قەوی ئیرۆ زەعیف حالم؛ دنالم ئەز ل وێ تایێ
د برهانان د هات فالم؛ تلسما وەسلەتان نایێ
تلسماتا وسالا من؛ ئەلیف نابە د فالا من
ژ مەجموعان خیالا من؛ بلادم ئەز ل سەودایێ
ژ سەودایێ وەکی دینم؛ ل سەر ئەقلێ خوە نامینم
ئەبۆ سینا ژ کوو بینم؛ ل مەهجوران بکت ڕایێ
ل هجرانا د مەهجوورین؛ بریندارین د ڕەنجوورین
ژ ئحسانان قەوی دوورین؛ ژ دیدارێ شەکەرخایێ
قەوی دوورین ژ دیدارێ؛ - - - - - - یارێ
یەقین مریەم ئەوێ جارێ؛ جنان ئاڤێتە دەریایێ
جنان ئاڤێت و وندابوو؛ ل بن بەحرەک مەزن دابوو
سیاهێ بەختێ من دابوو؛ ژ بەلقیسێ جەواب نایێ
ژ گۆمانان سەفا مۆربێ؛ ل جاما بادەیا سۆربێ
مرادا دل بەرە ژۆربێ؛ ل بەر چنگی د غەوغایێ
یەقین عەنقا ڤحال ناکە؛ کوبارە لەو سوال ناکە
شەهێ شاهان خیال ناکە؛ گەدا نایێ د پەروایێ
گەدایێ شاه مقابل دا؛ لپش باغێ ب سۆرگول دا
د نالت، دەست ب سەر دل دا؛ ژ ئەحوالێ خودێ دایێ
دنالم ئەز ل حالاتان؛ بنێر شێخێ کەراماتان
ژ دل ناکە موناجاتان؛ سەلاتا ئستخارایێ
سەلاتان ئەز ب جێ بینم؛ دوعاخواز و ب ئامینم
ژ وێ فکرێ بەتال نینم؛ ل ڕەجا و تەمەننایێ
تەمەننا و ڕەجایا من؛ قەبوول نابێ دوعایا من
ژ دوخانان نەدایا من؛ بددا سیران لەیلایێ
ئەگەر لەیلا نەهێت قەیسێ؛ نە هودهود بێتە بەلقیسێ
شەمالا دل ژ کوو د ئیسێ؛ چرایێ توور و سینایێ
چرایێ توور و ئەتوارێ؛ نەدی مووسا ئەوێ جارێ
نەبێ هۆش بوو ل دیدارێ؛ ژ نوورا بەژن و بالایێ
ژ وێ بەژنێ ، ژ وێ قامێ؛ نجوما زولمەتا شامێ
ستێرا دێم و ئەندامێ؛ تەجەللا بوو ل سەلوایێ
تەجەللا بوو ل ئەشجاران؛ ل ڕەنگێ قامەتا یاران
کەلیم لەو هاتە ئەبساران؛ مەجازی هاتە مەعنایێ
مەجازێ مەعنایێ کوورە؛ ژ قەندیلان نەهات نوورە
شەمال ئیرۆ کو مەستوورە؛ مشەووەش بوو ل دەست بایێ
شەهیدێ «میم و حێ» ئسمە؛ ژ عشقێ سۆتییە جسمە
ل جاما مەی بوە قسمە؛ شەهیدبووم ئەز ل دنیایێ
#فەقێ تەیران# [1]