باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و شەسس و حۆتەمە
دژمنایەتی قوڕەیشیەکا پەی ئەهلوو ئیسلامی، وەرە وەرە زیاتەر بۍ، حاڵشان فرە خراب بۍ، ئەبوبەکر داواش کەردە حەزرەتی هەکە پی تەعرە ژیوای زەحمەتەن، پەوکەی مەشۊم هجووم کەرمۍ پەی کابەی و ئەچاگە دینەکەو تۊ بە بانگەوازێ ئاشکەرا کەرمۍ، پېخامئاوەر و ئیسلامی (ص) فەرماواش: ئېمە چەموو ئاڎییشانە ژمارەمان کەمەن، ئا کارە خاس نېیەن، بەڵام دماتەر عوممەریچ قەناعەتش بە پەیلواکەو ئەبوبەکری ئاوەرد و
وېشا لوێ ڕوەو کابەی، چاکە بانگو ئیسلامیشاندا.
گوبەڼەی کەڵەک شەیتانی مەلعوون
دریا وە هەمدا جە ڕووی دەهری دوون
مافر دوورا دوور چوون خوونە خوارە
پەی ئەهلی سەلام مەکەرد نەزارە
هەرکەس جە هەرجا فرسەتش ماوەرد
کافر موسڵمان ئەزیەتش مەکەرد
ئاخر ئەبوبەکر سیدیقی ئەکبەر
ڕوو کەرد نە حەزرەت مدرا وەراوەر
عەرز یا محەمەد فائیدەش نېیەن
قوڕەیشی کافر گرد بەدخوو بېیەن
هەرجا ئیسلامێ بوینان وە چەم
یەکیەک بە فرسەت پېش مەدان ستەم
با بشین هجووم وە حەرەم بەرین
دینی محەمەد ئاشکرا کەرین
جوابدا حەزرەت شای خەیرولئەنام
فەرما چوون حاڵەن کەم دەسەن ئیسلام
ئېمە ئەندەکین قوەت نەدارین
چوون کەشتی دەریا هەر نادیارین
سیدیقی ئەکبەر چن دەلیل ئاوەرد
خەیلێ پەی حەزرەت موبالەغەش کەرد
چەو دما عوممەر ئومېدی ئیسلام
چەنی چن نەفەر سەحابەی کیرام
حوزوور نەداشتەن حەزرەت تەشریف بەرد
جە بەیتولحەرام مەیلی تاعەت کەرد
چوون ئەبوبەکر سیدیقی ئەکبەر
دەردەم تەشریف بەرد وە بانی مینبەر
بە ئاوازی بەرز خوتبەیێ وانا
حەمدی خوداوەند دانای توانا
هەم بەحس حەزرەت وە مەیان ئاوەرد
بەعد (والسلام) ، مەردم دەعوەت کەرد.[1]