''لەم جەژنەدا هەر #ئێزدی#یەکی مۆر نەکرابێت بە ئاوی کانی سپی مۆر دەکرێت''
وەکیلی میری ئێزدییان ڕایگەیاند، ئەمڕۆ 6/10/2022 یەکەم ڕۆژی جەژنی جەمای ئێزدییانە و لە هەموو وڵاتانی جیهانەوە پەیڕەوانی ئێزدی ڕوو لە پەرستگەی لالش دەکەن بۆ بەڕێوەبردنی ڕێوڕەسمی جەژنی جەما.
لەم بارەیەوە، جەهوەر عەلی بەگ، وەکیلی میری ئێزدییان، بە (باسنیوز)ی ڕاگەیاند: ''جەژنی جەما یەکێک لە جەژنە دێرینەکانی ئێزدییانە لە پەرستگەی لالش بەڕێوە دەچێت و بۆ ماوەی حەوت ڕۆژ ئێزدییان لە ڕێوڕەسمەکانی ئەو جەژنەدا بەشدار دەبن، ئێوارەی هەموو ڕۆژێک چرای ئاقد و نیشانگە و مەزارگەی خاسان هەڵدەکرێن و هەر ئێزدییەکی بچێتە لالش دەبێت لەسەر پردی سیڕاتەوە تێپەڕ بێت و بچێتە سەر حەوزی کانی سپی و بۆ پیرۆزی و متفەڕک دەست و چاوی خۆی بە ئاوی کانییەکە بشوات و زیارەتی مەزارگەی خاسان بکات و هەموو ئێوارەیەکی ئەو حەوت ڕۆژە ڕێوڕەسمی سەماکردن بەڕێوە دەچێت و قەول و بەیتی ئایینی دەخوێندرێتەوە کە ئەمە ڕێوڕەسمێکی کۆنە و لەناو زۆرینەی گەلانی دێریندا هەبووە''.
ئاماژەی بەوەش دا: ''هەموو ڕۆژێکی ئەو حەوت ڕۆژە ڕێوڕەسمی قنتار بەڕێوە دەچێت و ئەوە ڕێوڕەسمی هاوکاری و دڵخۆشییە لەناو شەمسانییەکان و ئادانییەکاندا و لە ڕۆژی چوارەمەوە ڕێوڕەسمی سوارکردنی پەری هەیە و ڕۆژی پێنجەم ڕێوڕەسمی قەپاغ بەڕێوە دەچێت کە ئەوە نیشانەی پێشکەشکردنی قوربانییە بۆ خودانی ڕزق و ڕۆزی بە هیوای هاتنی ساڵێکی پڕ لە خێر و بەرەکەت و ڕۆژی شەشەم بەری شەباک دەهێتە سوارکردن''.
ئاشکرایشی کرد: ''هەر ئێزدییەکی مۆر نەکرابێت لە جەژنی جەمادا بە ئاوی کانی سپی مۆر دەکرێت و لە ڕۆژی کۆتاییشدا جەژنی تاوس دەڕازێندرێتەوە''.
وەکیلی میری ئێزدییان گوتیشی: ''پێشبینی دەکرێت ئەمساڵ نزیکەی 200 هەزار زیارەتکار سەردانی پەرستگەی لالش بکەن بۆ بەشداری لە ڕێوڕەسمی جەژنی جەمادا''.
لە کۆتاییدا جەهوەر عەلی بەگ هیوای خواست ساڵی دابێ ئاوارەکانی شنگال بتوانن بگەڕێنەوە سەر ماڵوحاڵی خۆیان و بە خۆشییەوە جەژن و ڕێوڕەسمە ئایینی و کۆمەڵایەتییەکانی خۆی بەڕێوە ببەن، ئەوە هەشت ساڵە خەڵکی #شنگال# ئاوارەن و لەبن خێوەتدا جەژنەکانی خۆیان بەڕێوە دەبەن.
ئامادەکردنی: #سارا سەردار#
[1]