Şêniyên #Hesekê# daketin qadan: Me biryara berxwedanê daye
Bi sedan şêniyên kantona Hesekê xwepêşandan kir. Şêniyan destnîşan kir ku Hêzên Sûriya Demokratîk yekane hêz e ku Bakur û Rojhilatê Sûriyê diparêze û tekez kir ku ew amade ne li hember êrişên #dagirkeriya Tirk# bisekinin.
Li dijî êrişên arêtşa Tirk a dagirker ên li ser herêmên Bakur û Rojhilatê Sûriyê, li bajar û navçeyên kantona Hesekê xwepêşandan pêk hatin.
HESEKÊ
Bi sedan şêniyên bajarê Hesekê li Çarxerêya Sînalko ya li taxa Til Hecer kom bûn û ber bi navarasta bajêr ve meşiyan. Şêniyan wêneyên şehîdan, rêber Abdullah Ocalan û alên QSD`ê bilind kirin.
Li Çarxerêya Kevokê xwepêşandan veguherî mitîngê. Li wir hevserokê Partiya Yekitiya Demokratîk (PYD) Mistefa El Ehmed wiha axivî: Serkeftin bi berxwedanê pêk tê. Em ê her li kêleka hêzên xwe yên leşkerî bi israr li ber xwe bidin.
Endama rêveberiya Kongra Star Nehla Ehmed jî êrişên dagirkeriya Tirk şermerzar kirin û got: Armanc ji êrişan têkbirina aramî û îstiqrara pêkhateyên herêmê ye.
Nehla bêdengiya hêzên navneteweyî ya li hember komkujiyên li dijî gelên Bakur û Rojhilatê Sûriyê şermezar kir û tekez kir ku ew ê li hember dagirkeriyê her li qadan bin û li pişta hêzên leşkerî û Rêveberiya Xweser bin.
TIL TEMIR
Bi sedan şêniyên navçeya Til Temirê jî xwepêşandan kirin. Xwepêşandêr li pêş avahiya Meclisa Malbatên Şehîdan kom bûn, pankertên bi nivîsên Na ji terora Erdogan re û alên Kongra Star, Meclisa Malbatên Şehîdan û wêneyên şehîdan bilind kirin.
Xwepêşandêr li kolana Şehîd Omer Barafî ya li navçeyê rawestiyan. Li wir endama rêveberiya Kongra Star a navçeyê Hêvîn Sebrî axivî. Hevîn êriş û binpêkirinên domdar ên artêşa Tirk a dagirker şermezar kirin û got: Tirkiye ji hêza gelê herêmê ditirse. Lê belê gelên Bakur û Rojhilatê Sûriyê amade ne li hember xeteriyan bisekinin.
DIRBÊSIYÊ
Xwepêşandanê ji pêşiya navenda Tevgera Ciwanên Şoreşger ên Sûriyê dest pê kir û li kolanên sereke yên navçeyê berdewam kir.
Li Çarxerêya Şaredariyê, hevserokê bajarê Til Kerem Îsmaîl Delef wiha axivî: Hêzên Sûriya Demokratîk yekane hêz e ku Bakur û Rojhilatê Sûriyê ji êrişên dagirkeriya Tirk diparêze.
HOL
Li navçeya Holê jî bi sedan kes ji pêş saziya perwerdeyê dest bi xwepêşandanê kir. Şênî li deriyê ketina navçeyê veguherî mitîngê, li wir hevseroka Meclisa Navçeya Holê Nisrîn Hesen axivî. Nisrîn bi navê şêx û rûspiyên eşîran û hemû saziyên êrişên hovane yên li dijî gelê herêmê şermezar kirin.
Nisrîn tekez kir ku helwesta wan nayê guhertin û got: Em li pişta QSD`ê û Rêveberiya Xweser in. Em ê heta serkeftinê têkoşînê bidomînin.
Xwepêşandan bi dirûşmên Na ji dagirkeriya Tirk re bi dawî bû.
ŞEDADÊ
Xwepêşandanê ji pêş Meclisa Navçeya Şedadê dest pê kir. Tê de wêneyên rêber Ocalan, alên PYD`ê, TEV-DEM, Kongra Star û pankertên bi nivîsên Em xwediyên vê xakê ne, Erdogan kujer e, divê were darizandin hatin bilindkirin.
Li pêş avahiya Partiya Sûriya Pêşerojê, xwepêşandan veguherî mitîngê. Endamê rêveberiya Meclisa Navçeyê Ebdulqadir Şeban wiha axivî: Wek gelên Bakur û Rojhilatê Sûriyê me biryara şerê gel ê şoreşgerî û berxwedana azad hilbijartiye. Em ê şoreş û axa xwe biparêzin.
Hevseroka Meclisa Malbatên Şehîdan Ayat Îbrahîm jî diyar kir ku sûcên dagirkeriya Tirk ji ber têkçûna wê pêk hatine û got: Em hemû li kêleka hêzên xwe ne.
Endama rêveberiya Kongra Star a navçeyê Emîre Seed jî bang li gel kir ku li dora hêzên xwe yên leşkerî kom bibin û berxwedanê bidomînin.[1]
ANHA