بەدەل ڕەڤۆ

غراتس/ نەمسا

دەما مرۆڤ بابەتەکی دنڤیسیت ل سەر نڤیسەرەکی یان هونەرمەندەکێ وەغەرکری وەکو دیدەڤانیەک بۆ وی کەسی، پێدڤیە مرۆڤ هەمی لایەنێن ژیانا وی بەرچاڤ کەت، دەستپێکێ دێ بەحسێ لایەنێ کەساتیا وی و مرۆڤاتیا وی کەسی کەین ، پاشی دێ لایەنێ نیشتیمانی، ئانکو گرێدانا وی ب ئاخ و وەلاتێ وی ڤە کەین، پاشی لایەنێ داهێنانێ د ژیانا وی یا ڕەوشەنبیری دا دێ بەرچاڤ کەین.
هەڤنیاسینا من د گەل هەلبەستڤانێ دلسۆز و مرۆڤچاک ب هەمی ڕامانێن مرۆڤاتیا دلپاک و ڕەسەن دزڤڕیتەڤە بۆ بهارا 2015، وی دەمێ دیوانا من انتولاجیا شعرا و الکرد (النسر) ئانکو ئەنتولوجیا هەلبەستڤانێن کورد ئەلنەسر ) ژ چاپێ دەرکەفتی ژ لایێ ((دار الشۆون الپقافیە)) ل بەغدا سالا 2013 هەلبەستێن 66 هەلبەستڤانێن ژن و مێر ب خوەڤە دگرت، ژ وانا هەلبەستێن هەلبەستڤانێ خودێ ژێ ڕازی سەلمان گۆڤلی بوون…
من دیوانا خوە هەلگرت و بەر ب گوندێ کۆڤلێ کەتمەڕێ دا وەکو دانەیەکا ڤێ دیوانێ بکەمە دیاری بۆ مالباتا هەلبەستڤان سەلمان کۆڤلی وەکو بیرهاتنەک د ناڤ ئەرشیفێ وی دا بمینی
ل وێرێ چاڤێن من ب هەلبەستڤان عەبدولغەنی کۆڤلی کەتن، من دیت کەسەک جوامێر و مەرد و دلڤەکری، بێی دەستووری دچیتە د دلێ مرۆڤی دا و مرۆڤ ژ دیوان و سوحبەتێن وی تێرنابیت، بەری ئەز بزانم کو هەلبەستان دڤەهینیت، دەمەکێ گەلەک خوش مە پێکڤە ل وی گوندی بهەڤڕا بۆراند.
پەیوەندیێن من د گەل ڤی مرۆڤێ ڕاستگۆ و دلپاک ڕۆژ بۆ ڕۆژێ گەرمتر لێهاتن، نەمازە پشتی من هەلبەستێن وی دیتین و خواندین و هند تێبینی من ل سەر داین، وی ژی ب سینگەکێ بەرفرەه و دلەکێ ڤەکری ژ من وەرگرتن.
هەلبەستێن هەڤال عەبدولغەنی کۆڤلی مینا دەریایەکا مەزن پڕ ژ هەستێن مرۆڤاتی، نیشتیمانی، وەلاتپارێزی، جڤاکی، ڕەخنەیی، ئەڤینداری، هێمایەتی هەمی جۆرا ب خوە ڤە دگرن و هەر جۆرەکێ هەلبەستێ نڤیسیبا داهێنان د ڤەهاندنا وێ دا دکر، ب هەمی جسارەت هەلبەستا ڕەخنەیی دنڤیسا، بەلێ ڕەخنا وی بۆ باشیێ و ئاڤاکرنێ بوو، نە بۆ تێکدانێ یان خرابکرنێ بوو، گەلەک هەلبەستێن وی من وەرگێڕاینە و ل ڤان نێزیکا ب ئانەهیا خودێ دێ هێنە بەلاڤکرن..
