باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و حەفتا و ششەمە
خەدیجە و عەلی، پېخامئاوەرشان ئېستۆ، گیانش ۋناڵین، ئەعزاش زامڎار، ئاڎۍ دڵوەشیشان داوە، ۋنەکېشان ئەسەڕی، داواشان وەنەکەرد تەشریف بەرۊوە پەی یانەی، کەوتېڕا، دمای چن ساتێ ڕاڕەوی، دیسان دەڵ و تووتەو قوڕەیشی یاوێ سەرشان، دیسان سەنگوارانشان کەردۍ.
جە دما حەزرەت شای خەتمی پەنا
عەلەیهی سەلام ڕوحنان خدا
خەدیجەی کوبرا تەڵەب کەرد وە پېش
نشاناش جە لای دەستی ڕاستی وېش
دیش هوون چوون چەشمەی حەیات جۊشانەن
جە ڕووی موبارەک حەزرەت ڕەوانەن
خەدیجە پەی پەی وەتۊی جامەی وېش
هوونش پاک مەکەرد دیسان مەما لېش
عەرز کەرد فیدات بام قیبلەی دنیا و دین
بازە با ئەو هوون بشۊ وە زەمین
فەرما: خوفم هەن جە کینە کېشان
نەوا حەقق غەزەب بگېرۊ لېشان
عەلی، هەم یاوا تا وە لای حەزرەت
چەم ماڵا وە خاک پاکی پای حەزرەت
تاریکە غرووب ئاما جە سەردا
هەر سێ ڕاهیی بین بەو دەشت و دەردا
کەم کەم تا تەشریف وە بەتحا بەردەن
هەم موراجەعەت وە مەنزڵ کەردەن
حەزرەت جەو مەوزووع دەردەم نەشانان
ئیسە ئا جاگە خزرش مەوانان
ناگاه موشریکان زانانشان خەبەر
یەکسەر گرتشان دەوری پېغەمەر
دیسان دەس کەردەن بە هەرزە بازیی
بە بەڎگوفتاریی بە سەنگ ئەندازیی
هەر یەک نە جایی چوون خون خوارە
وە سەنگی سەنگین چوون ئاتەش پارە
جەکووچە و گوزەر، پەی پەی مەکەندەن
وە ڕووی موبارەک حەزرەت مەشەندەن
چوون تەرزەی بەهار مەڕېزا جە سەر
خەدیجە کوبرا وېش کەرد وە ئەسپەر
دایېم پەی حەزرەت وېش فیدا مەکەرد
وە قەومی قوڕەیش هەر نیدا مەکەرد
مەوات: ئەی عەشرەت قەومی بۍ حەیا
وەسەن جەسارەت جە ڕووی موستەفا
ئەهلی گومڕاهان، گرووی بەڎ نیهاد
جە یاگەی وینان زەنانی ئازاد
بۍ گونا و تەقسیر جە ڕوژگاران
یە پەی چېش مەکەن من سەنگباران
چوون قەومی قوڕەیش کوورەدڵ وە جۊش
سەڎای خەدیجە شنەفتەن وە گۊش
جە بەڎکرداری ئەو شەو دەس کېشان
نادم بین یەکسەر جە فیعلی وېشان
جەو دما حەزرەت (عەلەیهی سەلام)
هەم چەنی حەرەم خەدیجەی نیک نام
گاه بېدەنگ، گاه گاه مەناڵان تاو تاو
تا سوبحی سادق هیچ نەکەردەن خاو
سەحەر وە تەوفیق تاکی تەنیای فەرد
تەشریفی خەیرش هەم وە مەسجید بەرد
قانوون و تاعەت وە جا ئاوەردەش
شوکرانەی بۍ حەدد خوداوەند کەردەش.[1]