یا شا نەیەوە ئیمساڵ نەو وەهار
بەر نەیان وە بەر گوڵان جە گوڵزار
نەکەرۆ درەخت شکۊفە ئیزهار
نە سەحنی چەمەن نەوانۊ بوڵبوڵ
هەنی نەکێشۆ ژاڵە نە ڕووی گوڵ
نیلۊفەڕ تاکو حەشر بەر نەیۊ جە ئاو
جە ڕووی گوڵی سورخ نەکێشۆ گوڵاو
بەنەفشە و سونبوڵ نەسرین و شەوبۊ
تا قامی قیام بەرنەیان جە کۊ
سۊسەن و لالە و ڕەعنا و گوڵی زەرد
هەنی سەوز نەبان چەنی سۊز و دەرد
سوپای گوڵاڵان خوار و نگوون بۊ
شەقایق ڕەنگ زەرد، جگەر پڕ هوون بۊ
نەسیمی سەبا نەیۊ وە چەمەن
نەشانۊ شۆنم وە ڕووی نەستەرەن
جەعفەری و سەمەن ڕەیحان و بداخ
نەڕوویان جە خاک چەنی ئاخ و داخ
ئاغەم، دمای مەرگ دیدەی شەهلای تۊ
یا شا، کەس نەرگس نەکەرۆ وە بۊ
بگیرۆ وە دەست هەرکەس دەستەی گوڵ
وێنەی نێشی خار بەپێکۊش نە دڵ
قەهقەهەی کەبکان نەیۊ نە کۊهسار
نە ڕەنگی گوڵ بۊ نە بەزمی گوڵزار
نەڕێزۊ سوەیل ئیمساڵ چوون ساڵان
ڕەنگ زەرد نەکەرۆ بەرگی نەهاڵان
پەی چی خەسرەو بەند نە تۊی مەزارەن
مەستوورە جە سەیر وەهار بېزارەن
قەسەم بەو خودا واحید و فەردەن
ئی چەند ڕۊژەی عومر تاکو وادەی مەردەن
جە دمای خەسرەو سەیری سەحرا و دەشت
ئارەزووی چەمەن، تەماشا و گوڵگەشت
نەکهەتی گوڵان شەمامەی وەشبۊ
جەی دنیای پڕ مەکر، جە من حەرام بۊ
مەستوورە مەلوول، دڵ جە مەینەت مەست
جامی عەیش توهی، شیشەی غەم بە دەست
مەقالەم جە سەنگ سیا ستاران
دەروون خانەقای غەم و پەژاران
ئیرادەی ئەملاک ئیقلیمی شادی
ساعیی شەواریع ڕای نامورادی
نمەز بەختی تۊ چە نەقشۍ کەندەن
سەمەن فرۆشا و سۊسەنش مەندەن
فەڵەک سەرچەشمەی عەیشش ببۊ وشک
لاڵش بەدەڵ کەرد چەنی بیدی موشک
هەر من مەزانوو جەستەی حاڵی تۊ
تەبخاڵەی لەبان لەعلی لاڵ تۊ
تەڵخیی ڕووی عەنناب زیندەگانیی تۊ
عەننابی گۆنای زەعفەرانیی تۊ
ژوولیدەی خەمان تەرزی توغرای تۊ
شەفەق سای ئوفوق جە مای سیای تۊ
ئای جە گڕەی نار وەی دەروونی تۊ
مەوجی دەریای دڵ پڕ جە هوونی تۊ
گا یادی هەنگام عەیش و نۊشی تۊ
گا ناری کوورەی مەینەت جۊشی تۊ
کافر وێنەی تۊ تەن زووخاڵی بۊ
جامش جە بادەی عوشرەت خاڵی بۊ
دوشمن ئەو جامەی قەڵاخی پۊشۆ
سەهبای ناکامیی میحنەت بنۊشۆ
گەردوونی کەچ باز چە نەردێ بازا؟
یە چە مەکرێ بی پەرێ تۊ سازا؟
عەجەب جە دەریای خەمان غەرقەنی
قەدەم سووگوار تاکو بە فەرقەنی
قاروورەی شادیت لە غەم شکستەن
پەی مەرگی خەسرەو حەقت بەدەستەن
ئەر تاتا ڕیشەی جەرگت پەی کەری
یا وادی میحنەت بە غەم تەی کەری
ئەر جە شەو تاکو ڕۊ، جە ڕۊ تاکو بە شەو
هەر واچی: هەی داد، هەی ڕۊ، هەی خەسرەو
پەی موفارەقەت ئەو بەرگوزیدەت
ڕەوان بۊ ئەسرین هوونین نە دیدەت
پەی مەرگی خەسرەو هېمای هەر کەمەن
تا عەیشی سەد بار سزاش ماتەمەن
لاکین -ئەی عەزیز- قیبلەی عەزیزان
خاسقەی فیرقەی ساحێب تەمیزان
ئەی ڕا بەعیدەن جە ڕای خیرەدمەند
خەسرەو کەی بە دام درەخت بییەن بەند؟
نە ڕای ڕەزای حەق کرداری باتڵ
دەروون نە تەزمیر ئەندێشەی قاتڵ
الحمد لله تۊ وێت وەندەنت
نەقش ئەی حەدیس نە دڵ کەندەنت:
و من يلبس سودا لبوسا
يختم ميتا غيا عبوسا
ئەو سەودەی عەزیز جە سووگواری
دیدەش مەپۊشۆ جلباتی تاری
هەرگیز نم نە ڕووی دیدەش نییەن ڕەم
تا ڕۊحی باری بوینۊ بە چەم
تۊ ئەر سەد نە غەم دەروونت هوونەن
بەڵێ ئەی تەورە ئەدواری دوونەن
حەیف نییەن چوون تۊ شیرین شەهبازێ
شۆخۍ مەهوەشۍ ئالوودەی نازێ
یەک جیهەت نە عەیش عوشرەت جیا بۊ
پەیېوەستە ئەوقات بەرگش سیا بۊ؟
جیهانۍ یەکسەر جە غەم مەشعووفەن
خورشیدی چوون تۊ دایېم کوسووفەن
تۊ بنامیزاد زێبا حوورەنی
چە حوورێ؟ لایەق حوللەی نوورەنی
گوڵ تاکو غونچە بۊ چە شەوقێ دارۆ؟
غەرقەن جە بۊدا چە زەوقێ دارۆ؟
هیچ ڕەنگێ نییەن جە مەستوورەوە
زینەت ها بە ڕەنگ سپی و سوورەوە
ئەر سەد مولەققەب بە مەستوورەنی
تۊ زێبای دێبای سپی و سوورەنی
وادەی وەهارەن چوون گوڵ جیلوە کەر
بە ڕەشکی خاسان ڕەعنای دڵ پەیکەر
زینەت دەر وە جام جەم نمای جەمشید
ببېزۊ ئەنوار شەعشەعەی خورشید
بپۊشە دێبای زێبا بە قامەت
تا پەی قامەتت خێزۊ قیامەت
پەی موردە ماتەم سوودێ نەدارۆ
ماتەم--- دوودێ نەدارۆ
ئیللا جە هەنگام خەمسەی فەرایز
ئەلحەمد وە ئیخلاس کەرەش عەرایز
ما باقی بەقای دنیا نەدارۆ
جە شادمانی ڕەحمەت مەوارۆ
ئیبراهیم ئەر سەد گوستاخیش کەردەن
بەڵێ یە شەرتەن بە جا ئاوەردەن
#مەستوورە ئەردەڵانی# [1]