عەبدولغەنی کەسەکێ ڕح سڤک و خوشتڤیبوو، مەزناهی ل دەف ڤی مرۆڤی نەبوو، دل و دەروون پاقژبوو، لەوما گەلەکێ بڕێز بوو ل دەف هەڤالان و ل دەف جڤاکی خوە ژی، بەردەوام ل جهێن گشتی و مللی دهاتە دیتن وەکو چایخانێن هەژارا هەر جهێ ڕەوشەنبیرەک لێ با قەستا وی جهی دکر، ڕۆژا ئێکێ مە ئێکدو دیتی پشتی ژ گوندێ کۆڤلێ ڤەگەڕیاین، ل چایخانەکا باژێڕی مە هەڤدو دیتەڤە و هەتا دەمێن درەنگێن شەڤێ ئەم دگەل ئێک ماین بێی کو هەست ببۆرینا دەمی بکەین، مە وێ شەڤێ بەحسێ باژێڕێ موسل و بیرەوەریێن خوش و نەخوش یێن مە ل وێرێ بوراندین دکرن.
هەڤالێ هەلبەستڤان عەبدولغەنی کۆڤلی خودێ ڕازیبیت، سەرکێشیا گروپەکێ ڕەوشەنبیری دکر، د گەل چەندین هەڤالێن دی بناڤێ گروپێ ڕەوشەنبیری و جڤاکی، چالاکیێن جۆرا و جۆر ب هەڤکاری د گەل پرتووکخانا بەدرخانیان و سەیدایێ (ئسماعیل تاهر جانگیر) خودێ ژێ ڕازیبیت پێکڤە ئەنجامداینە مینا ئاهەنگێن ئیمزاکرنا بەرهەمێ چابکریێن وی و یێن چەندین هەڤال و ماموستایێن دی، کارەکێ زورێ ژ هەژی ئەنجامداینە و چالاکیێن ئێکجار زۆرتر.
ڕونشتن و چاڤپێکەتنێن مە ل دۆر چاند و ئەدەب و ڕەوشەنبیریا کوردی دبەردەوامبون، گەلەک جارا من داخواز ژێ دکر بزاڤێ بکەت، دەستووریا فەرمی ژ وەزارەتا ڕەوشەنبیری بۆ گڕوپێ وان یێ ڕەوشەنبیری و جڤاکی وەرگریت، دا بشێن ب ڕەنگەکێ بەرفرەهتر چالاکیێن خوە ئەنجامدەن، بەلێ مخابن بەری بگەهیتە وێ هیڤیێ خاترا خوە ژ مە و ژ ڤێ جیهانێ هەمیێ خواست و چو بەر دلۆڤانیا خودێ.
وەکو من گۆتی پەیوەندیێن مە دبەردەوامبوون هەتا دوماهی چرکا ژیانا وی، هەر وەکی کوڕێ وی ئازادی بۆ من ڤەگێڕای، بەری خاترا خوە ژ ڤێ جیهانێ بخوازیت پتر ژ جارەکێ ناڤێ من دئینا، ئەڤە بۆ من عاجزیەکا مەزنبوو گەلەکا بژان و ئێش بوو، خوزی من زانیبا کا داخوازا وی چبوو، دا چ بێژیتە من، ئەڤە بۆ من بوویە مەرەق. لەوما دەمێ زڤڕیمە وەلاتی ئێکسەر من قەستا مەزارێ وی یێ پیرۆزکر.
گەلەک کەیفخوش بووم ب نیاسینا وی و هەڤالینیا وی، مەزن دبێژن ئه و کەسێ عەیالەکی ل پاش خوە دهێلیت هەر یێ زێندیە و نامریت، هەروەسا نڤیسەر دبێژن کەسێ بەرهەمەکی ل پاش خوە دهێلیت ساخ و زێندیە و نامریت، د ناخێ مە و وژدانا مە دا هەر دێ ژیت و هەر دێ ژیت.. ب کوردی و کورتی دێ بێژم هەلبەستڤان عەبدولغەنی کۆڤلی:
ژیەکێ کورت، بزاڤەکا خورت، لێ سەد مخابن ب هیڤی و ئارمانجێن خوە نەگەهشت.

گوڕا تە ب گول و ڕیحان و نێرگز بیت، وەغەر خێربیت جهێ تە بەهشتا بەرینبیت…[1]