باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و چل و یەکەمە

میڕزا ئۆلقاڎرو پاوەی باس جە چن دیمەنێ جە ژیوای (خەسرەو) پاشاو ئێرانی کەرۊن، باس چانەیە کەرۊن کە چەنی داوا جە کیسراو ئێرانی مەکەران پەی ئانەی ئیمان بارۊن بە دینو محەمەدی.
خەسرەوی لاڵ پۊش، دارای لاڵ کەمەر
بوزورگی لاڵ بەخش، شای گەردوون ئەفسەر
یەک ڕۊ دیش، جە بان تختی زەڕنگار
سەر تاقی، جام ڕېز، گرد ئاما، بە وار
بەو تەورە، زاناش دەس وېش بە شکەست
دەرسات، جە غەرەز، لېوی حەسرەت گەست
دەردم، ڕەماڵان، ساحرانی وېش
مونەجیمان گرد، تەڵەب کەرد وە پېش
ئای ئاسیب چېشەن، وە جامڕېز، یاوان
تاقی کیسرا، تەمام، جەرگم شکاوان
خەسرەو فراوان، خەوفش نە دڵ بەرد
ڕەنگش، بیی بە ڕەنگ، زەعفەرانی زەرد
ئاخېز کەرد، شیی جە خەڵوەتخانە
قاپی بەست، جە خەلق، خویش و بېگانە
یانە و، پەشېوی،، شیی نە جامەی خواب
سەر نیا، وە بان، سەرنیگای گوڵاب
جەو دەم خوڎاوەند، پادشای شاهان
هادی مەدەدبەخش، گرووی جەم جیهان
یەک مەلەک کیاست، وە دەوانی دەو
وە خەڵوەتخانەی، خابگای خەسرەو
فریشتە یاوا، وە پای باڵینش
لادا، جە ڕوخسار، پەردەی موشکینش
واتش: ئەی کیسرا بۊ موسوڵمان بەر
بە خوڎای، واحید، شەهادەت باوەر
بەزەییت بەیۊ، تۊ، بە وېتدا
یاخۊ، عەسایێ، ماوەروون پېتدا
خەسرەو سەرسام بیی، خەیلێ خەوفش کەرد
لەرزا، وېنەی دەنگ، شانای بادی سەرد
مەڵەک تەشریف بەرد، مەلیک خجڵ مەند
خانەی خەم، مایەی، شاڎیی و شەوقیش مەند
واتش: ئەی شەخسە، سەرسامی سەنگی
ئەژدهای نەبەرد، زیڼەیی جەنگی
پەی چېش قاپیتان، پەرېش واز کەردەن
وېنەی شېر، بە من حەمڵە، ئاوەردەن
واتشان: بەشەر مانان، نەوېیەردەن
خارج جە قاپی، گوزەر نەکەردەن
حیجابی، حوڕاس، هەم، ئینکار کەردەن
سەڎ دەفعە وە تاج، شاه سەوگەند وەردەن
ساڵی ئایەندە، وە دەوانی دەو
مەڵەک نازڵ بیی، دیسان، وە خەسرەو
واتش: موسوڵمان، مەبیی نەی جېتدا
یاخۊ، عەسایێ، ماوەروون پېتدا
خەسرەو وات: جارێ، موهلەت دەر، موهلەت
بادا، بوویاروون، لاڎێ بە غەفڵەت.[1]