر، ل رۆژا ئێکێ ب پێنج پەنەلا دەست پێ کر و تێدا بیست سمینار هاتنە پێشکێشکرن، هەروەسا ل رۆژا 29ی گولانێ، ب شەش پەنەلا دەست پێ کر و تێدا پتر ژ بیست و پێنج سمیناران هاتنە خواندن، د ئەڤان سمیناران دا ل دۆر بەرهەمێ فەقیێ تەیران دانوستاندن دکرن، ڤەکۆلینێن تێر و تەسەل ل دۆر بەیتا شێخی سەنعان و کەلا دمدم و ئەی ئاڤ و ئاڤ هاتنە خواندن، هەروەسا بەیتا شێخ سەنعان و بەرسیسی عابد هەلبەستێن دیتر ژ دیوانێ کەفتنە بەر ڤەکۆلینان، هندەک ڤەکۆلەر ل وێ باوەرێ بوون کو بەیتا د‌مدمی نە ژ ڤەهاندنا هۆزانڤانی یە، ب بەهانەیا کو ناڤێ هۆزانڤانەکێ دی ل دووماهییا بەیتێ هەیە.
هەژی گۆتنێ یە کو دیوانا فەقیێ تەیران هەتا نوکە ل باکور نێزیکی یازدە جاران هاتییە چاپکرن و چاپەکا نویتر چاڤەڕێی چاپکرنێ یە. چاپا دەهێ ل سەر مێهڤانا هاتە بەلاڤکرن کو ل وێرێ ب پیتێن لاتینی دهێتە وەشاندن.
د ناڤ موفکێن پەنەلا دا، خانم گولشەنێ ب دەنگێ خۆ یێ نازک، هەلبەستەکا مەلایێ جزیری و ئێکا فەقیێ تەیران ب سەلیقە خواندن، هەروەسا ل رۆژا دووماهیێ مەلا سالحێ دهی، ئەوی ژی هۆزانەک ب فەقی خواند.
ژ نڤیسکارێن ژ باشوورێ کوردستانێ پشکداری تێدا کری، نێزیکی سێزدە‌ کەسان بابەت پێشکێش کرن، ئەوژی (محەمەد عەلی قەرەداغی، تەحسین دۆسکی، ئیسماعیل بادی، شیمال خەمۆ، د. هێمن عومەر خۆشناو، پ. د. زرار صدیق توفیق، د. درەخشان، دوو گەڵاوێژ، رزگار جەباری، پ. د. یادگار رەسوول حەمەدەمین، ژێگر نەجیب عەبدولرەزاق، جەمیل شێلازی و هێرش کەمال رێکانی). هەروەسا سەیدا مصدق تۆڤی و حەجی جەعفەر وەکو مێهڤان تێدا پشکدار بوون، کو پترییا وان ژ باژێرێ دهۆکێ بوون.
ل رۆژا 30 گولانێ، مێهڤانێن کۆنفرانسی بەرەف وارگەهێ فەقیێ تەیران ب رێکەفتن و ل موکسێ ژ لایێ قایمقام و سەرۆکێ شارەداریێ و نەجیب بەگێ ڤە، پێشوازی ل مێهڤانان کر و ل هۆلەکا بەرفرەه چەند پەیڤ هاتنە خواندن و سەیدا تەحسین دۆسکی ژی هەلبەستەک ب گولشەنا فەقیێ تەیران خواند.
د ڤان هەمی سمیناران دا، ل موکسێ ژبلی هۆزانا دۆسکی، یێن دی هەمی ب زمانێ تورکی بوون، ل وانێ ژی دو – سێیەک ب زمانێ تورکی هاتنە پێشکێشکرن. پشتی فراڤین خوارنێ بەرەف مەزارێ فەقی ل گوندی وەرەزۆرێ ب رێکەفتن و سەرەک ل خانی و مزگەفتا وی ژی دان کو وەکو هێمایەک بۆ هاتینە چێکرن. پاشی بەرەف سەرەکانیا روبارێ مەزن چوون ئەوێ هۆزانڤانی هۆزانا ئەی ئاڤ و ئاڤ لێ ڤەهاندی. پشتی ئەڤ مەراسمە ب دووماهی هاتین، ڤەگەڕیانە باژێرێ وانێ ڤە و سەمپۆزیۆم ب دووماهی هات.
هەروەسا د بێهنڤەدانێن شەڤێ دا، ب دەنگێ سترانبێژ ئیسماعیل مەرگەهی و مەسعود نێروەیی شەڤبێری ب رەوشتر لێهاتن. دیسان لبەرە ئەڤ مژارێن هاتینە پێشکێشکرن، ب درێژاهی، هەمی د کتێبەکێ دا بهێنە چاپکرن.[1]