هارۍ و ژەنی
نویستەی: ئەسعەد ڕەشید
دەگایەکاو هۆرامانینە، فرەو دانەوېڵەی (خەلە، یەوۍ)، بە (هارۍ یان دەسهاڕە) هاڕیاو کریا بە ساوەر یان ۋڵۊشە.
پاسەبۊ، (هارۍ) جە هۆرامانەنە دەورێ گەورەش جە ژیوای خەڵکەکەیشەنە هەن، چونکم هەرچی دانەوېڵەن بە (هارۍ) هاڕاش و وردش کەران، گەر بڕەکەیچش فرەبۊن، ئانە بەراش پەی ئاساوی ئاوی، کە هۆرامان پەڕەن چا جۊرە ئاساوا.
سەیدی هۆرامی، جە شېعرەو(هارە)ینە، دیمەنێ زەریفش خولقنان، پی تەرزە:
یارەکېش خەریکەو هاڕای خەلەینە، گەرەکشەن(ۋڵۊشە) کەرۊن، دەسو یارەکېش بیەن بە دەسکېشو دەسو هارەکەی:
تۊ دەستی شیرین دەستە کېشتەن
ئاواتت بڕیان، ناڵەی چېشتەن
یارەکۍ سەیدی، وەرە وەرە خەلە (دانە) کەرۊن گڵوەو هارەکېرە:
شیرین بە سەڎ ناز، مەکېشۊ دەستە
(دانە) مەڎۊ پېت، چوون ئاوات واستە
دانەش مەسانی چوون ستەمکاران
مەکەریش وە گەرد، توتیای شاران
بە مەچەکە بازندار و ناسکەکاش هارۍ مەسووڕنۊ:
شیرینەن نیشتەن، دانە مەڎۊ پېش
هارەش هار کەردەن، دەور مەڎۊ نە وېش
(سەیدی)چ، هەم غیرە کەرۊن، هەم خەمیچشەن هارەکۍ دەسو یارەکېش زامڎار کەرۊن. ئاڎ دەسهاڕەکەی عەیبدار کەرۊن پانەیە کە هەرچن دەسش ئینا دەسو (شیرېن)ېوە، کەچی سەرانەیچش (دانە)ش چەنە مستانۊ.[1]