لە پێشوودا خەڵک زۆر دڵخۆش دەبوو بە منداڵانی ئەگەر ڕوویان لە دینداری کردبا، دەیاندیت لە ماوەیەکی کەمدا منداڵیان هێمنتر و بە ئەدەبتر و ڕێزدارتر دەبوو، دوور دەکەوتەوە لە کاری خراپە و ڕەوشتی بەد، ئێستا خەریکە خەڵکەکە دەزانن کە دینداریش بۆتە مەترسیەک بۆ سەر منداڵەکانیان، چونکە کێشەکە ئەوەیە ئەو لاوچاکییە تەنیا قۆناغی یەکەمی دیندارییە، هەر کە پێینایە قۆناغی (وەلاء و بەراء) و جیهاد و فەزڵی موجاهیدان، وگۆڕینی دیاردە شیرکییەکان و بیدعەکان و گوناهەکان، و بە سوک سەرنجدانی دینداری دایک و باوک و دەوروبەری، قۆناغی سوور هەڵگەڕانی ڕوخسارت لە غیرەتی بۆ (مەحارم)ی خوا، لێرەوە سەرئێشەی ئەوان دەست پێدەکات، زەردەخەنەی جارانی نامێنێت، ڕێز و حوورمەتی جارانی نامێنێت، ئەزیەتی خوشکانی دەدات بە لێدانیش ئەگەر تاڵە قژێکیان بە دەرەوە بێ. تەلەڤزیۆن قەدەغە دەکات، ناچێتە گەشت و بۆنە کۆمڵایەتیەکان، هیچ بایەخێکی بە میللەت و نەتەوە و خەمەکانی نامێنێت، بەڵکوو تەنیا بیرکردنەوە لە خەمەکانی نیشتمان و نەتەوەی بە سیفەتێکی جاهیلی دەزانێت ئەگەر بۆی بلوێت لەپێناو عەقیدەی پیرۆزی ڕێگای جیهاد دەگرێت لە دژی کەس وکار و نەتەوەکەش!.
بێگومان لەبەر ئەو نائومێدی و بێ کاری و بێ مەعریفەتی و بێ ئاییندەییەی کە باڵی بەسەر گەنجانی وڵاتانی ئیسلامیدا کێشاوە، زۆر لەو گەنجانە کە دەبینن هیچ ڕێگایەک نییە بۆ گوزارش کردن لە خۆیان و لەبەر داپلۆسینی سیاسی و گەندەڵی بەرفراوانی دەسەڵاتداران بەرەو ئەو بیرۆکانەی بەهەشت و جیهاد هەڵدەکشێن بە فەزڵی ئەو هەموو مینبەر و بەرنامە بینراو و بیستراوە ئایینیەی کە هەموو تەرکیزیان لای ئاخیرەتە، و ناوێرن بە قەرەی دنیادا بچن لە ترسی داپلۆسینی پۆلیس و ئاساییش دەسەڵاتی بێ سەروبەریش بە کورت بینی خۆی گۆڕەپانی دینداری تەسلیم کردووە بە ڕەشترین هێزی دینی کە دەیەوێت ئەو وشیارەیەی نەتەوەی کورد هەیەتی لە دینداری میانڕەو و پێکەوە ژیانی و بێ دەمار گرژی و قبوڵ کردنی ڕوحی نوێخوازی، هەمووی قوربانی عەقڵیەتی گەندەڵی دینی سعودی سەلەفی مەدخەلی و مەخرەجی بکات، بەس ڕەخنە لە دەسەڵاتی سیاسی نەک ئەوانەی دەسەڵاتی سیاسی کوردستان بەڕێوە دەبەن دەبێت بزانن، بە دەستی ئەو توندڕەوە ئایینییانە سرووشتی دینداری میانڕەوی خەڵک دەشێوێنن، و چاڵێکە بۆ گۆڕی خۆیانی لێدەدەن. [1]
#محەمەد هەریری#