باخچێوە بېگەرد
نویستەی: میرزا ئۆلقادڎرو پاوەی
بەشۊ سەڎ و نەوەڎۍ
حەزرەت مژدەو نابووتی قوڕەشیەکاش دا بە ئەبوتالیبی، ئاڎییچ جە هەواڵەکەی شاڎ بی.
جەودما حەزرەت موستەفای مورسەل
حەبیبی حەزرەت دانای لەم یەزەل
واتش: ئەی عەممو ئېشەو جوبرەئیل
تەشریفش ئاوەرد جە لای شای جەلیل
جەو سەحیفەی بەد خەبەر ئاوەردەن
حەقق ساسە و مورش حەواڵە کەردەن
باقی مەزموونش تەمام گشت وەردەن
توغرای سەحیفەش ڕېزە ڕېز کەردەن
چوون ئەبوتالیب دانای ساحیب هۊش
فەرموودەی حەزرەت شنەفتش وە گۊش
دەردەم جە شاڎیی شکوفا چوون گوڵ
ئاخېز کەرد چەنی یارانی یەک دڵ
تا قاپی حەسار مەقتووع کەردشان
دەرسات وە لای قەوم تەشریف بەردشان
قوڕەیش جەو دەمدا جەرگشان جەم بیی
بەعزێ خوش داغ، بەعزێ ماتەم بیی
چوون ئەبوتالیب ناگاه دین وە چەم
خاڵی کەردەن دڵ جە پەژارە و خەم
بەردشان وە تۊی قەسری عەنبەر نام
کەردشان تەعزیم وە سەد ئیحترام
واتشان: ئەڵبەت نەدارۊ دەسڕەس
یەقین محەمەد حەدۊمان وە دەس
قوڕەیش چوون سایە کەوت نە خاکپاش
سەر و ماڵ و گیان مەکەردەن فیداش
واتشان: سەلاح بەینی ئېمە و وېت
وە جا باوەری سەر منیەین نە ڕېت
ئەبوتالیب وات: چېشەن ڕەزاتان
من پەی مەتڵەبێ ئامام وە لاتان
مەتڵەب ئەر زېبا ئەگەر هەم زشتەن
سەلاح من وە هەم ئېوەی گشتەن.[1]